106
1 ጎዳ ጋላቲቴ!
ኢዚ ኪያ ጊዲዳ ጊሻስ፥
ኢዛ ሲቆይካ
ሜርናስ ጊዲዳ ጊሻስ
ጎዳ ጋላቲቴ።
2 ጎዳይ ኦꬂዳ ዎልቃማ
ኦሶ ዮታናስ፥
ዎይኮ ኢዛ ጋላታ
ኡባ ቆንጪሳናስ
ዳንዳይዛይ ኦኔ?
3 ፒርዳይ ጌላቶንታ ማላ
ናጊዛይቲኔ
ኡባ ዎዴ ጺሎ ኦꬂዛይቲ
ኣንጄቲዳይታ።
4 ኣቤት ጎዳዉ!
ኔኒ ኔ ኣሳ ማዲዛ ዎዴ
ታና ቆፓ፤
ኢስታ ኔኒ ኣሺዛ ዎዴ
ታናካ ኣላ።
5 ሄሲካ ኔ ዶሪዳ ኣሳስ
ሳኣይ ኪዪን ታኒ ቤያና ማላ፥
ኔ ኣሳ ኡፋይሳ
ታኒ ኡፋዬታና ማላ፥
ኔ ናይቲ ቦንቼቲዳ ጋሶን
ታኒካ ኡፋይሳን
ማጉላና ማላሳ።
6 ኑኒ ኑ ኣዋታ ማላ
ናጋራ ኦꬂዶስ፤
ሞሮኔ ኢታ ኦꬂዶስ።
7 ኑ ኣዋቲ ጊብጼን ዴኢዛ ዎዴ፥
ኔ ማላሊሲዛ ኦሶ
ቆፒቤቴና።
ኔ ሲቆ ዳሮቴꬃ
ኢስቲ ኣኬኪቤቴና፤
ዞኦ ኣባ ላንቄን ማካሊዳ።
8 ጊዲኮካ ኢዚ ባ ሱንꬃ
ጊሻስ፥ ባ ጊታ
ዎልቃ ኤሪሳናስ
ኢስታ ኣሺዴስ።
9 ኢዚ ዞኦ ኣባ ሴሪዴስ፤
ኣባይካ ሜሊዴስ፤
ባዞን ካሌꬂዛይሳ ማላ
ጪማ ጊዶራ
ኢስታ ካሌꬂዲ ፒንꬂዴስ።
10 ኢዚ ኢስታ
ኢጺዛይታ ኩሼፔ ኣሺዴስ፤
ሞርኬታ ኩሼፔ
ኢስታ ዎዚዴስ።
11 ኢስታ ሞርኬታ ሃꬂ ሚቲዴስ፤
ኢስታፌ ኢሶይካ ኣቲቤና።
12 ሄ ዎዴ ኢስራኤሌቲ
ኢዛ ቃላ ኣማኒዳ፤
ኢዛ ዬꬃን ሳቢዳ።
13 ጊዲኮካ ኢስቲ ኢዚ ኦꬆይሳ
ሄራካ ዶጊዳ።
ኢዛ ዞሬ ናጎንታ
ባንቲ ኮዪዳይሳ ኦꬂዳ።
14 ኢስቲ ባዞ ቢታን ኬሂ ኣሞቲዳ፤
ቃሴ ሜላ ቢታንካ
ጾሳ ፓጪዳ።
15 ሄሳ ጊሻስ ኢዚ
ኢስቲ ዎሲዳይሳ ኢሚዴስ፤
ጊዶ ኣቲን ኢስታ ሼምፖስ
ጊልቃቴꬅ ኪቲዴስ።
16 ኣሳቲ ባዞን ዱንካኒ ዲሼ
ሙሴኔ ጎዳስ ዱማቲዳ
ኣይሌ ኣሮኔ
ቃናቲዳ ዎዴ፥
17 ቢታይ ዶዬቲዲ
ዳታኔ ሚቲዴስ፤
ኣብራሜ ኢዛ ኬꬃ
ኣሳታራ ሞጊዴስ።
18 ቃሴ ኢስታ ማባራ ጊዶን
ታማይ ኤጺን፥
ላጮይ ሄ ኢታ ኣሳታ ጹጊዴስ።
19 ኮሬቤ ዙማን ዴኢሼ
ዎርቃ ሴሪሲዲ
ማራ ሚስሌ ሜꬊዳ፤
ሂስቲዲ ሄ ሚሲላስ ጎይኒዳ።
20 ኢስቲ ባንታ ቦንቾ ጾሳ
ማታ ሚዛ
ሚዛ ሚስሌን ላሚዳ።
21 ኢስቲ ባንታና ኣሺዳ
ጾሳ ዶጊዳ፤
ኢዚ ጊብጼን ጊታ ኦሶ፥
22 ካሜ ቢታንካ
ማላሊሲዛይሳኔ
ዞኦ ኣባን፥ «ሆላ!» ጊሲዛይሳ
ኦꬂዳይሳ ዶጊዳ።
23 ሄሳ ጊሻስ ጾሲ
ኢስታ ꬋይሳና ጊዴስ፤
ጊዶ ኣቲን ꬋይሶንታ ማላ
ኢዛ ሃንቆዛ ዛራናስ
ጾሲ ዶሪዳ
ሙሴይ ጊዶን ኤቂዴስ።
24 ሄ ሎኦ ቢታዮ ካꬊዳ፤
ሄሳፌ ጉዬ
ኢዛ ቃላን ኣማኔቲቤቴና።
25 ኢስቲ ባንታ ዱንካኔዛ ጊዶን
ዙዙሚዳኔ
ጎዳ ቃላስ
ኣዛዜቶንታ ኢጺዳ።
26 ሄሳ ጊሻስ ኢስቲ
ባዞን ኩንዲ ꬋያና ማላ፥
ኢዚ ባ ኩሼ ዴንꬂዲ ጫቂዴስ።
27 ኢስታ ዜሬꬃቲ
ካዎቴꬃታ ጊዶን
ኦሌታናይሳኔ
ኢስቲ ቢታ ጋጻ ጋካናስ
ላሌታናይሳ ዮቲዴስ።
28 ሄሳፌ ጉዬ ኢስቲ
ባኣሊ-ፔኦሬን ዲዛ
ኤቃስ ጎይኒዛይታራ
ኢሲፌ ጋይቲዳ፤
ሼምፖይ ባይንዳ ኤቃታስ
ያርሼቲዳ ያርሾዛ ሚዳ።
29 ኢስቲ ባንታ ኦሶን
ጎዳ ሃንቄꬂዳ፤
ሂስቲን ኢስታ ጊዶን
ኢታ ሃርጌይ ዎꬊዴስ።
30 ጊዶ ኣቲን ፊኒሃሲ ዴንዲዲ
ኢስታ ሞሮዛ ፒርዲን
ኢታ ሃርጌይ
ኢስታ ቦላፌ ኪቺዴስ።
31 ሄሲካ ዬሌታፔ ዬሌታ ጋካናስ
ሜርናስ ኢዛስ
ጺሎቴꬅ ጊዲዲ ቆዴቲዴስ።
32 ማሪባ ፑልቶ ማታን
ጎዳ ሃንቄꬂዳ፤
ኢስታ ጋሶን ሙሴ ቦላ
ሜቶይ ጋኪዴስ።
33 ኣይስ ጊኮ ኢስቲ ሙሴ ዪሎሲዳ፤
ሂስቲን ኢዛ ዶናፔ
ቤሶንታ ቃላይ ኬኢዴስ።
34 ጎዳይ ꬋይሲቴ ጊን
ኢስቲ ካናኔ ኣሳታ ꬋይሲቤቴና።
35 ሄ ፓላፔ ኢስቲ
ሄ ካዎቴꬃታራ
ጌሌቲ ኤኬቲዲ ዋላኬቲዳኔ
ኢስታ ዴኦ ዎጋ ካሊዳ።
36 ጾሳ ኣሳቲ ኢስታ ኤቃስ ጎይኒዳ፤
ሄሲካ ኢስታስ ዎጺማዴ ጊዲዴስ።
37 ኢስቲ ባንታ ኣቱማኔ ማጫ ናይታ
ዳይዳንꬃታስ ያርሺዳ።
38 ኢስቲ ጺሎ ሱꬅ
ካናኔ ኤቃታስ ያርሺዳ፤
ባንታ ኣቱማኔ ማጫ ናይታ
ሱꬅ ጉሲዳ፤
ሄ ሱꬃን ቢታይ ቱኒዴስ።
39 ሄሳꬆ ኢስቲ
ባንታ ኦሶን ቱኒዳኔ
ላይማ ማጫሳ ማላ
ባንታ ጾሳስ
ኣማኔቶንታ ኢጺዳ።
40 ሄሳ ጊሻስ ጎዳ ሃንቆይ
ኢዛ ኣሳ ቦላ ኤጺ ኬኢዴስ፤
ኢዚ ባይታ ሃራሴቲዴስ።
41 ኢዚ ኢስታ ሃራ ካዎቴꬃታ ኩሼን
ኣꬂ ኢሚዴስ፤
ኢስታ ሞርኬቲ ኢስታ ሃሪዳ።
42 ኢስታ ሞርኬቲ ኢስታ ናቂዳኔ
ባንታ ሼኔን ኣይሲዳ።
43 ኢዚ ኢስታ ዳሮቶ ኣሺዴስ፤
ጊዶ ኣቲን ኢስታ ማካላስ
ጊጺ ኬዚዳ፤
ባንታ ናጋራ ጋሶን ꬋይዳ።
44 ጊዲኮካ ኢስቲ ዋሲዳ ዋሶዛ ሲዪዲ
ኢስታ ዋዬዛ ቆፒዴስ።
45 ኢስታ ጊሻስ
ባ ጫቆ ቃላ ሃሳኢዴስ፤
ኣጎንታ ባ ሲቆ ዳሮን
ኢስታ ማሪዴስ።
46 ኢስታ ዲኢዳ ኡባይ
ኢስታስ ቃꬌታና ማላ
ኦꬂዴስ።
47 ኣቤት ጎዳዉ ኑ ጾሳዉ!
ኑና ኣሻ።
ኑኒ ኔ ጌሻ
ሱንꬃ ጋላታና ማላ
ካዎቴꬃታ ጊዶፌ
ኑና ሺሻ።
48 ጎዳይ፥ ኢስራኤሌ ጾሲ
ሜርናፔ ሜርና ጋካናስ
ጋላቴቶ!
ኣሳይ ኡባይ፥ «ኣሚን» ጎ።
ጎዳ ጋላቲቴ!