115
1 ኣቤት ጎዳዉ!
ኑ ጊሻስ ጊዶንታ
ኔ ሲቆ ጊሻሲኔ
ኔ ኣማኔቴꬃ ጊሻስ
ኔ ሱንꬃ ቦንቻ።
2 ካዎቴꬃቲ ኣይስ፥
«ኢስታ ጾሲ ኣዋን ዲዜ?» ጊዞ?
3 ኑ ጾሳይ ሳሎን ዴስ፤
ኢዚ ባ ዶሲዳይሳ ኡባ ኦꬄስ።
4 ጊዶ ኣቲን ኢስታ ኤቃ ጾሳቲ
ቢራፔኔ ዎርቃፌ
ኣሳ ኩሼን ኦሴቲዳይታ።
5 ኢስታስ ዶናይ ዴስ ሺን
ሃሳዬቴና፤
ኣይፌይካ ዴስ ሺን ዴሜቴና።
6 ኢስታስ ሃይꬂ ዴስ ሺን ሲዬቴና፤
ሲꬌይካ ዴስ ሺን ሲንጌቴና።
7 ኢስታስ ኩሼይ ዴስ ሺን
ቦቼቴና፤
ቶሆይካ ዴስ ሺን
ሄሜቴቴና፤
ኢስታ ፖራንዴይ
ጬንጉርስ ኬሴና።
8 ኢስታ ሜꬊዛይቲኔ
ኢስታን ኣማኔቲዛይቲ
ኡባይ ኢስታ ማላ ጊዴቶ።
9 ኢንቴኖ ኢስራኤሌ ኣሳቶ!
ጎዳን ኣማኔቲቴ!
ኢዚ ኢንቴስ ጎንዳሌኔ
ኢንቴና ማዲዛዴ።
10 ኢንቴኖ ኣሮኔ ዜሬꬃቶ!
ጎዳን ኣማኔቲቴ!
ኢዚ ኢንቴስ ጎንዳሌኔ
ኢንቴና ማዲዛዴ።
11 ኢንቴኖ ጎዳስ ያዪዛይቶ!
ጎዳን ኣማኔቲቴ!
ኢዚ ኢንቴስ ጎንዳሌኔ
ኢንቴና ማዲዛዴ።
12 ጎዳይ ኑስ ቆፔስ፤
ኢዚ ኑና ኣንጃና፤
ኢዚ ኢስራኤሌ ኣሳታኔ
ኣሮኔ ዜሬꬃታካ ኣንጃና።
13 ጎዳስ ያዪዛይታ ኡባ
ጉꬅ ጊዲን ጊታ ኢዚ ኣንጃና።
14 ጎዳይ ኢንቴናካ
ኢንቴ ናይታካ ዳሪሶ!
15 ሳሎኔ ሳኣ ሜꬊዳ
ጎዳይ ኢንቴና ኣንጆ!
16 ሳሎቲ ጾሳሳ፤
ጊዶ ኣቲን ሳኣ
ኣሳ ናይታስ ኢሚዴስ።
17 ሃይቂዲ ዱጌ ዱፎን ጌሊዳይቲ
ጎዳ ጋላታናስ
ዳንዳዬቴና።
18 ጊዶ ኣቲን ኑኒ
ሼምፖራ ፓጻ ዲዛይቲ
ሃቺፌ ዶሚዲ
ሜርና ጋካናስ
ጎዳ ጋላታና።
ጎዳይ ጋላቴቶ!