37
ዳዊቴ ዬꬃ
1 ኢታ ኦꬂዛይታ
ቤኣዳ ዪሎቶፓ፤
ናጋራ ኦꬂዛይታ ቃናቶፓ።
2 ኣይስ ጊኮ ኢስቲ
ማታ ማላ ኤሶን ሜላና፤
ቦንጮ ማላ
ኢስቲ ሹሊዲ ቆካና።
3 ኔኒ ጎዳን ኣማኔታ፤
ሎኦ ኦሶካ ኦꬃ፤
ሂስቲኮ ኔኒ ቢታ ቦላ
ፓላሂን ዳና።
4 ጎዳን ኡፋዬታ፤
ኢዚ ኔስ
ኔ ዎዚና ኣሞ ኢማና።
5 ኔ ኦጌ ጎዳስ ሃዳራ ኢማ፤
ኢዛን ኣማኔታ፤
ኢዚካ ኔስ ኦꬃና።
6 ኢዚ ኔ ጺሎቴꬃ
ማላዶ ጻልቄ ማላ ኬሳና፤
ኔ ዮኦዛ ፒርዳካ
ሴታ ጋላሳ ኣዋ ማላ
ፖኢሳና።
7 ጎዳ ሲንꬃን ጮኡ ጋዳ
ኢዚ ኦꬃና ጋካናስ
ዳንዳያን ናጋ፤
ኢታ ኣሳቲ ዱሬቲኮኔ
ኢስታ ቆፋይ ፖሌቲኮ
ኔ ኢስታ ቦላ ዪሎቶፓ።
8 ሃንቆ ኣጋ፤
ዪሎፌ ባቃታ።
ዪሎቶፓ፤ ኣይስ ጊኮ
ሄሲ ኣስ ሜቶን ዬጌስ።
9 ኢታ ኦꬂዛይቲ
ꬎቃሌቲ ꬋያና፤
ጊዶ ኣቲን ጎዳን
ሂዶታ ኦꬂዛይቲ
ቢታ ላታና።
10 ኢታ ኦꬂዛይቲ
ጉꬃ ዎዴፔ
ጉዬ ዴኤቴና፤
ኔኒ ኢስታ ኮዪዳኮካ
ኢስቲ ቤቴቴና።
11 ጊዶ ኣቲን ኣሽኬቲ ቢታ ላታና፤
ኢስቲ ጊታ ሳሮቴꬃን
ኡፋዬቲ ዳና።
12 ኢታ ኣሳቲ
ጺሎታ ቦላ ማቄቴቴሲኔ
ባ ኣች ጋርጬቴስ።
13 ጊዶ ኣቲን ጎዳይ
ኢታታ ቦላን ሚጬስ፤
ኣይስ ጊኮ ኢስቲ ꬋያና ጋላሳይ
ጋኪዳይሳ ኢዚ ኤሬስ።
14 ኢታ ኣሳቲ ሂዬሳታኔ
ሜቶታንቻታ ꬋይሳናዉ፥
ሱሬቴꬃን ሄሜቲዛይታ
ዎꬋናዉ ባንታ ማሻ
ሾዴቴሲኔ
ባንታ ዎንዳፌዛ ዳፌቴስ።
15 ጊዶ ኣቲን ኢስታ ማሻይ
ኢስታስ ዎዚና ኣይፌን ጌላና፤
ኢስታ ዎንዳፌይካ ሜቃና።
16 ጺሎስ ዴኢዛ ጉꬃይ
ኢታ ኣሳታስ ዲዛ
ዳሮ ኣቆታፔ ኣꬌስ።
17 ኣይስ ጊኮ
ኢታታ ዎልቃይ ሜቃና፤
ጺሎታ ጊዲኮ
ጎዳይ ሚንꬄꬄስ።
18 ጎዳይ ሱሬ ኣሳታ
ኡባ ጋላስ ናጌስ፤
ኢስታ ላታይካ
ሜርናስ ኢስታስ ጊዳና።
19 ኢታ ዎዴን
ሱሬ ኣሳቲ ዬላቴቴና፤
ኮሻ ላይꬅ ኢስቲ ካሊ ማና።
20 ኢታ ኣሳቲ ጊዲኮ ሃይቃና፤
ጎዳ ሞርኬቲ
ባዞ ጪሻ ማላ ቆካና፤
ጩዋ ማላካ ጮ ꬋያና።
21 ኢታ ኣሲ ታልኢ ኤኪዲ
ዛሪ ኤሬና፤
ጊዶ ኣቲን ጺሎ ኣሲ
ቃꬌቲዲ ጌዴ ኢሜስ።
22 ጎዳን ኣንጄቲዳይቲ
ቢታ ላታና፤
ጊዶ ኣቲን ኢዚ ቃንጊዳይቲ
ጮ ꬋያና።
23 ኣሳ ኦጌይ ጎዳ ኡፋይሲኮ
ጎዳይ ኢዛዴ
ታንጎ ካሌꬄሲኔ ሚንꬄስ።
24 ኢዚ ꬉጴቲኮካ ኩንዶንታ ማላ
ጎዳይ ባ ኩሼን
ኦይኪ ኣሼስ።
25 ታኒ ካሴ ዬላጋ ሺን
ሃኢ ጪማዲስ፤
ጊዶ ኣቲን ጺሎ ኣሲ
ጮ ዬጌቲ ኣቲሺን፥
ዎይኮ ኢዛ ዜሬꬂ
ካꬅ ዎሲ ሚሺን
ታኒ ሙሌካ ቤኣ ኤሪኬ።
26 ኢዚ ኡባ ዎዴካ ኪያቴꬅ ኢሜስ፤
ዲቺ ባይንዳ ታልኤስ፤
ኢዛ ዛሬቲካ ኣንጆስ ጊዳና።
27 ኢታፔ ሃካ፤ ሎኦ ሚሽ ኦꬃ።
ሂስቲኮ ኔ ኣዱሳ ላይꬅ ዴኣና።
28 ኣይስ ጊኮ ጎዳይ ጺሎቴꬅ ዶሴስ።
ጾሳይ ባስ ኣማኔቲዳ
ኣሳታ ዬጌና፤
ኢዚ ኢስታ ሜርናስካ ናጋና።
ጊዶ ኣቲን
ኢታታ ዜሬꬃቲ ꬎማና።
29 ጺሎቲ ቢታዮ ላታና፤
ኢዚን ሜርናስ ዴኣና።
30 ጺሎ ኣሳ ዶናይ
ኣꬎ ኤራቴꬅ ዮቴስ፤
ኢዛ ኢንጻርሲካ ጺሎ ሃሳዬስ።
31 ኢዛ ጾሳ ዎጋይ ኢዛ ዎዚናን ዴስ፤
ኢዛ ቶሆይካ ሃርቼና።
32 ኢታ ኣሲ ጺሎ ኣስ
ኢታ ኣይፌን ጼሌሲኔ
ዎꬋናዉካ ኮዪ ካሌስ።
33 ጊዶ ኣቲን ጎዳይ ጺሎ ኣስ
ኢዛ ኩሼን ዬጌና፤
ፒርዳስ ኤቂዛ ዎዴካ
ኢዛ ኣꬂ ኢሜና።
34 ጎዳ ሂዶታ ኦꬃ፤
ኢዛ ኣዛዞካ ናጋ፤
ኢዚ ኔና ቢታ ላቲሳና፤
ዛሪዲካ ቦንቻና፤
ኢታ ኣሳቲ ꬎሚ ꬋይሺን
ኔ ቤያና።
35 ታኒ ኢሲ ሜንጼ ኢታ ኣሲ
ዎላ ማላ ዳዪዳይሳ ቤያዲስ።
36 ጊዶ ኣቲን ታኒ ሄ ሶሆራ
ሲማዳ ካንꬂዛ ዎዴ
ኢዚ ꬋይዴስ፤
ታ ኮዪንካ ኢዚ ቤቲቤና።
37 ኣኔ ሎኦ ኣስ ኣኬካ፤
ሱሬ ኣስ ቤኣ፤
ሳሮ ኣሳስ ዉርሴꬂ ሎኦ ጊዳና።
38 ጊዶ ኣቲን ናጋራንቻቲ
ሙሌራ ꬋያና፤
ኢስቲ ዉርሴꬃን ꬎማና።
39 ጺሎታስ ኣቶቴꬂ ጎዳፔ ዬስ፤
ሜቶ ዎዴ ኢዚ ኢስታስ ጌሚዛሶ።
40 ጺሎቲ ጎዳ ጉዬ ኣꬊዳ፤
ሄሳ ጊሻስ ኢዚ ኢስታ
ማዴሲኔ ኣሼስ፤
ኢታታ ኩሼፔካ
ዎꬂ ኤኬስ።