109
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ታኒ ጋላቲዛ ጾሳዉ!
ኔኒ ታስ ጮኡ ጎፓ።
2 ኢታቲኔ ዎርዳንቻቲ ባ ዶና
ታ ቦላ ዶይዳ፤
ታ ቦላካ ዎርዶ ሃሳይዳ።
3 ኢስቲ ኢጾ ቃላራ ታና ጊዶꬂዳ፤
ጋሶይካ ባይንዳ
ታና ኬሂ ቆሂዳ።
4 ታኒ ኢስታ ሲቂሺን
ኢስቲ ታና ሞቲዳ፤
ጊዶ ኣቲን ታ ዎሳይስ።
5 ታኒ ሎኦ ኦꬂን
ታስ ኢታ ዛሪዳ፤
ታ ኢስታ ሲቂን ታና ኢጺዳ።
6 ኢዛ ቦላ ኢታ ዳና ሹማ፤
ኢዛ ሞቲዛይካ
ኢዛ ኡሻቻን ኤቆ።
7 ፒርዳሶን ኢዚ ሞራንቻ
ጊዲ ቤቶ፤
ኢዛ ዎሳይካ
ኢዛስ ሲሚዲ ጎሜቶ!
8 ኢዛ ላይꬂ ቃሞ፤
ኢዛ ሹሜቴꬃካ ሃራይ ኤኮ!
9 ኢዛ ናይቲ ኣዋ ꬋይዲ ዪኦቴቶ፤
ኢዛ ማቼያካ ኣምኦ ጊዱ!
10 ኢዛ ናይቲ ዩዪ ዩዪዲ ዎሴቶ፤
ሃኢ ባ ዲዛ ላሌቲዳ
ኬꬃፌካ ጎዴቴቶ!
11 ኢዛ ኣቆታ ኡባ ኣጮ ኣዋይ ላቶ፤
ኢዚ ዳቡርዲ ኬሲዳ ኡባ
ኣላጋይ ቦንቆ!
12 ኦኒካ ኢዛ ማሮፖ፤
ዎይኮ ዪኦ ጊዲዳ ናይታስ
ቃꬌቲዛይ ዶፖ!
13 ኢዛ ናይቲ ኡባይ ꬋዬቶ፤
ካሊዛ ዬሌታን
ኢዛ ሱንꬂ ዶጌቶ።
14 ኢዛ ኣዋታ ናጋራይ
ጎዳ ሲንꬃን ቆፌቶ፤
ኢዛ ኣዬይ ናጋራይ
ሙሌካ ቁጬቶፎ!
15 ኢስታ ናጋራይ
ጎዳ ሲንꬃን ኡባቶ ቤቶ፤
ኢስታ ኣኬኪሲዛ ሚሺ
ቢታ ቦላ ዶፖ።
16 ጋሶይካ ኢዚ ማንቂዳዴ፥
ሜቶቲዛዴኔ
ዎዚናይ ማዱንጺዳዴ
ሃይቃና ጋካናስ
ጎዲዴስ ኣቲን
ኢዛ ማራናስ ቆፒቤና።
17 ኢዚ ቃንጋናስ ዶሲዛ ጊሻስ
ኢዚ ቃንጌቶ!
ኢዚ ኣንጃናስ ዶሶንታ ጊሻስ
ኢዛፔ ሃኪዴስ!
18 ቃንጌꬅ ማይኦ ማላ ማይኢዴስ፤
ሃꬃ ማላ ኢዛስ ቦላን ጌሊዴስ፤
ዛይቴ ማላካ
ሜቄꬃ ጊዶ ጌሊዴስ።
19 ኣፋላ ማላ ኢዛ ካሞ፤
ሳቄ ማላ ኡባ ዎዴ
ኢዛ ጼሳን ዴኦ!
20 ሃይሲ ታና ሞቲዛይታሲኔ
ታ ቦላ ኢታ ሃሳይዛይታስ
ጎዳይ ኢሚዛ ዎይቶ ጊዶ!
21 ጊዶ ኣቲን ኣቤት
ኡባፌ ꬎቃ ጎዳዉ!
ኔ ሱንꬃ ጊሻስ
ታና ሎኦ ኣይፌን ጼላ፤
ኔ ሲቆይ ሎኦ ጊዲዳ ጊሻስ
ታና ኣሻ።
22 ታኒ ሂዬሳኔ ሜቶታንቻ ኣሳ፤
ታ ዎዚናይ ማዱንጺዴስ።
23 ታኒ ኦማርሳ ዎዴ ኩዋ ማላ
ꬋያና ሃናይስ፤
ቦሌ ማላካ ቆቆፌታዲስ።
24 ጾሚሺን ታ ጉልባቴይ ዳቡርዴስ፤
ታ ኣሾይ ጊልቂዲ
ሜቄꬅ ኣቲዴስ።
25 ታ ሞርኬታስ ታኒ
ቂልጪዛ ሚሽ ጊዳዲስ፤
ኢስቲ ታና ቤኢዲ
ባ ቆꬌ ቃꬄቴስ።
26 ኣቤት ጎዳዉ ታ ጾሳዉ!
ታና ማዳ፤
ኔ ሜርና ሲቆ ማላ
ታና ኣሻ።
27 ኣቤት ጎዳዉ!
ሃይሳ ኔ ኩሼይ ኦꬂዳይሳኔ
ኔኒ ፖሊዳይሳ
ታ ሞርኬቲ ኤሬቶ።
28 ኢስቲ ታና ቃንጌቴስ፤
ኔኒ ጊዲኮ ታና ኣንጃሳ፤
ታ ቦላ ዴንዲዛይቲ ዬላታና፤
ጊዶ ኣቲን ታኒ
ኔ ኣይሌይ ኡፋዬታና።
29 ታና ሞቲዛይቲ
ካዉሻቴꬅ ማይኤቶ፤
ባንታ ዬላካ
ኩታ ማላ ቁማኤቶ።
30 ታኒ ታ ኢንጻርሳን
ጎዳ ኬሃ ጋላታና፤
ዳሮ ዴሬይ ሺቂዳ ዱላታን
ኢዛ ሳባና።
31 ጋሶይካ ኢስታ ቦላ ሃይቆ ፒርዳ
ፒርዲዛይታፔ ኣሻናስ
ማንቆታፔ ኡሻቻ ባጋራ
ኢዚ ኤቄስ።