62
ዳዊቲ ዛማሬታ ካቦ ኤዶታኔስ ዬጺዳ ማዛሙሬ
1 ታ ሼምፖያ ጾሳን ጻላ
ሼምፖ ዴማዉስ፤
ታስ ኣቶቴꬂ ኢዛፔ ዬስ።
2 ኢዚ ጻላ ታስ ዛላኔ
ታና ኣሺዛይሳ፤
ታ ቆቴታ ኣቲዛሶ ጊዲዳ ጊሻስ
ሙሌካ ሂርጊኬ።
3 ጪሚዲ ኩንዳና ማቲዳ
ጎዳ ማላኔ
ሙሲዳ ላሻ ማላ
ዎልቃይ ባይንዳ ኣስ
ꬋይሳናዉ ሱጊሼ
ኣዉዴ ጋካናስ ዴኣንዴቲ?
4 ኢስቲ ኢዛ ቦንቾ ሶሆፔ
ካዉሻናስ ጻላ ኮዬቴስ፤
ኢስቲ ዎርዶን ኡፋዬቴቴስ፤
ባንታ ዶናን ኣንጄቴስ፤
ጊዶ ኣቲን
ባንታ ዎዚናን ቃንጌቴስ።
5 ታ ሼምፖዬ!
ዎፑ ጋዳ ጾሳ ጻላ ናጋ፤
ታስ ሂዶታይ ኢዛፔ ያና።
6 ኢዚ ጻላ ታስ ዛላኔ
ታና ኣሺዛይሳ፤
ታ ቆቴታ ኣቲዛሶ ጊዲዳ ጊሻስ
ሙሌካ ሂርጊኬ።
7 ታስ ኣቶቴꬂኔ
ቦንቾይ ቤቲዳይ ጾሳፌ፤
ኢዚ ታ ቆቴታ ኣቲዛሶኔ
ታስ ሚኖ ዛላ።
8 ኣሶ! ኡባ ዎዴ
ጾሳን ኣማኔቲቴ፤
ኢዚ ኑስ
ቆቴቲ ኣቲዛሶ ጊዲዳ ጊሻስ
ኢንቴ ዎዚና ቆፋ ኢዛስ ዮቲቴ።
9 ቦንቾሶፔ
ዬሌቴꬂ ማዴና፤
ካꬌቲዳሶፔ ዬሌቴꬂካ
ኡባይ ሃዳ።
ኢስቲ ሜዛኔ ዴንꬆንታ
ጫርኮ ማላ፤
ኢስቲ ኢሲ ቦላ
ጫርኮ ማላ ካዉሻ።
10 ቦንቃን ኣማኔቶፍቴ፤
ካይሲ ሺሺዳ ዱሬቴꬃን
ሂዶታ ኦꬆፍቴ።
ኢንቴስ ዱሬቴꬂ ዳሪኮካ
ኢንቴ ዎዚና ኢዛ ቦላ ዎꬆፍቴ።
11 ጾሳይ ኢሲቶ ሃሳይዴስ፤
ታኒ ናምኡ ዮኦታ ሲያዲስ፤
ሄይቲካ፥ «ዎልቃይ ጾሳሳ፤
12 ሜርና ሲቆይ ጾሳሳ።»
ኣቤት ጎዳዉ!
ኔኒ ኣስ ኡባስ
ኢዛ ኦሶ ኦሶ ማላ ኢማና።