69
ዳዊቲ ዛማሬታ ካቦስ ጪሻታ ጊጊሶ ጌቴቲዛ ዋጻን ዬጺዳ ማዛሙሬ
1 ኣቤት ጾሳዉ!
ሃꬃ ኪጻይ ታስ
ቆꬌ ጋኪዳ ጊሻስ
ኔ ታና ኣሻ።
2 ቶሆይ ኤቂዛሶይ ባይንዳ
ጫሬን ሚቴታዲስ፤
ጪማ ሃꬃ ጊዶ ጌላዲስ፤
ሃꬃ ዳምባላይ
ታና ሚታና ሃኔስ።
3 ታኒ ማዶ ዴማናስ
ዋሳሼ ዳቡራዲስ፤
ታስ ቆꬌ ፖራንዴይካ
ሜሊዴስ።
ታ ጾሳ ናጎን ዲሺን
ታ ኣይፌይ ባልጁሚዴስ።
4 ታና ሜላ ጮ ኢጺዛይቲ
ታ ሁኤ ቢናናፔ ዳሮ።
ዎርዶራ ታና ሞርኪዛይቲኔ
ታና ꬋይሳናዉ
ኮይዛይቲ ዳሪዳ።
ታ ካይሳ ኤኮንታ ሚሽ
ታና ቃንጻ ጊዳ።
5 ኣቤት ጾሳዉ!
ታ ኤያቴꬃ ኔኒ ኤራሳ፤
ታ ኦꬂዳ ናጋራይ
ኔፔ ቆቴቲቤና።
6 ኣቤት ጎዳዉ፥
ኡባፌ ዎልቃማ ጎዳዉ!
ኔና ሂዶታ ኦꬂዳይቲ
ዬላቶፔቶ፤
ኣቤት ኢስራኤሌ ጾሳዉ!
ኔና ሚንꬂ ኮይዛይቲ
ታ ጋሶን ካዉዮፌቶ።
7 ታኒ ጫሽ ኔ ጊሻስ
ጋዳ ዳንዳያዲስ፤
ታ ኣይፌሶይ ዬላቲዴስ።
8 ታኒ ታ ኢሻንታስ ኢማꬅ፥
ቃሴ ታ ኣዬይ ናይታስ
ኣላጋ ጊዳዲስ።
9 ታኒ ኔ ኬꬃስ
ሚሼቲዛ ሚሾይ
ታና ታማ ማላ ጹጌስ፤
ኣሳይ ኔና ጫዪዳ ጫሻይ
ታና ጋኪዴስ።
10 ታ ጾማሼ ዬካዲስ፤
ሄሳንካ ታ ቂꬌታዲስ።
11 ታኒ ካዮ ማይኦ ማይኣዲስ፤
ኢስታስካ ታኒ ቶሴስ ኣታዲስ።
12 ታኒ ካታማ ጌሊዛ ፔንጌን
ኡቲዛይታስ ዚጊርሳስ ኣታዲስ፤
ማꬆቲዛይታስ
ዬꬃስ ጊዳዲስ።
13 ኣቤት ጎዳዉ!
ታኒ ጊዲኮ ኔና ዎሳይስ።
ኣቤት ጾሳዉ!
ኔ ዶሪዳ ዎዴ
ታ ዎሳ ሲያ፤
ኔ ሜርና ሲቆን
ኔ ኣሺዛ ኣሾዛ ታና ቤሳ።
14 ጫሬን ሚቴቶንታ ማላ
ታና ኣሻ።
ታና ኢጺዛይታፔ ታና ናጋ፤
ጪማ ሃꬃፌካ ታና ኣሻ።
15 ዲኦ ሃꬂ ታና ኤፎፖ፤
ጪማ ኣባይ ታና ሚቶፎ፤
ጪማ ኦላይ ታ ቦላ ዎዶፎ።
16 ኣቤት ጎዳዉ!
ኔ ሜርና ሲቆ ኪያቴꬃ ማላ
ታስ ዛሮ ኢማ፤
ኔ ቃꬌታ ዳሮን ታኮ ሲማ።
17 ታፔ ኔ ኣይሌዛፔ
ኔ ሲንꬃ ጌንꬆፋ፤
ታኒ ዋዬቲዛ ጊሻስ
ታስ ኤሶን ዛሮ ኢማ።
18 ኔኒ ታኮ ሺቃዳ ታና ዎዛ፤
ታ ሞርኬታፔካ
ታና ኬሳ ላኣ ዬዳ።
19 ታ ቦላ ጋኪዳ ጫሻ፥ ዬላቴꬃኔ
ካዉሻቴꬃ ኔ ኤራሳ፤
ታ ሞርኬታካ ሁኤን ሁኤን
ኔ ዴማሳ።
20 ጫሺ ታ ዎዚና ማዱንꬂን
ታ ሂዶታ ቃንጻዲስ።
ታስ ቃꬌቲዛ ኣስ ኮያዲስ፤
ጊዶ ኣቲን ኢሲ ኣሲካ ዴና።
ታና ሚንꬄꬂዛ ኣስ ኮያዲስ፤
ጊዶ ኣቲን ኢሳዴካ
ዴማቤኬ።
21 ታኒ ጋፊዳ ዎዴ
ታስ ጫሚዛ ካꬅ ኢሚዳ።
ታኒ ሳሜቲዳ ዎዴ
ታስ ጫላ ጳንቂዳ
ኡሹ ኢሚዳ።
22 ኢስቲ ሚዛ ማዳይ
ኢስታስ ዎጺማዴ ጊዶ።
ኢስቲ ያርሾ ያርሺዲ
ሚዛ ማዳይ ኢስታስ ጊቴ ጊዶ።
23 ጼሎንታ ማላ
ኢስታ ኣይፌይ ጎዜቶ፤
ኢስታ ዞኮይ ቁኒ ኣቶ።
24 ኔኒ ኔ ሃንቆዛ ኢስታ ቦላ ጉሳ፤
ኢስቲ ቆፖንታ ዲሺን
ኔ ቦሻይ ኢስታ ቦላ ጋኮ።
25 ኢስታ ዱሳሶይ ካይስ ጊዶ፤
ኢስታ ዱንካኔን ኦኒካ ዶፖ።
26 ኣይስ ጊኮ ኔኒ ቃጻይዳይታ
ኢስቲ ዬዴꬄቴስ፤
ቃሴ ኔኒ ማዱንꬂዳ
ኣሳታ ቦላ
ሜቶ ዳሪሴቴስ።
27 ኢስቲ ናጋራ ቦላ ናጋራ
ጉጂ ጉጂ ባና ማላ ኣጋጋ፤
ኔ ኢስታ ማሮፓ።
28 ኢስቲ ዴኦ ማጻፋፔ ቁጬቴቶ፤
ጺሎታራ ኢሲፌ ማዝጋቤቶፌቶ።
29 ጊዶ ኣቲን ታኒ ሳኬታሼኔ
ዋዬታሼ ዴኣይስ።
ኣቤት ጾሳዉ!
ኔ ታና ኣሻዳኔ ናጋ።
30 ታኒ ጾሳ ሱንꬃ
ዬꬃን ጋላታና፤
ጋላታ ዬꬃን
ኢዛ ጊታቴꬃ ቆንጪሳና።
31 ሃይሲ ሳንጌቶንታ ቦራፔኔ
ኮርማ ያርሾፌ
ኣꬊዲ ጎዳ ኡፋይሳና።
32 ቆሄቲዳይቲ ታና
ጾሳይ ኣሺዳይሳ
ቤኢዲ ኡፋዬቴቶ።
ኢንቴኖ ጾሳኮ ሺቂዛይቶ
ኢንቴ ዎዚናይ ሚኔቶ።
33 ኣይስ ጊኮ ጎዳይ ሂዬሳታ ሲዬስ፤
ቃሾ ኬꬃን ዴኢዛ
ባ ኣሳካ ካꬌና።
34 ሳሎይኔ ሳኣይ፥
ኣባይኔ ኢዛ ጊዶን
ዎጺ ቃጺዛ ኡባቲ
ጾሳ ጋላቴቶ።
35 ጋሶይካ ጾሲ
ጺዮኔ ኣሻና፤
ዩሁዳ ካታማታ ዛሪዲ ኤሳና።
ኢዛ ዴሬይ ሄ ቢታ ላቲዲ
ሄን ዴኣና።
36 ኢዛ ኦሳንቻታ ዛሬይ
ሄ ቢታ ላታና፤
ኢዛ ሱንꬃ ሲቂዛይቲ
ሄን ዴኣና።