32
ዳዊቲ ሃሳኣን ሺሺዳ ጊንጾ
1 ኢዛ ሞሮይ ኣቶ ጌቴቲዳይሲኔ
ኢዛ ናጋራይ
ካሜቲዳይ ኣንጄቲዳይሳ።
2 ጎዳይ ኢዛ ናጋራ
ቆዶንታዴይኔ
ኢዛ ቆፋን
ባሌꬆይ ባይንዳይ ኣንጄቲዳይሳ።
3 ታኒ ታ ናጋራ ፓጾንታ ዳሼ
ጋላስ ኩሜꬅ ጬጪን
ታ ኣሳቴꬃይ ዳቡርዴስ።
4 ጋላሲኔ ቃማ ኔ ኩሼይ
ታ ቦላ ዴጺዴስ፤
ሃꬂ ቦኔ ኣዋን ሚጪዛ ማላ
ታ ዎልቃይ ጪንጊ ዉሪዴስ።
5 ታኒ ታ ናጋራ ኔስ ፓጻዲስ፤
ታ ቆሂዳይሳ ኔፔ
ጌንꬃቤኬ፤
«ታ ሞሮዛ ጎዳስ
ፓጻና» ጋዲስ።
ሂስቲን ኔ ታ ናጋራ
ኡባ ኣቶ ጋዳሳ።
6 ሄሳ ጊሻስ ጺሎ ኣሲ
ኔኒ ቤቲዛ ዎዴ ኔና ዎሶ፤
ዲኦይ ኢዚ ዲዛ ሄራ
ሜጪ ኤፊኮካ ኢዛ ቦቼና።
7 ኔኒ ታስ ቆቴቲዛሶ፤
ኔኒ ታና ሜቶፔ ናጋሳ፤
ታና ጾኖ ዬꬃን
ኩንꬃዳሳ።
8 ጎዳይ፥ «ታኒ ኔና ታማርሳና፤
ኔኒ ባናስ ቤሲዛ ኦጌካ
ኔና ኤሪሳና፤
ታኒ ኔና ዞራናኔ ናጋና።
9 ቢጻላኒኔ ፑሎን ሃሬቲዛ
ኣኬካይ ባይንዳ ባቁሎ ማላ
ዎይኮ ፓራ ማላ
ኢንቴ ሃኖፒቴ» ጌስ።
10 ኢታታስ ቱጋይ ዳሮ፤
ጊዶ ኣቲን ጎዳን
ኣማኔቲዛይታ
ማሮቴꬂ ዶዴስ።
11 ኢንቴኖ ጺሎቶ!
ጎዳን ኡፋዬቲቴኔ
«ሃሹ!» ጊቴ፤
ኢንቴኖ ዎዚና ሱሬቶ!
ኡፋይሳን ኢሊሊቴ!