ጌሻ ማጻፋ ዬꬃ ማጻፋ 18

ጎዳይ ሳኦሌ ኩሼፔኔ ኢዛ ሞርኬታ ኡባ ኩሼፔ ኣሺዳ ዎዴ ጎዳ ኣይሌ ዳዊቲ ዛማሬታ ካቦስ ጎዳ ጊሻስ ዬጺዳ ማዛሙሬ

(2ሳሜ 22፡1-51)

1 ኣቤት ጎዳዉ!

ኔ ታስ ዎልቃ ኢሚዳ ጊሻስ

ታ ኔና ሲቃይስ።

2 ጎዳይ ታስ ዛላ፤

ታኒ ኦላፔ ናጌቲዛ ሚጻ፤

ኢዚ ታና ኣሺዛይሳ፤

ታ ጾሳይ ታኒ ኢዛን

ጌሜታ ኣቲዛ ዎጋ ዛላ።

ኢዚ ታስ ጎንዳሌ፤

ኢዚ ታና ኣሺዛ ካጬ፤

ታስ ኢዚ ሚኖ ዜምፖ።

3 ጋላታይ ቤሲዛ ጎዳ

ታኒ ጼይጋይስ፤

ኢዚ ታ ሞርኬታፔ ታና ኣሼስ።

4 ሃይቆ ዎዶሮይ ታና ጩሊዴስ፤

ꬋይሲዛ ዲኦይ ታና ሚቲዴስ።

5 ዱፎ ዎዶሮይ ታና ቃቺዴስ፤

ሃይቆ ዎጺማዴይ

ታ ሲንꬃን ዋጼቲዴስ።

6 ታና ሜቶይ ኡንኢን

ጎዳ ጼይጋዲስ፤

«ታና ማዳ» ጋዳ

ታ ጾሳስ ዋሳዲስ፤

ኢዚ ባ ኬꬃን ዲሼ

ታ ጬንጉርሳ ሲዪዴስ፤

ታኒ ዋሲዳ ዋሶይ

ኢዛ ሃይꬃን ዎꬊዴስ።

7 ጾሲ ሃንቄቲዳ ጊሻስ

ቢታይ ቃጺዴስ፤

ዙማታ ጻጶይ ኮኮሪዴስ።

8 ኢዛ ሲꬌፔ

ሃንቆ ጩዋይ ጩዋቲዴስ፤

ኢዛ ዶናፔ

ሚዛ ታማ ላጮይ ኬዚዴስ፤

ኢዛ ዶናፔ

ጹጊዛ ቦንቆይ ፑልቲዴስ።

9 ሳሎ ጳልቂዲ ዎꬊዴስ፤

ሄ ዎዴ ኢዛ ቶሆ ጋርሳራ

ꬊፒ ጊዳ ሻራይ ዴስ።

10 ኪሩቤን ኡቲዲ ፓሊዴስ፤

ጫርኮ ቄፌ ኤኪዲ

ፑዴ ዴንዲ ቢዴስ።

11 ባና ꬉማን ካሚዴስ፤

ኢዛ ዱንካኔዛ ꬊፒ ጊዳ

ኢራራ ሻራይ ዶዲዴስ።

12 ኢዛ ሲንꬃን ዴኢዛ

ጊታ ፖኦዛፔ ሻቺኔ

ዎልቃንꬂ ኬኢዴስ፤

ꬊፒ ጊዳ ሻራካ

ካንꬂ ኬኢዴስ።

13 ጎዳይ ዳዳ ማላ

ሳሎፔ ጉሚዴስ፤

ኡባፌ ꬎቃ ጾሳይ

ባ ጬንጉርሳ ሲሲዴስ፤

ዎልቃንꬃኒኔ

ታማ ላጮን ቆንጪዴስ።

14 ባ ዎንዳፌዛ ዪሻ ዬዲዴስ፤

ባ ሞርኬታካ ላሊዴስ፤

ዎልቃንꬃ ፖኦ ኪቲዲ

ኢስታ ዬዴꬂዴስ።

15 ኣቤት ጎዳዉ!

ኔኒ ሴሪዳ ዎዴኔ

ኔ ሃንቆይ ኤጺዳ ዎዴ፥

ጊታ ኣባቲ

ኢቺዳ ቢታይ ቤቲዴስ፤

ቃሴ ሳኣ ዮቻይ ቆንጪዴስ።

16 ጎዳይ ቦላፌ ባ ኩሼዛ

ዱጌ ዬዲዲ ታና ኦይኪዴስ፤

ጪማ ሃꬃፌ ታና ኬሲዴስ።

17 ኢዚ ታ ቦላ ዎልቃቲዛ

ታ ሞርኬታፔ፥

ታና ኢጺዛይታፔ ኣሺዴስ።

18 ታና ሜቶይ ኡንኢዳ ጋላስ

ኢስቲ ታ ቦላ ዴንዲዳ፤

ጊዶ ኣቲን ጎዳይ

ታስ ዜምፖ ጊዲዴስ።

19 ኢዚ ታና ኣሆ ዴምባን ኬሲዴስ፤

ታናን ኡፋዬቲዳ ጊሻስ

ታና ኣሺዴስ።

20 ታ ጺሎቴꬃ ማላ

ጎዳይ ታስ ቃንጺዴስ፤

ታ ኩሼ ጌሻቴꬃ ማላ

ኢዚ ታስ ዛሪዴስ።

21 ታኒ ጎዳ ኦጌ ካላዲስ፤

ታኒ ታ ጾሳ ኣጋዳ

ኢታ ኦꬃቤኬ።

22 ታኒ ኢዛ ዎጋ ኡባ ናጋዲስ፤

ኢዛ ኣዛዞዛ ፖላናፔ

ጉዬ ጋቤኬ።

23 ታኒ ኢዛ ሲንꬃን ሱሬ ዴኣዲስ፤

ታናቴꬃ ናጋራፔ ናጋዲስ።

24 ሄሳ ጊሻስ

ጎዳይ ታስ

ታ ጺሎቴꬃ ማላ ኢሚዴስ፤

ታ ኩሼይ ኢዛ ሲንꬃን

ጌሽ ጊዲዳ ማላ ዛሪዴስ።

25 ኣቤት ጎዳዉ!

ኣማኔቲዛይታስ

ኔኒ ኣማኔታሳ፤

ሱሬታስ ኔኒ ሱሬ።

26 ጌሻታስካ ኔኒ ጌሻ፤

ጊዶ ኣቲን ጌላታስ ኔኒ ጌላ።

27 ኣሽኬታ ኔ ኣሻሳ፤

ጊዶ ኣቲን ኦቶራንቻታ

ካዉሻሳ።

28 ኣቤት ጎዳዉ!

ኔ ታስ ጾምፓሳ፤

ጾሳይ ኔኒ ታስ

ꬉማ ፖኢሳሳ።

29 ኔ ማዲን

ታኒ ታ ሞርኬታ ኦላይስ፤

ታ ጾሳ ዎልቃን ታኒ ኢስታ

ጊምቤ ቦላራ ጉፓ ኣꬋይስ።

30 ጾሳ ኦጌይ ሱሬ፤

ጎዳ ቃላይ ኣማኔቲዛይሳ፤

ኢዛኮ ባቃቲዛ ኡባታስ

ኢዚ ጎንዳሌ።

31 ጾሳፌ ኣቲን ሃራ ጾሲ ኦኔ?

ኑ ጎዳፔ ኣቲን ሃራ ዛላይ ኦኔ?

32 ታስ ዎልቃ ኢሚዛይኔ

ታ ኦጌ ሳሮ ኦꬂዛይ ጾሳ።

33 ኢዚ ታ ቶሆታ

ጌኔሳ ቶሆ ማላ ሚንꬄስ፤

ታና ꬎቃሶሆታን ሳሮቴꬃን ዎꬄስ።+

34 ኢዚ ታ ኩሼታ

ኦላ ታማርሴስ፤

ሄሳ ጊሻስ ታኒ ታ ቄሴን

ጻርቂማላ ዎንዳፌዛ

ዳፋዳ ዱካይስ።

35 ኣሺዛ ኔ ጎንዳሌ ታስ ኢማዳሳ።

ኔ ኡሻቻ ኩሼን ታና ዜምፒሳዳሳ፤

ታኮ ዚቂ ጋዳ ታና ጊታሳዳሳ።

36 ታ ኦጌ ኣሳዳሳ፤

ሄሳ ጊሻስ ታ ቶሆይ ሃንዳራሺቤና።

37 ታ ሞርኬታ ታኒ

ዬዴꬃ ኦይካዲስ፤

ታኒ ኢስታ ꬋይሳና ጋካናስ

ጉዬ ሲማቤኬ።

38 ኢስቲ ናምኣንꬆ

ዴንዶንታ ማላ ሾጫዲስ፤

ታ ቶሆ ጋርሳንካ ኩንዲዳ።

39 ኦላስ ታና ዎልቃ ጊጺሳዳሳ፤

ታ ሞርኬታ

ታ ሲንꬃን ጉልባቲሳዳሳ።

40 ታ ሞርኬታ ታ ሲንꬃፌ

ጉዬ ዛራ ባቃቲሳዳሳ፤

ታና ኢጺዛይታ ታኒ ꬋይሳዲስ።

41 ባንታና ማዳና ማላ ዋሲዳ፤

ጊዶ ኣቲን ኦኒኔ ኢስታ ኣሺቤና።

ጎዳ ኢስቲ ጼይጊዳ፤

ጊዶ ኣቲን ኢዚ ኢስታስ ኮዪቤና።

42 ጫርኮይ ፒቲዲ ኤፊዛ ጉዱላ ማላ

ታኒ ኢስታ ኦꬃዲስ፤

ኦጌን ዴኢዛ ኡርቃ ማላካ

ኢስታ ዬꬌታዲስ።

43 ማካላ ኣሳፔ ታና ኣሻዳሳ፤

ኔ ታና ካዎቴꬃታ ኣይሲዛዴ

ሂስታ ሹማዳሳ፤

ታ ኤሮንታ ዴሬይ

ታስ ሃሬቲዴስ።

44 ታና ኤሮንታ ኣላጋ ዴሬይ

ታስ ኣዛዜቴስ፤

ኢስቲ ታ ጎባቴꬃ ሲዪዲ

ታስ ዚጌቴስ።

45 ኢስቲ ያሻን ካሃ ꬋዬቴስ፤

ባንቲ ናጊዛ ሚጻፔ ኬዚዲ

ኮኮሪሼ ታኮ ዬቴስ።

46 ጎዳይ ዴኦ ጾሳ!

ታ ዜምፒዛ

ዎጋ ዛላይ ጋላቴቶ!

ታና ኣሺዳ ጾሳይ

ꬎቁ ꬎቁ ጎ!

47 ኢዚ ታ ሃሎ ኬሲዛ ጾሳ፤

ካዎቴꬃታ ታስ ሃሪሲዛ ጾሳ።

48 ታ ሞርኬታፔ ታና ኣሻሳ፤

ኣቤት ጎዳዉ!

ኔኒ ታ ሞርኬታ ቦላ

ታና ꬎቁ ꬎቁ ሂስታሳ፤

ማካላንቻ ኣሳታፔ

ኔኒ ታና ኣሻሳ።

49 ሄሳ ጊሻስ ታኒ ኔና

ካዎቴꬃታ ሲንꬃን ጋላታና፤

ታኒ ኔ ሱንꬃ ዬꬃን ሳባና። +

50 ጾሲ ባ ካዎꬂዳ ካዎስ

ጾኖ ቦላ ጾኖ ኢሜስ።

ባ ቲይዳይሳስ ኪያቴꬃ ቤሴስ፤

ዳዊቴሲኔ ኢዛ ዜሬꬃታስ

ሜርናስ ሄሳꬆ ኦꬄስ።