11
Zoofaare Haasaya
1 Na7imaane dere as Zoofaarey hizgides;
2 «Hayssa ha hada qaalatas ubbaas
zaaro immizay baye?
Asi haasaya daron
xillo gidana dandayzee?
3 Iyoobee! Ne haasayda
hada haasayatas
zaaroy imettontta misatizee?
Ne hayssa mala qilccishin
nena seerana asi
bayndaz misatizee?
4 Ne qofan, ‹Tani xillo› gaasa;
Xoossaska, ‹Ne sinththan
tani geeshsha› gaasa.
5 Xoossi nees haasaydaakkonne
likke zaaro immidaakko
aazee dizay!
6 Erateththas ogey
daro gidida gishshas,
Xoossay nees erateththa
xuura qonccisidaakko
aazee dizay!
Hessa gishshas
Xoossi nena qaxxayizay
nees bessizayssafe
guuththara gididayssa era.
7 «Neni Xoossas ciimma gidida xuura
eranaas dandayay?
Ubbaa Dandayza Xoossa
pilggada gakkanawu dandayay?
8 Iza gitateththay saloppe bolla;
neni ay ooththanawu dandayay?
Iza ciimmateththayka
si7ooleppeka ziqqa;
neni ay eray?
9 Xoossa gitateththay biittafe darees;
abbafe aakkees.
10 Xoossi yiidi qachchiko,
gede pirda keeth shiishshidaakko
oonee iza digganay?
11 Xoossi go7ontta asata erees;
izi qoho beyishe
co7u giidi xeellenna.
12 Eeya asi eranchcha gidanaappe
harey as gididi
yelettanayssi kawuyana;
13 Gidikkoka neni
ne wozina suurisikko,
ne kusheza miccada
pude Xoossako woossiko,
14 Neni nagarappe haakkiko,
iita miishshika
neson beettontta mala
ne ooththiko,
15 he wode dhoqqu gaada
yeellay baynda ubbaa miish
ne beyana;
yeellay baynda
minna eqqanawu dandayaasa.
16 Ne metoza ubbaa ne dogana;
ne akeekizaykka
aadhdhi bichchida
haro haaththa mala gidana.
17 Ne shemppoya seeta gallassa
awappe aadhdhada poo7ana;
dhumaykka wontta
poo7o mala gidana.
18 Nees hidotay diza gishshas
nenikka ammanettada daana;
Xoossi nena naagiza gishshas
neni hirgay baynda
woppu gaada daana.
19 Ne oonaska babbontta ichchana;
daro asatikka ne sinththan
bonchcho demmanaas koyana.
20 Iitata ayfey qooqana;
istti attana ogeti ubbay
gorda gidana;
istta wurseththayka hayqo.»