17
ዳዊቴ ዎሳ
1 ኣቤት ጎዳዉ!
ታ ጺሎቴꬃን ማጋኒዛ
ማጋና ሲያ፤
ታ ዋሶዛ ኤዝጋ፤
ጪሞይ ባይንዳ ዎሲዛ ዎሳስ
ዛሮ ኢማ።
2 ታስ ጺሎቴꬂ ኔፔ ዮ፤
ቱማ ኔ ኣይፌይ ጼሎ።
3 ኔኒ ቃማን ታና ጾሞሳዳሳ፤
ታ ዎዚና ፓጫዳሳ፤
ኔ ፓጪዳ ጊዲኮካ
ታ ቦላ ኣይኮካ ዴማቤካ።
ታ ኢንጻርሳይ ኢታ ሃሳይቤና።
4 ታኒ ሃራ ኣሳ ማላ
ኢታ ቃላ ሃሳይኬ፤
ታኒ ኔ ኣዛዞ ናጊዛ ጊሻስ
ጌኔ ኦጌ ካላቤኬ።
5 ታ ቶሆቲ ኔ ኦጌፔ
ሃንዳሪሾንታ ማላ
ታ ታንጎይ ኔ ኦጌፔ
ካሬ ኬዚቤና።
6 ኣቤት ጾሳዉ! ታኒ ዎሲን
ኔኒ ሲዪዛ ጊሻስ
ታኒ ኔና ዎሳይስ፤
ኔ ሃይꬃ ታኮ ዛራዳ፥
ታኒ ኔስ ዮቲዛይሳ ሲያ።
7 ባንታ ሞርኬታፔ ባቃቲዛይታ
ኔ ኡሻቻ ኩሼዛን
ቆታዳ ኣሺዛይሶ!
ኔ ኪያቴꬃ ማላሊሲዛ
ኦጌራ ቆንጪሳ።
8 ኔ ኣይፌ ጪሮ ማላ ታና ናጋ፤
ኔ ቄፌታ ጊዶን ታና ቆታ።
9 ኡንኤꬂዛ ኢታታፔኔ
ዶዲ ኡቲዳ ዎልቃማ
ሞርኬታ ኩሼፔ
ኔ ታና ኣሻ።
10 ኢስታስ ቃꬌቲዛ ዎዚናይ ባዋ፤
ኦቶሮ ሃሳያ ሃሳዬቴስ።
11 ታኒ ቢዛሶ ኡባን
ኢስቲ ታና ዶዴቴስ፤
ታና ዱጌ ቢታን ኩንዲስ
ዬጋናስ ዴሬቄቴስ።
12 ኢስቲ ባንታስ ሚዛ ሚሽ
ኮይዛ ጋሞ ማላ፤
ዎይኮ ጌማን ዛማዲ ናጊዛ
ዎዳላ ጋሞ ማላ።
13 ኣቤት ጎዳዉ! ዴንዳ።
ታ ሞርኬታራ ኤቄታዳ
ኢስታ ሾጫ፤
ኔ ማሻን ኢታታፔ
ታና ኣሻ።
14 ኣቤት ጎዳዉ!
ሄሳ ማላ ኣሳታፔ
ታና ቆታ፤
ኢስታ ቃዳይ ሃ ሳኣ ዴኦ
ጻላ ጊዲዛ ኣሳፔ
ኔ ኩሼን ታና ኣሻ፤
ኔ ማዝጋባን ሚንጂዳ ቂጻቴፔ
ኢስታ ካልሳ፤
ኢስታ ናይታስ ዳሪዲ ቲርፖ፤
ኢስታ ናይታ ናይታስካ
ጊዲ ፓላሆ።
15 ጊዶ ኣቲን ታኒ ጺሎቴꬃን
ኔ ሲንꬃ ቤያና፤
ታኒ ቤጊዛ ዎዴ
ኔ ቦንቾ ቤኣዳ ኣላና።