28
Aadho Erateth Nashshanaas Shiiqida Ginxo
1 «Tumappe biitta garsan diza
ma7idineti bookettidi
bira ke7izasoynne
worqqay seeri oosettizasoy dees.
2 Biratay biittafe beettes;
xarqimalay ma7idine shuchchafe
seeridi ke7ees.
3 Asay dhuma kanththidi,
duge biitta giddo bookki gelidi
haakki dizasoza duge wodhdhidi
girdi gida dhuma giddon
ma7idine shuchcha koyeettes.
4 Asi dizasoppe haakkidi,
asa tohoy yedhdhi eronttaso
gakkeettes.
Heenkka ciimma olla
bookkeettes;
wodoro bollara
kuulloti kuulloti wodhidi
asappe shaaketti barkka
ooththeettes.
5 Biittay meetettiza kath immees.
Izas giddoy taman seeridi
shiretti shiretti wodhdhees.
6 Semppere geetettiza al7o shuchchay
biittan diza shuchchata giddon beettees;
he biitta giddonkka
worqqay beettees.
7 Gede ma7idinezakko efiza oge
xilloyka erenna;
ankkota ayfeykka beyibeenna.
8 Iita do7ati he sohoza
yedhdhibeettenna;
gaammoyka iza baggara
aadhdhibeenna.
9 Asi gade goyishe mino shuchchata
ba kushen denththees;
zumatakka xaphoppe
shiri yeggees.
10 Zaallaka phalqidi
iza giddora aadhdhanaas
oge kessees;
al7o gidida ma7idine
shuchchatakka demmees.
11 Shaafata pulttota teqqees;
biitta giddon qotan diza
miishshata qoncce kessees.
12 Histtiin aadho erateththi
awappe beettizee?
Akeekasikka dizasoy awaa?
13 Aadho erateththi
shemppora paxa diza medhetati
diza biittan beettuku;
izis tuma waagakka
eriza asi deenna.
14 ‹Wogga gita abbayka
ta giddon duukku;
abbayka tanara duukku› gees.
15 Erateththi geeshsha
worqqan shamettuku;
izi waagaykka
biran heregettenna.
16 Aadho erateththi
ofire geetettiza worqqafe,
margidenne semppere geetettiza
al7o shuchchatappe
aadhdha bonchchettidaaro.
17 Worqqaynne geeshsha heregay
izira ginattettenna;
xintta worqqafe oosettida
geexeykka izo laammana.
18 Bonchchettida heleloynne
almaaze geetettizayti
aadho erateththara ginattettenna;
aadho erateththa gatey
luule geetettizayssafekka bolla.
19 Tophaaziyoone geetettiza
Tophphiya biitta inqquyka
izira ginenna;
keehi geeyida
worqqafekka aadhdhawus.
20 «Histtiko erateththi awappe yazee?
Akeekaykka awappe beettazee?
21 Shemppora paxa diza
medhetatappe geemmidaaro;
salora piradhdhiza kafotikka
koyidi izo demmettenna.
22 Dhayoynne hayqoy,
‹Nu izi gishshas erizay
woren xalla› geettes.
23 Aadho erateththako efiza ogezanne
iza dizasoza erizay Xoossa xalla.
24 Izikka sa7a gaxa kumeth demmees;
saloppe garsan dizayssa
ubbaa beyees.
25 Izi carko wolqqa ooththida wode
wogga gita abba
izi makkida wode,
26 irassinne wolqqanththara diza
dadas woga woththida wode,
27 Xoossi erateth be7ides;
paacci xeellidi izo bonchchides;
pilggi be7idi minththi woththides.
28 He wode asas,
‹Hekko erateth guussi
Xoossas yashshateththa;
akeeka guussi
iitappe haako› gides.»