83
ኣሳፌ ማዛሙሬ
1 ኣቤት ጾሳዉ! ጮኡ ጎፓ!
ሲርጲ ጎፓ!
ኣቤት ጾሳዉ!
ቄሊ ጎፓ!
2 ቤኣ! ኔ ሞርኬቲ ኔ ቦላ ዴንዲዳ፤
ኔና ኢጺዛይቲ ኔ ቦላ
ባ ቆꬌ ቃꬂዳ።
3 ኢስቲ ኔ ኣሳ ቦላ
ጌማን ጌኔ ዱላቲዳ፤
ኔኒ ሲቂዛ ኣሳታ ቦላ
ማቄቲዳ።
4 ኢስቲ፥ «ሃ ዪቴ!
ኢስታ ካዎቴꬃ ꬋይሶስ፤
ኢስራኤሌ ጌቴቲዛ ሱንꬂ
ሜርናስ ሃሳኤቶንታ ማላ
ኦꬆስ» ጊዳ።
5 ኢስቲ ኢሲ ዎዚና ጊዲዲ
ኢሲፌ ማቄቲዳ፤
ኔ ቦላ ዴንዳናስ ጫቄቲዳ።
6 ኢስቲካ ኤዶሜ ኣሳታ፥
ኢስማኤሌ ኣሳታ፥
ሞኣቤ ዛሬታ፥ ኣጋሪ ዛሬታ፥
7 ጌባሌ ኣሳታ፥ ኣሞኔ ኣሳታ፥
ኣማሌቄ ኣሳታ፥ ፊሊስጼሜ
ኣሳታኔ ጺሮሴ ኣሳታ።
8 ኣሶሬ ኣሳቲ ኢስታራ
ኢሲፌቴꬅ ሜꬊዳ፤
ሎጼ ዛሬታስካ ማዶ ጊዲዳ።
9 ኔኒ ሚዲያሜ ኣሳታ ቦላ፥
ሲሳራኔ ያቢኔ ቦላ
ቂሶኔ ሻፋን ኦꬂዳ
ማላ ኢስታ ቦላ ኦꬃ።
10 ኢስቲ ኤን-ዶሬ
ጌቴቲዛሶን ꬋይዳ፤
ኢስታ ኣሃይ ሞጌቶንታ
ቢታ ቦላ ዎቂዴስ።
11 ኦሬቤ ቦላኔ
ዛኤቤ ቦላ ኦꬂዳ ማላ
ኢስታ ሃላቃታ ቦላ ኦꬃ፤
ዜባሃኔ ጻልሙና
ꬋይሲዳ ማላ
ኢስታ ሃሪዛይታካ ኔኒ ꬋይሳ።
12 ሄይቲ፥ «ኑኒ ጾሳ ኣሳ ቢታ
ኑስ ቡዞꬃና» ጊዳይታ።
13 ኣቤት ታ ጾሳዉ!
ኢስታ ጉዱላ ማላ ላላ፤
ጫርኮይ ኤፊዛ ሱላ ማላ ኦꬃ።
14 ጻራጋይ ዎራ ሚዲ ዉርሲዛ ማላ፥
ታማ ላጮይ
ዙማ ማይኢዛ ማላ፥
15 ጎቴን ኔ ኢስታ ዳጋንꬃ፤
ኔ ኡሾንካ ኢስታ ዬዴꬃ።
16 ኣቤት ጎዳዉ!
ኣሳይ ኔ ሱንꬅ ኮያና ማላ
ኔኒ ኢስታ ኣይፌሶ ዬላ ማይዛ።
17 ኢስቲ ሜርናስ ዬላቴቶ፤
ሂርጌቶኔ ካዉዪ ꬋዬቶ።
18 ኔ ሱንꬃይ ጎዳ
ጊዲዳይሳኔ
ሳኣ ኡባ ቦላ ኔኒ ጻላ
ኡባፌ ꬎቃ ጾሳ
ጊዲዳይሳ ኢስቲ ኤሬቶ።