97
1 ጎዳይ ካዎቲዴስ፤
ሳኣን ዴኢዛ ኣሳይ ኡፋዬቶ፤
ኣባ ጊዶን ዴኢዛ
ሃሩሮቲ ኡፋዬቴቶ።
2 ሻራይኔ ሳካና ꬉማይ
ኢዛ ዩዪ ኣꬊዴስ፤
ጺሎቴꬂኔ ቱማቴꬂ
ኢዛ ካዎቴꬃ
ኣራታስ ዮቻ።
3 ታማይ ኢዛፔ ሲንꬃራ ቤስ፤
ኢዛ ዩሾን ዲዛ
ሞርኬታካ ጹጌስ።
4 ኢዛ ዎልቃንꬂ ሳኣ ፖኢሴስ፤
ቢታይ ሄሳ ቤኢዲ ቃጼስ።
5 ጎዳ ሲንꬃን፥
ሳኣ ኡባ ጎዳ
ሲንꬃን ዙማቲ
ሙቃዳ ማላ ሴሪዳ።
6 ሳሎቲ ኢዛ ጺሎቴꬃ ኣዋጄቴስ፤
ኣሳይ ኡባይ ኢዛ ቦንቾ ቤኤስ።
7 ሚስሌታስ ጎይኒዛይቲኔ
ኤቃ ጾሳታን ጬቄቲዛይቲ
ኡባይ ዬላቴቶ!
ኤቃ ጾሳቲ ኡባይ
ጎዳስ ጉልባቴቶ!
8 ኣቤት ጎዳዉ!
ጺዮኔ ኣሳይ ኔ ጺሎ ፒርዳ
ሲዪዲ ኡፋዬቴስ፤
ዩሁዳ ካታማቲካ፥
«ሃሹ» ጌቴስ።
9 ኣቤት ጎዳዉ!
ኔኒ ሳኣ ኡባፌ ꬎቃሳ፤
ጾሳታ ኡባፌ ኔኒ ጊታታሳ።
10 ጎዳ ዶሲዛይቶ! ኢታ ኢጺቴ፤
ኢዚ ባስ ኣማኔቲዛይታ
ሼምፖ ናጌስ፤
ቃሴካ ኢታታ ኩሼፔካ
ኣሼስ።
11 ጺሎታስ ፖኦይ ፖኢ ፖኢ ባና፤
ዎዚና ሱሬታስ ኡፋይሲ ዳና።
12 ኢንቴኖ ጺሎቶ!
ጎዳን ኡፋዬቲቴ፤
ጌሻ ሱንꬃ
ኢዛይሳ ጋላቲቴ።