33
1 ኢንቴኖ ጺሎቶ! ጎዳን ኡፋዬቲቴ፤
ሱሬ ኣሳቲ ኡፋይሳን ኢሊሊቴ።
2 ማሲንቆ ሾጪሼ ጎዳ ጋላቲቴ፤
ታሙ ሻያን ዋጼቲዳ
ዲꬃን ኢዛስ ዬጺቴ።
3 ኦራꬃ ማዛሙሬ ኢዛስ ዬጺቴ፤
ዲꬃ ጊግሲ ሾጪቴ፤
ኡፋይሳን ኢሊሊ ጊቴ።
4 ጎዳ ቃላይ ቱማ፤
ኢዚ ኦꬂዛ ኦሶ
ኡባይ ኣማኔቲዛይሳ።
5 ጎዳይ ጺሎቴꬃኔ
ቱማ ፒርዳ ዶሴስ፤
ኢዛ ኪያቴꬂ ሳኣ ኩሚዴስ።
6 ሳሎቲ ጎዳ ቃላን ሜꬌቲዳ።
ኢዛ ዶናፔ ኬዚዛ ፔኖን
ሳሎን ዲዛ ሜꬌቴꬃቲ
ሜꬌቲዳ።
7 ጊታ ኣባ ሃꬃ
ኢዚ ኢሲሶን ሺሺዴስ፤
ጪማ ሃꬃ
ሚንጃሶን ኤሊሲዴስ።
8 ሳኣን ዲዛ ኣሲ ኡባይ
ጎዳስ ያዮ፤
ሳሎ ጉፋንꬆይ
ጎዳ ቦንቾ።
9 ኣይስ ጊኮ ኢዚ ሃሳዪን ሃንዴስ፤
ኢዚ ኣዛዚን ሚኒዲ ኤቂዴስ።
10 ጎዳይ ካዎቴꬃታ
ሃልቾ ላላና፤
ኢስታ ቆፋካ ሃዳ ኦꬃና።
11 ጎዳ ሃልቾይ
ሜርናስ ኤቂ ዳና፤
ኢዛ ዎዚና ቆፋይካ ዬሌታፔ
ዬሌታ ጋካናዉ ዳና።
12 ጾሲ ኢዛስ ጎዳ ጊዲዳ
ካዎቴꬃይ፥
ኢዚ ባስ ዶሪዳ ዴሬይ
ኣንጄቲዳ ዴሬ።
13 ጎዳይ ሳሎን ኡቲዲ ዱጌ ጼሌስ፤
ኣሳ ኡባካ ቤኤስ።
14 ጎዳይ ባ ኣራታን ኡቲዲ
ሳኣን ዴኢዛ ኡባ ጼሌስ።
15 ኢዚ ኡባ ዎዚና ሜꬊዴስ፤
ኢስቲ ኦꬂዛ ሚሽ ኡባ ኤሬስ።
16 ካዎይ ባ ዎታዳራ
ጮራቴꬃን ኣቴና፤
ኦላንቻይ ባ ዎልቃ
ሚኖቴꬃን ኬሲ ኤኬና።
17 ታኒ ፓራን ጾናና ጊ
ናጎይ ሃዳ፤
ኢዚ ባ ዎልቃ ሚኖቴꬃን
ኦናካ ኣሻናዉ
ዳንዳዬና።
18 ጎዳ ኣይፌቲ ኢዛስ ያዪዛይታኔ
ኢዛ ሜርና ሲቆ
ሂዶታ ኦꬂዛ ኣሳታ ጼሌስ።
19 ኢዚ ሄሳን ኢስታ ሃይቆፔ ኣሼስ፤
ኮሻ ዎዴካ ኢስታ
ሼምፖራ ፓጻ ዎꬄስ።
20 ኑ ሼምፖያ ጎዳ
ሂዶታ ኦꬃዉስ፤
ኢዚ ኑስ ማዶኔ ጎንዳሌ።
21 ኑኒ ጌሽ ጊዲዳ
ኢዛ ሱንꬃን ኣማኔቶስ፤
ኑ ዎዚናይካ ኢዛን ኡፋዬቴስ።
22 ኣቤት ጎዳዉ!
ኑኒ ኔናን
ሂዶታ ኦꬂዛይሳ ማላ
ሜርና ኔ ሲቆይ ኑናራ ጊዶ።