ኢቻሻንꬆ ማጻፋ
107
(ማዛ 107—150)
1 ኢዚ ኪያኔ
ኢዛ ሲቆይ ሜርናስ
ጊዲዳ ጊሻስ ጎዳ ጋላቲቴ።
2 ጎዳይ ኢስታ ዎዚዳይቲ፥
ኢስታ ሞርኬታ ኩሼፔ
ኢዚ ኣሺዳይቲ ሂዝጌቶ፤
3 ኣርሼይ ሞኪዛሶፔኔ
ዉሊዛሶፔ፥
ፑዴሃፔኔ ዱጌሃፔ
ዴሬ ኡባፌ ኢዚ ሺሺዳይቲ
ሂዝጊ ሃሳዬቶ።
4 ኢስታፌ ኢሶቲ ኢሶቲ
ባዞ ቢታን ቶይላቲዳ፤
ባ ዴኢዛ ካታማ ኤፊዛ ኦጌ
ዴማናስ ዳንዳይቤቴና።
5 ኢስቲ ጋፊዳኔ ሳሜቲዳ፤
ኬሂፔ ዳቡርዳ።
6 ኢስቲ ሜቶቲዳ ዎዴ
ጎዳኮ ዋሲዳ፤
ኢዚካ ኢስታ ዋዬዛፔ
ኣሺዴስ።
7 ኢስቲ ዴኣና ካታማ ጋካናስ፥
ኢዚ ኢስታ ሲታ ኦጌራ ካሌꬂዴስ።
8 ሜርና ኢዛ ሲቆዛሲኔ
ኢዚ ኣሳስ ኦꬂዳ ማላሊሲዛ
ሚሻታስ ኢስቲ ጎዳ
ጋላቴቶ!
9 ኣይስ ጊኮ ኢዚ ሳሜቲዳይታ
ኡሺ ኣሊሴስ፤
ጋፊዳይታካ
ሎኦ ሚሻን ካልሴስ።
10 ኢስታፌ ኢሶቲ ኢሶቲ ቢራታ
ሳንሳላታን ቃሼቲዲ
ዋዬቲዛይታ፤
ሳካና ꬉማ ጊዶንካ
ኡቲዳይታ፤
11 ጋሶይካ ኢስቲ
ጾሳ ቃላ ቦላ ማካሊዳኔ
ኡባፌ ꬎቃ ጾሳ
ዞሬ ካꬊዳ።
12 ሄሳ ጊሻስ ዎልቃ ኦሶን
ኢስታ ኢጼꬂዴስ፤
ኢስቲ ዳቡሪን
ኢስታ ማዲዛይ ꬋይዴስ።
13 ኢስቲ ሜቶቲዳ ዎዴ
ጎዳኮ ዋሲዳ፤
ኢዚካ ኢስታ ዋዬዛፔ
ኣሺዴስ።
14 ሳካና ꬉማፔ ኢስታ ኬሲዴስ፤
ኢስቲ ቃሼቲዳ ሳንሳላታካ
ዱሴሬꬂዴስ።
15 ሜርና ኢዛ ሲቆዛሲኔ
ኢዚ ኣሳስ ኦꬂዳ
ማላሊሲዛ ሚሻታስ
ኢስቲ ጎዳ ጋላቴቶ።
16 ኣይስ ጊኮ ኢዚ ጻርቂማላፔ ኦሴቲዳ
ፔንጌ ሜንꬂዴስ፤
ቢራታ ኮላታታካ
ቃንጼሬꬂዴስ።
17 ኢስታፌ ኢሶቲ ኢሶቲ
ባ ማካላቴꬃ ጋሶን
ኤያ ጊዲዳ፤
ባ ናጋራ ጋሶንካ
ሜቶን ጌሊዳ።
18 ኢስታ ቆꬌይ ካꬅ ኢጺን
ሃይቃና ማቲዳ።
19 ኢስቲ ሜቶቲዳ ዎዴ
ጎዳኮ ዋሲዳ፤
ኢዚካ ኢስታ ዋዬዛፔ
ኣሺዴስ።
20 ኢዚ ባ ቃላ ኪቲዲ
ኢስታ ፓꬂዴስ፤
ዱፎ ዶናፔካ
ኢስታ ኣሺዴስ።
21 ሜርና ኢዛ ሲቆዛሲኔ
ኢዚ ኣሳስ ኦꬂዳ ማላሊሲዛ
ሚሻታስ
ኢስቲ ጎዳ ጋላቴቶ።
22 ኢስቲ ኢዛስ
ጋላታ ያርሾ ያርሼቶ፤
ቃሴካ ኡፋይሳ ዬꬃን
ኢዚ ኦꬂዳ ኦሶ ቆንጪሴቶ።
23 ኢስታፌ ኢሶቲ ኢሶቲ ማርካቤን
ጊታ ኣባ ጊዶራ ቢዳ፤
ሄ ጊታ ኣባ ቦላ
ባንታ ኦሶ ኦꬂዳ።
24 ኢስቲ ጎዳ ኦሶ ቤኢዳ፤
ኢዚ ጪማ ጋርሳን ኦꬂዳ
ማላሊሲዛ ኦሶታ ጼሊዳ።
25 ኢዚ ኣዛዚን
ጎቴ ጫርኮይ ዴንዲዴስ፤
ሂስቲን ኣባ ዳምባላይ
ቃጺዴስ።
26 ኢስቲ ፑዴ ሳሎ ኬዚዳ፤
ሲሚዲካ ዱጌ ጪማን ጌሊዳ፤
ኢስታ ጋኪዳ ሜቶፔ
ዴንዶይሳን
ኢስታ ዎዚናይ ታሂዴስ።
27 ኢስቲ ማꬆቲዳ ኣሳ ማላ
ዪጮቲዲ ጋንዲጋርዳ፤
ኢስታስ ኣኬኪዛ ዎዚናይካ
ዳሚዴስ።
28 ኢስቲ ሜቶቲዳ ዎዴ
ጎዳኮ ዋሲዳ፤
ኢዚካ ኢስታ ዋዬዛፔ
ኣሺዴስ።
29 ኢዚ ጎቴ ጫርኮዛ
ጮኡ ሂስቲዴስ፤
ኣባ ዳምባላካ ሲርጲ ሂስቲዴስ።
30 ጮኡ ጊዳ ጊሻስ
ኢስቲ ኡፋዬቲዳ፤
ኢስቲ ኣሞቲዛ ዎዴቤን
ጋꬂዴስ።
31 ሜርና ኢዛ ሲቆዛሲኔ
ኢዚ ኣሳስ ኦꬂዳ ማላሊሲዛ
ሚሻታስ
ኢስቲ ጎዳ ጋላቴቶ።
32 ኢስቲ ኢዛ ዴሬ ዱላታን
ꬎቁ ꬎቁ ሂስቴቶ፤
ቃሴ ጪማታ ሺቆን
ኢዛ ጋላቴቶ።
33 ሻፋታ ሙሌራ ሜሊሲዴስ፤
ፑልቶቲ ፑልቶንታ ማላ ቴቂዴስ።
34 ሄን ዴኢዛ ኣሳ
ኢታቴꬃ ጋሶን
ኣራዳ ቢታዮ ኣይኮ
ዶሊሶንታ ማጺኔ
ቢታ ኦꬂዴስ።
35 ኢዚ ባዞን ሃꬅ ኤሊሲዴስ
ሜላ ቢታን ፑልቶይ
ꬉቃና ማላ ኦꬂዴስ።
36 ጋፊዳይታ ሄን ዎꬂዴስ፤
ኢስቲካ ባንታስ
ዴኣና ካታማ ኬጺዳ።
37 ኢስቲ ባንታ ጎሻን ዜሪዳ፤
ዎይኔ ቶኪዳ፤
ዳሮ ካꬅ ሺሺዳ።
38 ኢዚ ኢስታ ኣንጂን
ኢስቲ ኬሂ ጮራቲዳ፤
ኢስታ ሜሄታካ ጉꬂቤና።
39 ሜቶን፥ ዋዬኒኔ
ጬጬን ጾኔቲን
ኢስታ ቆዳይ ጉጺዴስ።
40 ጎዳይ ሃላቃታ ካዉሺዴስ፤
ኦጌይ ባይንዳ ባዞን
ቶይላታና ማላ
ኢስታ ኦꬄስ።
41 ጊዶ ኣቲን ኢዚ ሜቶታንቻታ
ኢስታ ዋዬፔ ኬሲዴስ፤
ዶርሳ ዉዴ ማላ ጮራ ናይታካ
ኢስታስ ኢሚዴስ።
42 ሱሬ ኣሳቲ
ሄሳ ቤኢዲ ኡፋዬቴቴስ፤
ጊዶ ኣቲን ጌላታ
ዶናይ ጎርዴታና።
43 ኤራ ኣሲ ሃ ዮኦዛ
ባ ዎዚናን ዎꬆ፤
ኢዚካ ጎዳ ማሮቴꬅ ኣኬኮ።