74
ኣሳፊ ሃሳኣን ሺሺዳ ጊንጾ
1 ኣቤት ጾሳዉ!
ኔኒ ኑና ሜርናስ
ኣይስ ዬጋ ኣጋዲ?
ሄንꬃሶሆን ዲዛ
ዶርሳታ ቦላ
ኔ ሃንቆይ ኣይስ ሱሊዴ?
2 ቤኒ ኔኒ ዶሪዳ ኔ ዴራ
ኔስ ቡዞ ሂስታ
ዎዚዳ ዛሬታ ሃሳኣ፤
ኔኒ ዴኢዳ ጺዮኔ ዙማ ቆፓ።
3 ኣኔ ላሌቲዳ ጾሳ ኬꬃዛ
ዩያ ጼላ፤
ሞርኬቲ ኢዛን ዲዛ
ኡባ ሚሽ ꬋይሲዳ።
4 ኔ ሞርኬቲ ኔ ሶን፥
«ኑኒ ጾኒዶስ» ጊዲ ጌሬሬቴስ።
ጾኖ ማላታ ጊዲ
ባንታ ባንዲራ ኤሲዳ።
5 ኢስቲ ዎራ ጊዶን ሚꬅ ቃንጻናዉ
ባንታ ካልታ ꬎቁ ሂስቲ
ኦይኪዳ ኣስ ሚሳቲዳ።
6 ሂላንቻቲ ኦꬂዳ ኣሌቆታ
ካልታኒኔ ማዶሻን
ሜንꬄሬꬂ ዬጊዳ።
7 ጾሳ ኬꬃ
ታማን ጹጊዲ ꬋይሲዳ፤
ኔ ጼይጌቲዛሶዛ ቱኒሲዳ።
8 ኢስቲ ባንታ ዎዚናን፥
«ኢስታ ኑኒ ሙሌራ ኡንኤꬃና»
ጊዲ ቆፒዳ፤
ዴራን ጾሲ ጎይኔቲዛሶሆታ
ኡባ ታማን ጹጊዳ።
9 ኑ ሻኪ ኤራናስ
ማላታይ ዴና፤
ሃይሳፌ ጉዬ ናቤይ ዴንዴና፤
ሃይሲ ኣዉዴ ጋካናዉ
ሃናናኮ ኤሪዛ ኣሲ
ኑ ጊዶን ዴና።
10 ኣቤት ጾሳዉ! ኔ ሞርኬቲ
ኣዉዴ ጋካናዉ
ኔ ቦላ ቂልጫኔ?
ኢስቲ ኔ ሱንꬃ
ሜርናስ ካꬊሼ ዳኔ?
11 ኔ ኩሼዛ ሚጫዳ
ኣይስ ኢስታ ꬋይሲኪ?
ኔ ኡሻቻ ኩሼዛ
ኣይስ ሾጳ ጋርሳን
ሎኮማ ኡታዲ?
12 ኣቤት ጾሳዉ!
ቤኒፔካ ታ ካዎይ ኔና፤
ኔኒ ቢታ ቦላ ኣቶቴꬅ ኤሃዳሳ።
13 ኔ ጊታ ዎልቃን ኣባ ሻካዳሳ፤
ኢዛ ጊዶን ዲዛ
ሚሚንቴታ ሁኤ ቆኤሬꬃዳሳ።
14 ሌዋታኔ ጌቴቲዛ
ሚሚንቴ ሁኤታ ዲንጫዳሳ፤
ኢዛ ኣሾ
ባዞን ዲዛ ሜꬌታታስ
ቁማ ኦꬃ ኢማሳ ።
15 ኔኒ ፑልቶታኔ
ካንቼታ ዶያ ዬዳዳሳ፤
ኡባ ዎዴ ጎጊዛ ሻፋታ
ቃሴ ሜሊሳዳሳ።
16 ጋላሳይ ኔሳ፤
ቃማይካ ኔሳ፤
ቃሴ ኣርሼኔ ኣጊና
ኢስቲ ዲዛሶን
ሚንꬃ ዎꬂዳይ ኔና።
17 ቢታስ ዛዋ ዎꬂዳይ፥
ባልጎኔ ቦኔ ሜꬊዳይ ኔና።
18 ኣቤት ጎዳዉ!
ኔ ሞርኬቲ ኔ ቦላ
ዎስቲ ቂልጪዳኮ፥
ቃሴ ኤያ ኣሳቲ
ኔ ሱንꬃ
ዎስቲ ካꬊዳኮ ቆፓ።
19 ኔስ ሃሬቲዛይታ ሼምፖ
ዎራ ዶኣታስ ኣꬃ ኢሞፋ፤
ሜቶቲዳ ኔ ዴራ
ሜርናስ ዶጎፓ።
20 ቢታን ዲዛ ꬉማ ሶሆቲ
ኡባይ ማካላንቻታን
ኩሚዳ ጊሻስ
ኔኒ ኑስ ጫቂዳ
ጫቆ ቃላ ቆፓ።
21 ናቄቲዳይቲ ዬላቲ ሲሞፌቶ፤
ማንቆቲኔ ሜቶቲዳይቲ
ኔ ሱንꬃ ጋላቴቶ።
22 ኣቤት ጾሳዉ! ዴንዳ!
ኔኒ ኔ ሱንꬃስ ሞቴታ፤
ኤያቲ ጋላስ ኡባን
ኔና ካꬊዛይሳ ቆፓ።
23 ኔ ሞርኬቲ
ኔ ቦላ ዋሲዛ ዋሶዛ፥
ኔና ኢጺዛይቲ
ኔ ቦላ ጬቄቲዛ ጬቄቴꬃኔ
ኢስታ ዎጫማ ዶጎፓ።