104
1 ታ ሼምፖዬ!
ጎዳ ታ ጾሳ ጋላታ!
ኣቤት ጎዳ ታ ጾሳዉ!
ኔኒ ኣይ ኬና ጊታ!
ኔኒ ቦንቾኔ
ቴማ ማይኣዳሳ።
2 ኔኒ ኣፋላ ማላ ፖኦ ቁማኣዳሳ፤
ሳሎታካ ዱንካኔ ማላ
ቶላዳሳ።
3 ኔ ኬꬃ
ሳሎ ጉፋንꬆ ቦላን ኬጻዳሳ፤
ሻራ ኔስ ፓራ-ጋሬ ኬሳዳሳ፤
ጫርኮ ቄፌ ቶጋዳ ባሳ።
4 ኔኒ ጫርኮታ ኔ ኪታንቻ፥
ታማ ላጮካ ኔ ኣይሌ ኬሳሳ።
5 ኔኒ ሳኣ ዮቻ ቦላ ኤሳዳሳ፤
ኢዚ ሜሪ ሜርናስካ ቃጼና።
6 ዎጋ ጊታ ኣባ ቢታ ቦላን
ኣፋላ ማላ ሚጫዳሳ፤
ሃꬂካ ጊታ ዙማታ
ካሚዴስ።
7 ጊዶ ኣቲን ኔ ሴሪን
ሃꬃቲ ኪቺዳ፤
ኔ ኣዛዞ ሲዪዲ ኤሶን ባቃቲዳ።
8 ኢስቲ ጊታ ዙማታፔ
ዱጌ ሾባታ ዎꬊዳ፤
ኔኒ ኢስታስ ጊግሲዳሶ ጎጊዳ።
9 ሃꬃቲ ሲሚዲ
ቢታ ካሞንታ ማላ፥
ኢስቲ ኣꬎንታ ማላ
ዛዋ ኤሳዳሳ።
10 ኔኒ ፑልቶታ ሾባን ፑልቲሳሳ፤
ሃꬅ ዙማታ ጊዶራ
ዱጌ ጎጊሳሳ።
11 ባዞ ዶኣቲ ኡባይ ኢዛፔ ኡዬቴስ፤
ሃሪዲዳቲካ ሳሞስ
ኢዛፔ ኡዪ ኣሌቴስ።
12 ሳሎ ካፎቲ ሃꬃ ማታን
ባንታ ኬꬃ ኬጼቴስ፤
ሚꬃ ሃጋታ ጊዶንካ
ዬጼቴስ።
13 ኔኒ ጊታ ዙማታ ቦላን
ሳሎፔ ኢራ ቡኪሳሳ፤
ቢታካ ኔ ኩሼ ኦሶ
ኣይፌን ኩንꬃዳሳ።
14 ኔኒ ሜሄስ ማታ፥
ኣሳስ ካꬅ ሞኪሳሳ፤
ሄሳን ኣሳይ ቢታ ኦꬂዲ
ካꬅ ሺሼስ።
15 ኣሳ ዎዚና ኡፋይሲዛ ዎይኔ፥
ሲንꬅ ሺጪሲዛ ዛይቴኔ
ዎልቃ ኢሚዛ ካꬅ ዴሜስ።
16 ጎዳ ሚꬃቲ፥
ኢዚ ቶኪዳ ሊባኖሴ ዚጋቲ
ዳሮ ኢራ ኡዪ ካሌቴስ።
17 ኢስታን ካፎቲ
ባንታ ኬꬅ ኬጼቴስ፤
ዚጊሌቲካ ዚጋ ቦላ
ኬጺዲ ዴኤቴስ።
18 ꬎቃ ዙማታ ቦላን
ዉሻቲ ዴኤቴስ፤
ቃሴ ጉፓሌቲ
ሹቻ ጎንጎሎን ቆቴቴቴስ።
19 ዎዳ ቆዳ ኤሪሳናስ
ኔኒ ኣጊና ሜꬋዳሳ፤
ኣርሼይ ባ ዉሊዛ ዎዴ ኤሬስ።
20 ኔኒ ꬉማ ኤሂዛ ዎዴ
ሳኣይ ቃሜስ፤
ዎራ ዶኣቲካ ኬዚዲ
ዎጼሬቴቴስ።
21 ዎዳላ ጋሞቲ
ማና ሚሻስ ዋሴቴስ፤
ኢስቲ ባንታስ ሚዛ ሚሽ
ጾሳፌ ኮዬቴስ።
22 ኣርሼይ ሞኪዛ ዎዴ
ጉዬ ሲሚዲ
ባንታ ኣቆሶን ኢቼቴስ።
23 ሄ ዎዴ ኣሲ ባ ኦሶስ ኬዜስ፤
ሳኣይ ቃማና ጋካናስ
ኦꬄስ።
24 ኣቤት ጎዳዉ!
ኔ ኦሶይ ኣይ ኬና ዳሮ!
ኔ ኣꬎ ኤራቴꬃን
ኔኒ ኢስታ ኡባ ሜꬋዳሳ፤
ኔ ሜꬊዳ ሜꬌታቲ
ቢታ ኩሚዳ።
25 ሃና ኣባያ ጊታኔ ኣሆ፤
ቆዳይ ባይንዳ ቃጺዛ
ሜꬌቴꬃቲ፥
ጉꬃቲኔ ጊታቲ ኢዚን ኩሚዳ።
26 ኢዚ ቦላን ማርካቤቲ ሲሜሬቴቴስ፤
ቃሴ ኔኒ ሜꬊዳ
ሌዋታኔ ጌቴቲዛ ሚሚንቴይ
ኢዚን ካኤስ።
27 ኮሺዛ ዎዴ ኔ ኢስታስ
ሚዛዝ ኢማና ማላ
ኢስቲ ኡባይ ኔኮ ጼሌቴስ።
28 ኔኒ ኢስታስ ኢሚዳ ዎዴ
ኢስቲ ሺሼቴስ፤
ኔኒ ኔ ኩሼፔ ዬጊን
ኢስቲ ሎኦ ሚሽ ካሌቴስ።
29 ኔኒ ኔ ሲንꬃ
ጌንꬂዛ ዎዴ ዳጋሜቴስ፤
ኔ ኢስታ ሼምፖ
ኤኪዛ ዎዴ ሃይቄቴስ፤
ዱጌ ቢታንካ ሲሚ ጌሌቴስ።
30 ጊዶ ኣቲን ኔኒ ኢስታስ
ኔ ኣያና ኪቲዳ ዎዴ
ሃራቲ ሜꬌቴቴስ፤
ቢታካ ኦራጺሳሳ።
31 ጎዳ ቦንቾይ ሜርናስ ዴኦ፤
ጎዳይ ባ ኦሶን ኡፋዬቶ።
32 ኢዚ ቢታ ጼሊን ቢታይ ቃጼስ፤
ቃሴ ኢዚ ዙማታ ቦቺን
ዙማቲ ጩዋቴቴስ።
33 ታኒ ዴኢዛ ላይꬅ ኡባን
ጎዳስ ዬጻና፤
ታኒ ሼምፖራ ፓጻ
ዴኢዳ ዎዴ ኡባን
ታ ጾሳስ ዬጻና።
34 ታኒ ጎዳን ኡፋዬቲዛ ጊሻስ
ታ ዎዚና ቆፋይ ኢዛ ኡፋይሶ።
35 ናጋራንቻቲ ቢታፌ ꬋዬቶ፤
ሃይሳፌ ሲንꬃስ
ኢታቲ ዶፔቶ።
ታ ሼምፖዬ!
ጎዳ ጋላታ!
ጎዳ ጋላታ!