96
1 ጎዳስ ኦራꬃ ማዛሙሬ ዬጺቴ፤
ሳኣን ዴኢዛ ኣሳዉ!
ኡባይ ጎዳስ ዬጺቴ።
2 ጎዳስ ዬጺቴ፤
ኢዛ ሱንꬃ ሳቢቴ፤
ኢዚ ኣሺዛይሳ ሃች ሃች ዮቲቴ።
3 ካዎቴꬃታ ጊዶን
ኢዛ ቦንቾ ቆንጪሲቴ፤
ኣሳ ኡባ ጊዶን ማላሊሲዛ
ኢዛ ኦሶ ኣዋጂቴ።
4 ጎዳይ ጊታ፤
ጊታ ጋላታይካ ኢዛስ ቤሴስ፤
ኡባ ጾሳታፔ ኣꬊዲ
ኢዚ ያዬታናስ ቤሴስ።
5 ዴሬ ኣሳይ ጎይኒዛ ጾሳቲ
ኡባይ ኤቃ ጾሳታ፤
ጊዶ ኣቲን ጎዳይ
ሳሎታ ሜꬊዳ ጾሳ።
6 ቦንቾይኔ ቴማይ
ኢዛ ዩሾን ዴስ፤
ሚኖቴꬃይኔ ፑላይ
ኢዛ ኬꬃን ዴስ።
7 ኢንቴኖ ቢታ ቦላ ዲዛ
ዴሬ ኡባቶ!
ጎዳ ቦንቾ ጊሻሲኔ
ኢዛ ዎልቃ ጊሻስ ጋላቲቴ።
8 ኢዛ ሱንꬃስ ቤሲዛ ቦንቾ
ጎዳስ ኢሚቴ፤
ያርሾ ኤኪዲ ኢዛ ኬꬃ ዛጎ ጌሊቴ።
9 ኢዛ ጌሻቴꬃ ፑላን ጎዳስ ጎይኒቴ፤
ቢታን ዴኢዛ ኣስ ኡባይ
ኢዛ ሲንꬃን ኮኮሪቴ።
10 ካዎቴꬃታ ጊዶን፥
«ጎዳይ ካዎቲዴስ!
ሳኣይ ሚኒ ኤቂዴስ፤
ሙሌካ ቃጼና፤
ኢዚ ኣስ ኡባስ
ኢሲ ጊና ፒርዳና» ጊቴ።
11 ሳሎይኔ ሳኣይ ኡፋዬቴቶ!
ኣባይኔ ኢዛ ጊዶን ዲዛ
ኡባቲ ጉሜቶ!
12 ጎሻ ጋዴይኔ ኢዛ ቦላ ዲዛ
ኡባይ ኡፋዬቶ!
ዎራን ዲዛ ሚꬅ ኡባይ
ኢዛ ሲንꬃን ኡፋይሳን ዬጻና።
13 ኣይስ ጊኮ ጎዳይ ያና፤
ኢዚ ሳኣ ቦላን ፒርዳናስ ያና፤
ኢዚ ሃ ሳኣ ቦላ ጺሎቴꬃን፥
ኣሳ ቦላካ
ቱማቴꬃን ፒርዳና።