72
ሶሎሞኔ ማዛሙሬ
1 ኣቤት ጾሳዉ!
ሱሬ ፒርዳ ካዎስ፥
ኔ ጺሎቴꬃካ
ካዎ ናስ ኢማ።
2 ሂስቲኮ ኢዚ ኔ ዴራስ
ጺሎቴꬃን ፒርዳና፤
ናቄቲዳይታሲካ
ሱሬ ፒርዳና።
3 ዙማቲ ዱሬቴꬅ ኤሃና፤
ዙምቡላቲካ ጺሎቴꬅ
ኔ ዴራስ ኤሃና።
4 ሜቶቲዳይታ ጊሻስ
ኢዚ ሞቴታና፤
ሂዬሳታ ኢዚ ኣሻና፤
ኡንኤꬂዛይሳካ ኢዚ ሊቂሳና።
5 ኣዋይኔ ኣጊናይ
ዲዛ ዎዴ ኡባን
ኣሳይ ኢዛስ ሃሬቶ።
6 ካዎይ ሾቃን ቡኪዛ
ኢራ ማላኔ ጋዴ ካልሲዛ
ፑሴ ኢራ ማላ ጊዳና።
7 ኢዚ ዲዛ ላይꬅ ኡባን
ጺሎይ ጪያና፤
ኣጊናይ ꬋያና ጋካናስ
ቢታ ቦላ ሳሮቴꬂ ዳራና።
8 ኣባፌ ቢዲ ኣባ ጋካናስ፥
ኤፊራጺሴ ሻፋፔ
ሳኣ ጋጻ ጋካናስ
ኢዚ ሃራና።
9 ባዞን ሜሄ ጻላ ሃሪ ኣቂዛይቲ፥
ኢዛ ሞርኬቲ ጉዱላ ላጫና።
10 ታርሴሴ ካዎቲኔ
ሃሩሮታ ካዎቲ
ኢዛስ ጊራ ኤሃና።
ሳባኔ ሳባ ካዎቲ
ኢዛስ ኩሼ ጌንꬆ ኤሃና።
11 ካዎቲ ኡባይ ኢዛስ ጉልባታና፤
ካዎቴꬃይ ኡባይ
ኢዛስ ሃሬታና።
12 ሜቶታንቻይ ዋሲዛ ዎዴ፥
ማንቆኔ ማዶይ ባይንዳ
ኣስ ኢዚ ኣሻና።
13 ሂዬሳታሲኔ ማንቆታስ
ኢዚ ቃꬌቴስ፤
ሜቶታንቻታ ሼምፖካ
ኢዚ ሃይቆፔ ኣሼስ።
14 ኢስታ ሼምፖ ቆሆፔኔ
ጌኔፔ ኢዚ ኣሻና፤
ኢስታ ሱꬃይ
ኢዛ ሲንꬃን ኣልኦ።
15 ካዎይ ሼምፖ ጋምኦ፤
ሳባ ቢታ ዎርቃይ ኢዛስ ኢሜቶ።
ፓጬይ ባይንዳ ኢዛስ ዎሴቶ፤
ጋላስ ኡባን ኢስቲ ኢዛ ኣንጄቶ።
16 ቢታን ዳሮ ካꬃይ ሞኮ፤
ዙማቲ ካꬃን ካሜቴቶ፤
ቢታይ ሊባኖሴ ማላ
ካꬃ ቢታ ጊዶ፤
ማታይ ዴምባ ኩሚዛ ማላ
ካታማ ኩሞ።
17 ካዎዛ ሱንꬂ
ሜርናስ ሚኒ ዴኦ፤
ኣርሼይ ዴኢዛ ኬና
ጼይጌቲሼ ጋምኦ።
ካዎቴꬅ ኡባይ
ኢዛ ባጋራ ኣንጄቶ፤
ዴሬ ኡባይ ኢዛ፥
«ኔ ኣንጄቲዳዴ» ጊ ኣንጆ።
18 ማላሊሲዛ ሚሽ
ባርካ ኦꬂዛ ጎዳይ፥
ጾሳይ፥ ኢስራኤሌ
ጾሳይ ጋላቴቶ።
19 ኢዛ ቦንቾ ሱንꬃይ
ሜርናስ ጋላቴቶ፤
ቢታ ኡባይ
ኢዛ ቦንቾን ኩሞ።
ኣሚን! ኣሚን!
20 ኢሴዬ ና ዳዊቴ ዎሳይ
ሃይሳን ፖሌቲዴስ።