63
ዩሁዳ ባዞን ዲዛ ዎዴ ዳዊቴ ማዛሙሬ
1 ኣቤት ጾሳዉ!
ኔኒ ታ ጾሳ፤
ታ ኔና ዎዚናፔ ኮያይስ፤
ታ ኣሾይካ ኔና ኣሞቴስ።
ሃꬂ ባይንዳ ሜላ ቢታይ
ሃꬅ ኮይዛ ማላ ታ ኣሳቴꬃይ
ኔና ሳሜቴስ።
2 ታኒ ኔና ጌሻሶሆን ጼላዲስ፤
ኔ ዎልቃኔ ኔ ቦንቾ
ታኒ ቤኣዲስ።
3 ኔ ሜርና ሲቆይ ዴኦፔ ሎኤስ፤
ታ ኢንጻርሳይ ኔና ጋላቴስ።
4 ታ ዴኦ ላይꬃንካ
ታኒ ኔና ጋላታና፤
ኔ ሱንꬃን ታ ኩሼ
ፑዴ ኔኮ ዴንꬃና።
5 ኣሲ ሎኦ ካꬅ ሚ ካሊዲ
ኡፋዬቲዛ ማላ
ታ ሼምፖያ ኔናን ኡፋዬታና፤
ታኒ ታ ኢንጻርሳን ኡፋይሳ ዬꬃን
ኔና ጋላታና።
6 ታኒ ታ ሂጻን ዳሼ
ኔና ሃሳኣይስ፤
ኦማርስ ኩሜꬅ
ኔ ኦሶ ዩሻ ቆፓይስ፤
7 ኔኒ ታና ማዲዛ ጊሻስ
ታኒ ኔ ቄፌ ኩዋን ኡታዳ
ኡፋይሳን ዬጻይስ።
8 ታ ሼምፖያ ሺጵ ጋ ካላዱስ፤
ኔ ኡሻቻ ኩሼይካ
ታና ሚንꬂ ኦይኪዴስ።
9 ጊዶ ኣቲን ታና ዎꬋና ኮይዛይቲ
ቢታ ጋርሳን ጪማ ኦላን
ሞጌታና።
10 ኢስቲ ማሻስ ኣꬊ ኢሜታና፤
ኢስቲ ጎዳሬ ካዎ ጊዳና።
11 ጊዶ ኣቲን ካዎይ
ጾሳን ኡፋዬታና፤
ጾሳ ሱንꬃን ጫቂዛ ኡባይ
ኢዛ ጋላታና፤
ዎርዶ ሃሳይዛይታ
ዶናይ ጊዲኮ ጎርዴታና።