71
1 ኣቤት ጎዳዉ!
ኔኒ ታስ ታ ባቃታ ኣቲዛሶ፤
ሙሌካ ኔ ታና ዬላሶፓ።
2 ኔ ጺሎቴꬃን ታና ኬሳ ኤካ፤
ኔ ሃይꬃ ታኮ ዬጋዳ
ታና ኣሻ።
3 ኔ ታስ ኡባ ዎዴ
ጌሜታ ኣቲዛ
ሚኖ ዛላ ጊዳ፤
ታና ኣሻናስ ኔ ኣዛዛ፤
ታስ ሚኖ ሚጻይኔ
ዛላይ ኔና።
4 ኣቤት ታ ጾሳዉ!
ኢታታ ኩሼፔ፥
ጌናንቻታፔኔ
ሜንጼ ኢታታፔ
ታና ኣሻ።
5 ኣቤት ኡባ ሃሪዛ ጎዳዉ!
ታ ሂዶታይ ኔና፤
ዬላጋቴꬃ ዎዴፔ
ዶማዳ
ታ ኣማኔቲዛይ ኔና።
6 ታኒ ዬሌቶሶፌ ዶማዳ
ታ ኔናን ዜምፓዲስ፤
ታ ኣዬይ ኡሎፔ ታ ዬሌታና ማላ
ኦꬂዳይ ኔና፤
ኡባ ዎዴ ታ ኔና ጋላታይስ።
7 ዳሮ ኣሳይ ታና
ዱማ ኣይፌን ጼሊዴስ፤
ኔኒ ጊዲኮ ታ ባቃታ ኣቲዛ
ዎጋ ዛላ።
8 ጋላስ ኩሜꬅ ኔ ቦንቾ
ታ ዮታናስ፥
ታ ዶናን ጋላታይ ኩሚዴስ።
9 ታኒ ጪሚዳ ዎዴን ታና ኦሎፓ፤
ታ ዎልቃይ ኢጺዳ ዎዴን
ታና ኣጎፋ።
10 ኣይስ ጊኮ ታ ሞርኬቲ
ታና ሂሊዳ፤
ታና ዎꬋናዉ ኮይዛይቲ
ታ ቦላ ኢታ ማቄቲዳ።
11 ኢስቲ፥ «ጾሲ ኢዛ ኣጊዴስ፤
ኢዛ ኣሻናይካ ዴና፤
ሄሳ ጊሻስ ኣኔ ኢዛ
ጎዲ ኦይኮስ» ጊዳ።
12 ኣቤት ጾሳዉ! ታፔ ሃኮፋ።
ኣቤት ታ ጾሳዉ!
ታና ማዳናስ ኤሌላ።
13 ታና ሞቲዛይቲ ዬላቲዲ ꬋዬቶ።
ታና ቆሃናዉ ኮይዛይቲ
ዬላኔ ካዉሻቴꬅ
ማይኤቶ።
14 ታኒ ጊዲኮ ኡባቶ ኔና
ሂዶታ ኦꬃይስ።
ታኒ ጋላታ ቦላ ጋላታ
ኔስ ጉጃና።
15 ታኒ ኣይ ሊኬ ሃሳያናኮ
ኤሮንታ ኣጊኮካ
ጋላስ ኩሜꬅ ታ ዶናይ
ኔ ጺሎቴꬃ ጊሻሲኔ
ኔ ኣቶቴꬃ ጊሻስ ሃሳዬስ፤
16 ኣቤት ጎዳዉ፥ ጾሳዉ!
ታኒ ያዳ ኔ ዎልቃማ
ኦሶ ኣዋጃና፤
ቃሴካ ኔ ጺሎቴꬃ ጻላ
ዮታና።
17 ኣቤት ጾሳዉ!
ኔኒ ታና ዬላጋቴꬃፌ
ዶማዳ ታማርሳዳሳ፤
ታኒካ ሃኖ ጋካናዉ
ማላሊሲዛ
ኔ ኦሶዛ ኣዋጃይስ።
18 ኣቤት ጾሳዉ!
ኔ ማታ ጉዬፔ
ያና ዬሌታስ፥
ኔ ዎልቃ ጉዬፔ ያና ዴሬ ኡባስ፥
ታ ቆንጪሳና ጋካናሲኔ
ታ ጪማዳ ፑሉማና ጋካናስ
ኔ ታና ኣጎፋ።
19 ኣቤት ጾሳዉ!
ኔ ጺሎቴꬃይ ሳሎ ጋኪዴስ፤
ኣቤት ጾሳዉ!
ኔኒ ጊታ ሚሽ ኦꬃዳሳ፤
ኔና ሚሳቲዛይ ኦኒካ ዴና።
20 ኔኒ ታ ቦላ ዳሮ ሜቶ ኤሃዳሳ፤
ጊዲኮካ ኔኒ ታና
ጪማ ኦላፌ
ጎቻ ኬሳዳሳ፤
ታ ዴኦ ዛራ ኦራꬃዳሳ።
21 ኔኒ ታ ቦንቾ
ካሴይሳፌ ዳርሳና፤
ኔኒ ታና ዛሬꬃዳካ
ሚንꬄꬃና።
22 ኣቤት ታ ጾሳዉ!
ኔ ቱማቴꬃ ጊሻስ
ታኒ ኔና ዲꬃን ጋላታና፤
ኣቤት ኢስራኤሌ ጌሻዉ!
ታኒ ማሲንቆን ኔና ሳባና።
23 ታ ዎዚናይ ኡፋይሳን ኩሚዲ
ኔስ ዬጺዛ ዎዴ፥
ኔኒ ዎዚዳ ታ ሼምፖያ
ኔስ ኢሊላዉስ።
24 ታ ኢንጻርሳይ
ኔ ጺሎቴꬃ ጊሻስ
ጋላስ ኩሜꬅ ሃሳዬስ፤
ታ ቆሄቴꬅ ኮይዛይቲ
ዬላቲዳኔ ካዉዪዳ።