84
ቆሬ ናይቲ ዛማሬታ ካቦስ ሱሱልኤን ዬጺዳ ማዛሙሬ
1 ኣቤት ሜꬌቴꬃ ጎዳዉ!
ኔኒ ዴኢዛሶይ ኣይ ማላ ሎኦሶ!
2 ታኒ ጎዳ ኬꬃ
ዛጎ ላሞታይስ፤
ታኒ ኩሜꬃ ዎዚናፔ
ዴኦ ጾሳስ
ኡፋይሳን ዬጻይስ።
3 ኣቤት ኡባፌ
ዎልቃማ ጎዳዉ!
ታ ካዎዞ ጾሳዉ!
ኔስ ያርሾ ያርሺዛሶዛ ማታን
ሲኔ ካፎይ ባስ
ዴኢዛሶ ዴማዱስ።
ሃራጴያካ
ባስ ዬሊዛሶ ኬጻዱስ።
4 ኔ ኬꬃን ዴኢዛይቲኔ
ሜርናስ ኔና ሳቢዛይቲ
ኣንጄቲዳይታ።
5 ባንታስ ኔና ዎልቃ ኦꬂዛይቲ፥
ጺዮኔ ኦጌ ባ ዎዚናን
ኣሞቲዛይቲ ኣንጄቲዳይታ።
6 ባካ ጌቴቲዛ ሃꬂ ባይንዳ
ሻፋራ ኢስቲ ካንꬂዛ ዎዴ
ሄ ሶሆን ፑልቶይ ꬉቃና፤
ባꬌሳ ኢራይካ ቡኪዲ
ቢታ ካልሳና።
7 ኢስቲ ዎልቃ ቦላ ዎልቃ
ጉጂ ጉጂ ባና፤
ኢስቲ ጾሳ ሲንꬃን
ጺዮኔን ቤታና።
8 ኣቤት ኡባፌ
ዎልቃማ ጎዳዉ!
ታ ዎሳ ኔኒ ሲያ።
ኣቤት ያቆቤ ጾሳዉ!
ታ ጊዛዝ ኤዝጋ።
9 ኣቤት ጾሳዉ!
ኔኒ ዶራ ቲይዳ
ኑ ካዎዛ ኣንጃ፤
ኢዚ ኑስ ጎንዳሌ ጊዲዳ ጊሻስ
ኔ ኢዛ ጼላ።
10 ሃራሶን ሺ ጋላስ ዴኣናፔ
ጾሳ ኬꬃን
ኢሲ ጋላስ ዱሲ ሎኦ፤
ኢታታ ዱንካኔን ዳናፔ
ጾሳ ኬꬃ ዛጎን
ዛቤ ጊዴꬂ ታስ ሎኦ።
11 ጎዳይ ኑስ ኣርሼኔ ጎንዳሌ፤
ኢዚ ኣዮቴꬃኒኔ
ቦንቾን ኑና ናጌስ፤
ሱሬቴꬃን ሄሜቲዛይታ
ኢዚ ሎኦ ሚሽ ዲጌና።
12 ኣቤት ኡባፌ
ዎልቃማ ጎዳዉ!
ኔናን ኣማኔቲዛይቲ
ኣንጄቲዳይታ።