116
1 ኢዚ ታ ሾባ
ዎሲዛ ዎሳ
ሲዪዳ ጊሻስ
ታኒ ጎዳ ዶሳይስ።
2 ኢዚ ባ ሃይꬅ
ታኮ ዬጊዳ ጊሻስ
ታኒ ዴኢዛ ዎዴ ኡባን
ኢዛ ጼይጋና።
3 ሃይቆይ ዎጺማዴ ማላ
ታና ዶዲ ኦይኪዴስ፤
ዱፎን ጌሎይ ታና ሂርጊሲዴስ።
ጬጬይኔ ኡንኦይ
ታና ቶሊ ኦይኪዴስ።
4 ሄ ዎዴ ታኒ፥
«ኣቤት ጎዳዉ! ሃዳራ!
ታና ኣሻ» ጋዳ
ጎዳ ሱንꬅ ጼይጋዲስ።
5 ጎዳይ ኪያኔ ጺሎ፤
ኑ ጾሳይ ማሪዛይሳ።
6 ጎዳይ ኣሽኬታ ናጌስ፤
ታኒ ሜቶቲዳ ዎዴ
ኢዚ ታና ኣሺዴስ።
7 ታ ሼምፖዬ ኣኔ ዎፑ ጋ፤
ጎዳይ ኔስ
ሎኦ ሚሽ ኦꬂዴስ።
8 ጎዳይ ታና ሃይቆፔ፥
ታ ኣይፌ ኣፉንꬃፌ፥
ታ ቶሆካ
ꬉጴፔ ኣሺዴስ።
9 ሄሳ ጊሻስ
ታኒ ጎዳ ሲንꬃን
ሼምፖራ ፓጻ ዲዛይታ
ጊዶን ሄሜታይስ።
10 ታ፥ «ታኒ ኬሃ ኡንኤታዲስ»
ጊዛ ዎዴካ
ኣማኖ ኣጋቤኬ።
11 ታስ ጊዛዚ ꬋዪን፥
«ኣሲ ኡባይ ዎርዶ» ጋዲስ።
12 ኢዚ ታስ ኪዪዳ ኪያቴꬃ ጊሻስ
ታኒ ጎዳስ
ኣይ ቃንጻናስ ዳንዳያዚና?
13 ጎዳይ ታና ኣሺዳ ጊሻስ
ዎይኔ ኡሹ ጋላታስ ሺሻዳ
ኢዛ ሱንꬁ ጼይጋና።
14 ኢዛ ዴራ ኡባ ሲንꬃን
ታኒ ኣዲኒዳ ኣዲና
ጎዳስ ጋꬃና።
15 ጌሻታ ሃይቆይ
ጎዳ ሲንꬃን ቦንቾ።
16 ኣቤት ጎዳዉ! ታኒ ኔ ኣይሌ፤
ታኒ ኔ ኣይሌይ ና፤
ታና ቃሾፔ ቢርሻዳሳ።
17 ኣቤት ጎዳዉ!
ታኒ ጋላታ ያርሾ ኔስ ያርሻና፤
ሂስታዳ ኔ ሱንꬃ ጼይጋና።
18 ኢዛ ዴራ ኡባ ሲንꬃን
ታኒ ኣዲኔቲዳ ኣዲና
ጎዳስ ጋꬃና።
19 ሄሳካ ታኒ ጋꬃናይ፥
ዬሩሳላሜን ዲዛ ጎዳ
ኬꬃ ዳባባና።
ጎዳይ ጋላቴቶ!