31
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጎዳዉ!
ኔ ታስ ኩዋ ጊዳና ማላ
ታ ኔኮ ያዲስ፤
ኣይዴካ ታና ዬላሶፓ፤
ኔ ጺሎቴꬃን ታና ኣሻ።
2 ኔ ሃይꬃ ታኮ ዛራ፤
ኤሶን ታና ኣሻ፤
ኔኒ ታና ጌንꬂዛ ዛላ ጊዳ፤
ታና ኣሺዛ ሚኖ ሚጻ
ታስ ጊዳ።
3 ኤ፥ ኔኒ ታስ ዛላ፤
ታ ኢዛን ጌላ ኣቲዛ ሚጻ፤
ኔ ሱንꬃ ጊሻስ
ታኒ ባና ኦጌ
ቤሳኔ ካሌꬃ።
4 ኔኒ ታስ ዜምፖ ጊዲዛ ጊሻስ፥
ኢስቲ ታስ ዋጺ ዎꬂዳ
ናርጻፌ ታና ኔ ናጋ።
5 ኣቤት ጎዳዉ ቱሙ ጾሳዉ!
ታኒ ታ ሼምፖ
ኔ ኩሼን ሃዳራ ኢማይስ፤
ኔኒ ታና ዎዛ።
6 ፓꬆንታ ኤቃታስ
ጎይኒዛይታ ታኒ ኢጻይስ፤
ታኒ ጊዲኮ ጎዳን ኣማኔታይስ።
7 ታ ሜቶ ኔኒ ቤኢዳ ጊሻሲኔ
ታ ቱጋ ኔኒ ኤሪዳ ጊሻስ
ታኒ ኔ ሲቆን ኡፋዬታይስ።
8 ኔኒ ታና ታ ሞርኬታስ
ኣꬃ ኢማቤካ፤
ታ ቶሆታካ
ኣሆ ሶሆን ኤሳዳሳ።
9 ኣቤት ጎዳዉ!
ታኒ ሜቶን ጌላዲስ፤
ታስ ቃꬌታ።
ታኒ ዳሮ ሚሼታዲስ፤
ታ ኣይፌይ፥ ታ ኣሾይኔ
ታ ሼምፖይ ዳቡርዴስ።
10 ታ ሼምፖያ ዋዬን ዳቡራዱስ፤
ታ ላይꬃይካ ጬጬን ዉሪዴስ።
ሜቶ ዳሮን
ታ ዎልቃይ ጪንጊዴስ፤
ታ ሜቄꬃቲካ
ጊዶን ሴሪዳ።
11 ታ ሞርኬታ ኡባስ
ታኒ ቂꬌ ሚሽ ጊዳዲስ፤
ታ ሾሮታስ ሚሬስ ኣታዲስ፤
ታና ኤሪዛይታስ ካꬌስ ጊዳዲስ፤
ኦጌን ታና ቤኢዳይቲካ
ታፔ ባቃቴቴስ።
12 ታኒ ሃይቂዳ ኣሳ ማላ ዶጌታዲስ፤
ሞሆ ኦቶ ማላ ጊዳዲስ።
13 ታኒ ዳሮቲ ሳሱኬቲሺን ሲያዲስ፤
ዳጋማይ ኡባሶራ ዴስ፤
ኢስቲ ታ ቦላ ጌኔን ዱላቴቴስ፤
ታና ዎꬋናዉካ
ማቄቴቴስ።
14 ጊዶ ኣቲን ጎዳዉ!
ታኒ ኔናን ኣማኔታዳ፥
«ኔኒ ታ ጾሳ» ጋይስ።
15 ታ ዴኦ ላይꬃይ
ኔ ኩሼና፤
ታና ጎዲዛ
ታ ሞርኬታ ኩሼፔ
ኔ ታና ኣሻ።
16 ኔ ኣይሌዛ ቦላ
ኔ ሲንꬃ ፖኢሳ፤
ኔ ማሮቴꬃን ታና ኣሻ።
17 ኣቤት ጎዳዉ!
ታኒ ኔና ጼይጋይስ፤
ታና ዬላሶፓ፤
ኢታቲ ጊዲኮ ዬላቴቶ፤
ዱጌ ዱፎን ጌሊዲ ሲርጲ ጌቶ።
18 ጺሎዛ ቦላ ኦቶሮን፥ ካꬌኒኔ
ጻላቴꬃን ሃሳይዛ ጊሻስ
ዎርዳንቻታ ዶና ዱዲሳ።
19 ኔናን ዜምፓናስ
ኔኮ ሺቂዳይታሲኔ
ኔስ ያዪዛይታስ
ኔኒ ኣሳ ሲንꬃን ኢስታስ
ኢማና ጋዳ ሚንጃ ዎꬂዳ
ኪያቴꬂ ኣይ ማላ ዳሮ!
20 ኔኒ ኢስታ ኔ ኬꬃን ጌንꬃዳ
ኣሳ ማቆፌ ኣሻሳ፤
ኔኒ ኢስታ ኔ ዲዛሶን ቆታዳ
ኢታ ኢንጻርሳፌ ናጋሳ።
21 ታኒ ሞርኬይ ዶዲ ኦይኪዳ
ካታማ ጊዶን ዲዛ ዎዴ
ኢዚ ማላሊሲዛ ባ ማሮቴꬅ
ታና ቤሲዳ ጊሻስ
ጎዳይ ጋላቴቶ።
22 ታኒ ዳጋማዳ፥
«ኔ ሲንꬃፌ ኪቻዲስ» ጋዲስ።
ጊዶ ኣቲን ታና ማዳና ማላ
ኔና ታ ጼይጊዳ ዎዴ
ታ ዋሶዛ ኔኒ ሲያዳሳ።
23 ኢንቴኖ ጾሳ ኣሳቶ!
ጎዳ ሲቂቴ።
ጎዳይ ኢዛን ኣማኔቲዛይታ
ናጌስ፤
ጊዶ ኣቲን ኦቶራንቻታስ
ኢስታስ ቤሲዛ ቂጻቴ ኢሜስ።
24 ኢንቴ ሂዶታ
ጎዳን ኦꬂዳይቶ!
ቤጊቴኔ ሚኒቴ።