ሄꬓንꬆ ማጻፋ
73
(ማዛ 73—89)
ኣሳፌ ማዛሙሬ
1 ዎዚና ጌሽ ጊዲዳ
ኢስራኤሌ ኣሳስ
ጾሲ ኣይ ማላ ኪያ!
2 ጊዶ ኣቲን ታ ቶሆይ ꬉጴቲን
ታ ኩንዳይቻዳ
ጉꬃሶን ኣታዲስ።
3 ኣይስ ጊኮ ኢታ ኣሳታኔ
ማካላንቻታ ዱሬቴꬃ
ቤኣዳ ታኒካ ኢስታ ማላ
ሃናናስ ኣሞታዲስ።
4 ኢስታስ ቱጋይ ዴና፤
ኢስታ ኣሳቴꬃይ ፓያኔ ሚኖ።
5 ኢስቲ ሃራ ኣሳይ
ቱጋቲዛ ማላ ቱጋቴቴና፤
ሃራ ኣሳ ማላካ
ሜቶቲ ኤሬቴና።
6 ሄሳ ጊሻስ ኢስቲ ኦቶሬቴꬅ
ኣሌቆ ማላ ቆꬌን ኣꬄቴስ፤
ማካላቴꬅ ኣፋላ ማላ
ማይኤቴስ።
7 ኢስታ ዎዚናፔ
ኢታ ቆፋይ ፑልቴስ፤
ባንታ ኣይፌ ኬሲ ዴሬቄቴስ።
8 ኢስቲ ቂꬌቴሲኔ
ኢታ ሃሳዬቴስ፤
ኢስቲ ባንታ ኦቶሮን ሃራታ
ኡንኤꬃናዉ ማንዴቴስ።
9 ኢስቲ ሳሎን ዲዛ ጾሳ
ባንታ ዶናን ጫዬቴስ፤
ሳኣን ዴኢዛ ኣሳ
ባንታ ኢንጻርሳን ዱኬቴስ።
10 ሄሳ ጊሻስ ዴሬ ኡባይ
ኢስታኮ ጎቼስ፤
ኢስቲ ዮቲዛይሳካ ኡባ
ኤሶን ኣማኔቴስ።
11 ኢስቲ፥ «ጾሲ ኣይ ኤሪዜ?
ኡባፌ ꬎቃ ጾሳስ
ኤራቴꬂ ዲዜ?» ጌቴስ።
12 ሄኮ ኢታቲ ሃይሳ ሚሳቴቴስ፤
ኢስቲ ኡባቶ ዉዱ ጎንታይታ፤
ዱሬቴꬂ ቆꬌ ጋኪዳይታ።
13 ሂስቲን ታኒ
ዎዚና ጌሻቴꬃን
ናጊዳይሲ
ታና ኣይ ማዲዴ!
ታ ኩሼ
ታ ጺሎቴꬃን ሜጪዳይሲ
ጮ ታና ꬋሊቤና።
14 ጋላስ ኩሜꬅ
ታኒ ሜቶ ቤያዲስ፤
ዎንቲን ዎንቲን
ታኒ ቃጻዬታዲስ።
15 ታኒ ኢስቲ ሃሳይዛይሳ ማላ
ሃሳያና ቆፒዳኮ
ኔ ዴራስ
ታ ኣማኔቶንታ ኣስ ጊዳና።
16 ታኒ ሃ ዮኦዛ ሻካ
ኤራናስ ቆፓዲስ
ጊዶ ኣቲን ታ ኤራፔ ቦላ ጊዲዴስ።
17 ሄሲካ ታኒ ጾሳ ጌሻሶሆ
ጌላና ጋካናሲኔ
ኢታታ ዉርሴꬃ
ቤኣና ጋካናሳ።
18 ኣዳካ ኔ ኢስታ
ሃሊጺዛሶን ዎꬃዳሳ፤
ኔኒ ኢስታ ዱጌ
ባሻሶ ዬዳዳሳ።
19 ኢስቲ ሃሳኦንታ ኤሶን ꬋይዳ፤
ዳጋማን ኢሶይካ ኣቶንታ
ዲፒ ጊዳ።
20 ኣቤት ጎዳዉ! ኔኒ ዴንዲዛ ዎዴ
ኣሲ ꬊስኮፌ ቤጊን ꬋይዛ
ኣጉሞ ማላ ኢስቲ ꬋያና።
21 ታኒ ዪሎቲዳ ዎዴኔ
ታ ዎዚናይካ ማዱንጺዳ ዎዴ፥
22 ታኒ ቆፋይ ባይንዳ ዳማዲስ፤
ታኒ ኔ ሲንꬃን
ሚዛ ማላ ጊዳዲስ።
23 ጊዶ ኣቲን ታኒ ኡባቶካ
ኔናራ ዳይስ፤
ታ ኡሻቻ ኩሼዛካ
ኔኒ ኦይካዳሳ።
24 ኔ ዞሬን ታና ካሌꬃዳሳ፤
ሄሳፌ ጉዬ ኔኒ
ታና ቦንቾስ ኤፋና።
25 ሳሎን ኔፔ ኣቲን
ታስ ሃራይ
ኦኒ ዲዜ?
ሳኣንካ ኔፔ
ሃራ ኦናካ ኮይኬ።
26 ታ ዎልቃይኔ ታ ዎዚናይ
ዳቡራናስ ዳንዳዬስ፤
ጊዶ ኣቲን ጾሲ
ታ ዎዚናስ ሚኖቴꬂኔ
ታስ ሜርና ቃዳ።
27 ኔፔ ሃኪዛይቲ ꬋያና፤
ኔስ ኣማኔቶንታይታ
ኡባ ኔኒ ꬋይሳና።
28 ጊዶ ኣቲን ታስ ጾሳኮ
ሺቆይ ሎኦ፤
ኔ ኦሶ ኡባ ዮታና ማላ።
ታኒ ኡባ ሃሪዛ ጎዳ
ታ ባቃታ ኣቲዛሶ ኦꬃዲስ።