Imbaaqo Tinbite
Giddo Qofa
Ha maxaafay nam7u kifiletan shaakettana dandayees; ha maxaafan koyro nam7u shemppoti nabe Imbaaqoy Xoossara haasayda haasayata qonccisees. Imbaaqoy Yuhudan pirday geellattidayssassinne mooro oosoy daridayssas eqeteththa qaala sissides; Baabiloone asay Yuhuda deraa qaxxayana giza zaaro Xoossi izas immides. Gido attiin Imbaaqoy Baabiloone asay Yuhuda deraappe aadhdhida nagaranchcha gidida gishshas Yuhuda derey istta kushen waani qaxxayettanee? giidi Godaa oychchides. GODAY iza oyshaas Baabiloone asay sinththafe bantta woden qaxxayettana giza zaaro immides.
Ha maxaafas wurseththa shemppoy Imbaaqoy Godaa bonchcho gishshassinne iza maata gishshas shiishshida galata woosa bessees.
Ha Maxaafay Oykkida Kumeththa Qofa
Imbaaqo magananne Godaa zaaro 1:1—2:4
Nagaranchchata bolla yaana pirda 2:5-20
Imbaaqo woosa 3:1-19
1
1 Nabe Imbaaqos ajjuutan qonccida kiitay hayssafe kaallizayssa.
Imbaaqos Koyro Zuuzunth
2 GODAWU! Ne tana maaddana mala ta nena xeygishin ne ayde gakkanaas siyikkii? «Qohoy darides» gaada ta waassishin ne ayde gakkanaas ashshikii?
3 Ne tana aazas qohoy darshin bessay? Hayssa mala gene oosoy oosettishin ne waana co7u gaada xeellay? Mooroynne makkallay ta sinththan dees. Ooshshinne palamay biitta bolla darides.
4 Hessa gishshas wogay leppides; tuma pirday deenna; tuma pirday geellattana mala iitati xillota un7eththeettes.
Xoossafe Imettida Zaaro
5 «Inttes yootettiinkka ammanontta inttena ta intte paxa dishin issi miish ooththana gishshas ane ha7i asaa xeellite; be7idinne daro malalettite.
6 Baas gidontta keeththanne dizaso oykkanaas biitta ubbaa worajjiza shemppo iitatanne pilatata Baabiloone dere asaa tani denththana.
7 Isttika babisizaytanne daganththizayta; istta pirdaynne bonchchoy isttafe kezana.
8 Istta paray maaheppeka pilata; omarsa kana suytetappeka menxe iita; istta toga asaykka too pilatanne haahoppe yizayta. Baqqi ekkidi eleliza golle kafo mala piradhdheettes.
9 Wurikka genes gixxi kezida; istta ola asay bazzo biitta carko mala gede sinththe hordofees. Di7ettidayta ace mala shiishshees.
10 Kawota leqqees; dere haarizayta qidhi kaa7ees; ola miixa ubbaa leqqees; biitta issiso shiishshi guuppidi katamata baas oykkees.
11 Hessafe guye gote carko mala pitti ekki bees; heyti ba wolqqa baas xoossa kessida nagaranchchata» gees.
Imbaaqos Nam7anththo Zuuzunth
12 Abeet GODAWU! Ne mernaasofe daasa gidikkii? Ta Geeshshawu, ta Xoossawu, neni naagiza gishshas nuni hayqqoko; GODAWU istta pirdana mala ne istta shuumadasa. Zaallazoo! Istti nuna qaxxayana mala ne isttas maata immadasa.
13 Ne ayfeti iita xeellontta mala keehi geeshsha; neni qoho co7u ga xeellanaas dandayakka; histtiin as baleththizayta aazas co7u gadii? He asati baappe keehi xilliza asata dhayssishin ne aazas co7u gay?
14 Neni asaa abba giddon diza mole malanne GODAY isttas baynda abba giddon diza medheteththa mala ooththadasa.
15 Iita morkkey istta wursika manxakora oykki kessana; izi istta gitenkka oykki goochchana; ba woththizason istta shiishshi woththana; hessankka ufayettidi hashshu gaana.
16 Hessankka shempidi diza gishshassinne izi miza qumay modhdho gidida gishshas ba oykkida gitezas yarsho yarshees; qasseka ba shiishshizasozas exaane cuwasees.
17 Histtiin izi wontiin wontiin pacey baynda ba gite yeggi yeggi mole oykkiza mala derezakka mishay baynda wodhanaas bessizee?