68
ዳዊቲ ዛማሬታ ካቦስ ዬጺዳ ማዛሙሬ
1 ጾሲ ዴንዶ፤
ኢዛ ሞርኬቲ ላሌቴቶ፤
ኢዛ ኢጺዛይቲ
ኢዛ ሲንꬃፌ ባቃቴቶ።
2 ጩዋይ ጫርኮን ላሌቲዛ ማላ
ኔኒ ኢስታ ላላ፤
ሙቃዳይ ታማን ሴሪዛ ማላ፥
ኢታቲ ጾሳ ሲንꬃፌ
ሴሪ ꬋዬቶ።
3 ጺሎቲ ጊዲኮ ኡፋዬቴቶ፤
ጾሳ ሲንꬃን
ኡፋይሳን ሆምቦጬቶ፤
ቃሴካ ማጉሌቶ።
4 ጾሳስ ዬጺቴ፤
ኢዛ ሱንꬃስ ጋላታ ማዛሙሬ ዬጺቴ።
ሻራ ቦላራ ሄሜቲዛይሳ
ꬎቁ ꬎቁ ሂስቲቴ፤
ኢዛስ ሱንꬃይ ጎዳ፤
ኢንቴካ ኢዛ ሲንꬃን
ኬሂ ኡፋዬቲቴ።
5 ጾሲ ባ ጌሻሶሆን ዲሼ
ኣዋይ ባይንዳይታስ ኣዋ፤
ቃሴ ኣምኤታስካ ፒርዲዛ ዳና።
6 ጾሲ ባርካ ዲዛ ቢዛታስ
ሶ ኣስ ኢሜስ፤
ቃሾ ኬꬃን ዲዛይታ ቢርሺዲ
ኢስታ ኢሻሎን ዎꬄስ።
ማካላንቻቲ ጊዲኮ
ሱሊዛ ባዞን ዴኣና።
7 ኣቤት ጾሳዉ!
ኔኒ ኔ ኣሳ ካሌꬂዳ ዎዴ፥
ኔኒ ኢስታራ ባዞ
ካንꬂዳ ዎዴ፥
8 ሲና ጾሳ ሲንꬃን፥
ኢስራኤሌ ጾሳ ሲንꬃን
ቢታይ ቃጺዴስ፤
ሳሎቲ ኢራ ዱጌ ቲጊዳ።
9 ኣቤት ጾሳዉ!
ኔኒ ኮሺዛ ኬና
ኢራ ኢማዳሳ፤
ላዳ ቢታካ ኣራዲሳዳሳ።
10 ኔ ዴሬዚካ ኢዞ
ባስ ዱሳሶ ሂስቲዳ፤
ኣቤት ጾሳዉ!
ማንቆታስ ኮሺዛዝ
ኔኒ ኪያቴꬃን ኢማዳሳ።
11 ጎዳይ ቃላ ዬዲዴስ፤
ሄ ኪታ ዳሮ ማጫሳቲ
ዴራስ ኣዋጂዳ።
12 ኢስቲ፥ «ካዎቲ ባ ኦላንቻታራ
ዲኦ ጊሼቲ ኤኪዳ።
13 ዶርሳታ ናጋናስ ጉዬን ኣቲዳይቲ
ቢራፔ ኦሴቲዳ ቄፌቲ ቦላራ
ጾልቂዛ ዎርቃን
ቲዬቲዳ ሃራጴ
ሚስሌ ዴሚዳ» ጊዳ።
14 ኡባ ዳንዳይዛ ጾሳይ
ካዎታ ላሊዳ ዎዴ፥
ጻልሞኔ ዙማ ቦላ
ሻች ቡኪሲዴስ።
15 ባሳኔ ዙማቲ
ዎጋ ጊታ ዙማታ፤
ባሳኔ ዙማታ ቦላ
ዳሮ ፖጎኖቲ ዴቴስ።
16 ዳሮ ፖጎኖቲ ዴኢዛ ዙማቶ!
ጾሲ ዳናስ ዶሪዳ ዙማዛ
ኢንቴ ኣይስ ሚቃይኔን ጼሌቲ?
ጎዳይ ኢዛን ሜርናስ ዴኣና።
17 ጾሳ ፓራ-ጋሬቲ
ዳሮ ሺያን ቆዴቲዛይታ፤
ጎዳይ ሲና ዙማፔ
ባ ጌሻሶሆ ዪዴስ።
18 ጎዳዉ! ዲኦ ኤካዳ
ፑዴ ኔ ዱሳስ ኬዛዳሳ፤
ኣሳ ኡባፌ ኢሞታ ኤካዳሳ፤
ሃራይ ኣቶሺን
ማካላንቻታፔካ
ኤካዳሳ፤
19 ሃች ሃች ኑ ቶሆ
ቶኪዛ ጎዳይ፥
ኑና ኣሺዛ
ኑ ጾሳይ ጋላቴቶ።
20 ቤኢቴ! ኑ ጾሲ ኣሺዛ ጾሳ!
ሃይቆፔ ኣታና ዳንዳዬቲዛይ
ጎዳይ ኣሺና።
21 ጾሲ ቱማፔ ባ ሞርኬታ
ሁኤ ኪንቻና፤
ናጋራ ኦጌን ሄሜቲዛ
ጎፋራንቻታ
ሁኤ ቆኤሬꬃና።
22 ጎዳይ፥ «ታኒ ኢንቴ ሞርኬታ
ባሳኔፔ ዛራዳ ኤሃና፤
ታኒ ኢስታ ጪማ ኣባ ጊዶፌ
ኬሳዳ ጉዬ ዛራና።
23 ኔኒ ኔ ሞርኬታ ሱꬅ
ዬꬋ ኣꬋና፤
ኔ ካናቲካ ሞርኬታ ሱꬃፌ
ባንታ ጊሻ ላጫና» ጊዴስ።
24 ኣቤት ጾሳዉ! ኔ ጾኖ ጪፍራይ
ኡባን ቤቴስ፤
ታ ጾሳኔ ታ ካዎይ ኣዣባን
ባ ጌሻ ሶ
ጌልꬂሼ ቆንጬስ።
25 ዬጺዛይቲ ሲንꬃን፥
ቃሴ ካራቤ ባቂዛ
ጌላኦቲ ጊዶን፥
ዲጺዛይቲ ጉዬን
ኣዣቢ ቤቴቴስ።
26 ኢስቲ፥ «ጾሳ ኩሜꬃ
ሺቆን ጋላቲቴ፤
ኢንቴኖ ኢስራኤሌ ዜሬꬃቶ
ጎዳ ጋላቲቴ» ጌቴስ።
27 ሄ ጪፍራን ኡባፌ ካሎቲዛ
ቢኒያሜ ዛሬቲ ካሌꬄቴስ።
ካሊዲ ዩሁዳ ዳናቲ
ባንታ ቡቴን ቡቴን ቤቴስ፤
ዉርሴꬃን ዛቢሎኔ
ዳናቲኔ
ኒፍታሌሜ ዳናቲ ካሌቴስ።
28 ኣቤት ጾሳዉ!
ኔ ዎልቃ ቆንጪሳ።
ሃይሳፌ ካሴ ኔ ኑስ
ኦꬂዳይሳꬆ
ሃኢካ ኔ ሚኖቴꬅ ኑና ቤሳ።
29 ዬሩሳላሜን ዲዛ
ኔ ኬꬃ ጊሻስ
ካዎቲ ኢሞታ
ኔስ ኤኪ ያና።
30 ማቃ ጊዶን ዲዛ ዶኣታ
ኔኒ ሴራ።
ቦራታኔ ማራታ
ዉዴ ሚሳቲዛ
ካዎታ ኔኒ ላላ፤
ኢስቲ ጉልባቲዲ ባንታ ቢራ
ኔስ ጊራና ማላ ኦꬃ፤
ኦሌታናስ ዬሞቲዛ
ኣሳታ ላላ።
31 ጊታ ኣሳቲ ጊብጼፔ ያና፤
ቶጵያይ ባ ኩሼ
ጾሳኮ ሚጫና።
32 ኢንቴኖ ሳኣ ካዎቴꬃቶ!
ጾሳስ ዬጺቴ፤
ጎዳስ ጋላታ ማዛሙሬ ሺሺቴ።
33 ቤኒሶፔ ዶሚዲ ዲዛ
ሳሎታፔ ቦላራ
ቢዛይሳስ ዬጺቴ፤
ኢዚ ባ ዎልቃማ ጬንጉርሳ
ጉንꬃን ዮቲሺን ኤዝጊ ሲዪቴ።
34 ኢዛ ቴማይ ኢስራኤሌ ቦላና፤
ኢዛ ዎልቃይካ ሳሎና።
ሄሳ ጊሻስ
ጾሳ ዎልቃ ኣዋጂቴ።
35 ኣቤት ጾሳዉ!
ኔኒ ኔ ኬꬃፌ
ቆንጫሼ ማላሊሳሳ፤
ኢስራኤሌ ጾሳይ
ባ ዴራስ ሚኖቴꬂኔ
ዎልቃ ኢሜስ።
ጾሲ ጋላቴቶ።