34
ካዎ ኣቢሜሌኬ ሲንꬃፌ ኣቲ ቢዳ ዎዴ ዳዊቲ ዬጺዳ ማዛሙሬ
1 ታኒ ጎዳ ኡባ ዎዴ ጋላታና፤
ኢዛ ጋላታይ ኣይ ዎዴንካ
ታ ዶናፔ ፓጬና።
2 ታኒ ጎዳን ጬቄታይስ፤
ናቄቲዳይቲ ሄሳ ሲዪዲ
ኡፋዬቴቶ።
3 ኣኔ ታናራ ኢሲፌ
ጎዳ ቦንቾስ፤
ኢዛ ሱንꬃካ
ꬎቁ ꬎቁ ኦꬆስ።
4 ታኒ ጎዳ ኮያዲስ፤
ኢዚካ ታስ ዛሪዴስ፤
ታኒ ያዪዛ ሚሽ ኡባፌ
ታና ኣሺዴስ።
5 ኢዛኮ ጼሊዛ ኡባ
ሲንꬃይ ፖኤስ፤
ኢስቲ ሙሌካ ዬላቴቴና።
6 ሃ ሂዬሳይ ዋሲዴስ፤
ጎዳይ ኢዛ ዋሶዛ ሲዪዴስ፤
ሜቶ ኡባፌ ኢዛ ኣሺዴስ።
7 ጎዳ ኪታንቻይ
ጎዳስ ያዪዛይታ ናጌስ፤
ኢዚ ኢስታ ዩሾዛን ጊዲዲ
ኢስታ ኣሼስ።
8 ጎዳይ ኪያ ጊዲዳይሳ
ዩሺ ቆፒቴ፤
ኢዛኮ ሺቂዳይ ኣንጄቲዳዴ።
9 ኢንቴኖ ጌሻ ኣሳቶ!
ጎዳስ ያዪቴ፤
ኣይስ ጊኮ ኢዛስ ያዪዛ ኡባታስ
ኣይኮይካ ፓጬና።
10 ጋሞቲ ሚዛዚ ꬋዪን
ኮሻቴቴስ፤
ጎዳ ኮይዛይታስ ጊዲኮ
ሎኦ ሚሺ
ኣይኮካ ፓጬና።
11 ናይቶ! ሃ ዪቴ፤
ታ ጊዛዝ ሲዪቴ፤
ታኒ ኢንቴና
ጎዳስ ያሻቴꬅ
ታማርሳና።
12 ኣዱሳ ላይꬅ ዳናስ ዶሲዛይኔ
ሎኦ ሚሽ ቤያናስ
ኮይዛይ ኦኔ?
13 ኔ ኢንጻርሳ
ኢታ ሃሳዮንታ ማላ ናጋ፤
ኔ ዶናፔ ዎርዶይ
ኬዞንታ ማላ ናጌታ።
14 ኢታፔ ሻኬታ፤
ሎኦ ሚሽ ኦꬃ፤
ሳሮቴꬅ ኮያዳ ካላ።
15 ጎዳ ኣይፌይ ጺሎታኮ ጼሌስ፤
ቃሴ ኢዛ ሃይꬂ
ኢስታ ዎሳ ኤዝጌስ።
16 ኢስታ ሃሳኢሲዛ ሚሽ
ቢታፌ ꬋይሳና ማላ፥
ጎዳይ ኢታ ኦꬂዛይታ
ባ ሃንቆ ኣይፌን ጼሌስ።
17 ጺሎቲ ዋሴቴስ፤
ጎዳይ ኢስታ ዋሶ ሲዬስ፤
ኢዚካ ኢስታ ሜቶ
ኡባፌ ኣሼስ።
18 ጎዳይ ዎዚናይ ሜቂዳይታስ
ማታን ዴስ፤
ቃሴ ሂዶታ ቃንጺዳይታካ
ኣሼስ።
19 ጺሎ ኣስ ጋኪዛ ሜቶይ ዳሮ፤
ጊዶ ኣቲን ጎዳይ
ኢዛ ሄ ኡባፌ ኣሼስ።
20 ጎዳይ ኢዛ ሚንꬂ ናጌስ፤
ኢዛ ሜቄꬃታፔ
ኢሶይካ ሜቄና።
21 ኢታታ ኢስታ ኢታቴꬂ ዎꬋና፤
ጺሎታ ኢጺዛይቲ ፒርዴታና።
22 ጎዳይ ባ ኦሳንቻታ ኣሼስ፤
ኢዛኮ ባቃቲዳ ኦኒኔ
ፒርዴቴና።