85
ቆሬ ናይቲ ዛማሬታ ካቦስ ዲꬃን ዬጺዳ ማዛሙሬ
1 ኣቤት ጎዳዉ!
ኔኒ ኔ ቢታስ
ኪያቴꬅ ቤሳዳሳ፤
ያቆቤ ዲኤቲዳሶፔ
ዛራዳሳ።
2 ኔኒ ኔ ኣሳ ናቆ ኣቶ ጋዳሳ፤
ኢስታ ናጋራ ኡባ ካማዳሳ።
3 ኔኒ ዪሎቲዛይሳ ኡባ ኣጋዳሳ፤
ሱሊዛ ኔ ሃንቆፌካ
ሲማዳሳ።
4 ኣቤት ኑና ኣሺዛ ጾሳዉ!
ኔ ኑና ዛራ፤
ኔኒ ኑ ቦላ
ላንጬቲዳይሳ ኣጋ።
5 ኔኒ ኑና ሜርናስ ሃንቄታኔ?
ኔ ሃንቆይ ዬሌታፔ
ዬሌታ ጋካናዉ ጋምኣኔ?
6 ኔ ኣሳይ ኔናን ኡፋዬታና ማላ፥
ኔ ኑና ኦራጺሲኪ!
7 ኣቤት ጎዳዉ!
ኔ ሜርና ሲቆዛ ኑና ቤሳ፤
ኔኒ ኑና ኣሻ።
8 ታኒ ጎዳ ጾሲ
ዮቲዛይሳ ሲያና፤
ኢስቲ ሲሚዲ
ባላ ኦጌን ቦንታ ኣጊኮ፥
ባ ጌሻ ዴራስ
ሳሮቴꬅ ኤሃናስ
ሂዶታ ኢሚዴስ።
9 ኢዛ ቦንቾይ
ኑ ቢታን ዳና ማላ
ኣቶቴꬃይ ኢዛስ ያዪዛይታስ
ማታን ዴስ።
10 ሲቆይኔ ቱማቴꬂ
ኢሲፌ ሲጌቴቴስ፤
ጺሎቴꬂኔ ሳሮቴꬂ
ኢሲፌ ኢዲሜቴቴስ።
11 ኣማኔቴꬂ ሳኣፔ
ፑዴ ኬዛና፤
ጾሳ ጺሎቴꬂ
ሳሎፔ ዱጌ ዎꬋና።
12 ቤኢቴ! ጎዳይ ሎኦ ሚሽ ኢማና፤
ኑ ቢታይካ ሎኦ ካꬅ ሞኪሳና።
13 ጺሎቴꬂ ኢዛፔ
ሲንꬃራ ባና፤
ኢዚ ባናሶካ ኢዛስ ጊጊሳና።