38
ሃሳኢሶስ ዳዊቲ ዬጺዳ ማዛሙሬ
1 ኣቤት ጎዳዉ!
ኔ ሃንቆን ታና ሴሮፓ፤
ኔ ዪሎን ታና ሙሮፓ።
2 ኔ ዎንዳፌ ዪሺ ታና ጫዲዴስ፤
ኔ ኩሼይካ
ታና ናቂ ኦይኪዴስ።
3 ኔ ሃንቆፌ ዴንዲዳይሳን
ታ ቦላይ ፓዬና፤
ታ ናጋራ ጋሶን
ታ ኣሳቴꬃይ ፓፓቲዴስ።
4 ታ ቆሆይ ታና ሚቲዴስ፤
ዴጾ ቶሆ ማላ
ታና ናቂ ኦይኪዴስ።
5 ታኒ ኤያቴꬃን ኦꬂዳ
ናጋራ ጋሶን
ታ ማዱንꬃይ ጺንቂዴስ።
6 ታኒ ሆካዲሲኔ ቁናዲስ።
ጋላስ ኩሜꬅ
ዬካሼ ፔኣዲስ።
7 ታ ኣሾይ ታማ ሚሻ ማላ
ጹጌስ፤
ታ ቦላይካ ፓዬና።
8 ታኒ ኢጼታዲሲኔ ኒፊፊ ጋዲስ፤
ታ ዎዚናይ
ጬጪዳ ጊሻስ ዋሳይስ።
9 ኣቤት ጎዳዉ!
ታ ኣሞ ኡባ ኔ ኤራሳ፤
ታኒ ጬጪዛይሲ
ኔፔ ጌሚቤና።
10 ታስ ዎዚና ኣይፌን ጉፔስ፤
ታ ዎልቃይ ጪንጊዴስ፤
ታ ኣይፌፔ ፖኦይ ኪቺዴስ።
11 ታ ማዱንꬃ ጋሶን
ታ ሾሮቲኔ ታ ላጌቲካ
ታፔ ባቃቲዳ፤
ታ ዳቦቲካ ታፔ ሃኪዳ።
12 ታና ዎꬋናዉ ኮይዛይቲ
ባንታ ናርጻ ታና ኦይካና ዎꬂዳ፤
ታና ቆሃናዉ ኮይዛይቲ፥
«ናጋሻ፤ ኑኒ ኔና
ዴማና» ጊዲ
ታ ቦላ ማንዲዳ፤
ጋላስ ኩሜꬅ ታ ቦላ
ጌኔን ዱላቲዳ።
13 ሄ ዎዴ ታኒ ሲዮንታ
ቱሌ ኣሳ ማላ ጊዳዲስ፤
ዶናካ ፖጎንታ
ዱዴ ኣሳ ማላ ጊዳዲስ።
14 ቱማፔ ታኒ ሃይꬂ ሲዮንታ
ኣሳ ማላኔ
ዶናይ ሃሳዮንታ
ኣሳ ማላ ጊዳዲስ።
15 ጊዶ ኣቲን ኣቤት ጎዳዉ!
ታኒ ኔናን ሂዶታ ኦꬃይስ፤
ኣቤት ታ ጎዳዉ!
ኔኒ ታስ ዛሮ ኢማ።
16 ታኒ ጎዳ፥
«ታ ቶሆይ ሃንዳራሺን፥
ታ ሞርኬቲ፥ ‹ኢዛስ ሃሹ›
ጋና ማላኔ
ታ ቦላ ጬቄታና ማላ
ኦꬆፋ» ጋዳ ዎሳይስ።
17 ታኒ ኩንዳና ማታዲስ፤
ታ ሳኮይካ ፓጾንታ ኢጺዴስ።
18 ታ ናጋራይ ታና ሜቲዴስ፤
ሄሳ ጊሻስ ታ ቆሆ
ታ ኔስ ፓጻይስ።
19 ታ ሞርኬቲ ጊታኔ ዎልቃማ፤
ታና ጮ ኢጺዛይቲ ጮራ።
20 ታኒ ሎኦ ኦሶ ኦꬂን
ታስ ኢታ ዛሪዛይቲ
ታኒ ሎኦ ካሊዛ ጊሻስ
ታናራ ኤቄቴቴስ።
21 ኣቤት ጎዳዉ!
ኔ ታና ዬጎፋ፤
ኣቤት ጾሳዉ
ታፔ ኔኒ ሃኮፋ።
22 ኣቤት ታና ኣሺዛ ጎዳዉ!
ታና ማዳናስ ኤሶታ።