5
1 «Iyoobee! Ne xeygiin
nees koyanaadey diikko xeyga;
nees maado immana mala
kiitanchchatappe
awayssako xeellay?
2 Eeya as yiilloy wodhana;
qanaateykka as dhayssana.
3 Eeya asi minnidi dishin beyadis;
gido attiin iza aqoy
qoppontta dishin
Xoossa hanqon laalettides.
4 Iza naytikka ba de7ozas
ammanththizaaz demmettenna;
dubbushankka istta gishshas
haasayza as
istti demmontta gishshas
istta bolla qohoy gakkana.
5 Izi zerida kaththaaka
koshattida asati maana;
haray attiin agunththa giddon
mokkidayssaka izas ashshettenna;
Saametti uttida asati
iza haaroza ekkanaas amotteettes.
6 Metoy coo biittafe dendenna;
waayeykka gadeppe coo kezenna.
7 Tama finxeththi bonqofe dendidi
pude finxiza mala,
asikka waayes yelettees.
8 «Tani nena gididaakko
Xoossa woossana;
ta meto ubbaa izas qonccisana.
9 Izi qooday baynda
malalisiza miish,
pilggiin gakettontta
gita miish ooththees.
10 Biitta bolla ira bukisees;
goshshatakka
haaththan shugisees.
11 Kawuyidayta bonchchon
dhoqqu histtees;
muuzottizayta minththeththidi
ufayssees.
12 Istta oosoy polettontta mala
gene asata qofa hada ooththees.
13 Cinccata istta gene oosozan
zaari oykkees.
Gene asata qofaakka
eesora dhayssees.
14 Gallassay isttas dhuma gidees;
buro seeta gallassan
omars dhuma giddon diza mala
istti tattafettana.
15 Manqota istta morkketa
mashshafe ashshees;
metotanchchatakka
waayisizayta kusheppe
kessi ekkees.
16 Manqotas hidota immees;
makkallateththika
biitta bollafe dhayssees.
17 «Xoossi seeriza asi anjjettidayssa;
hessa gishshas Ubbaa Dandayza
Xoossa seera leqqofa.
18 Xoossi madunththikokka
zaaridi paththees;
izi menththees;
ba kushen zaaridi koolees.
19 Usuppun qommo boshappe
nena ashshi ekkana;
laappunththazanka ay qohoykka
ne bolla gakkenna.
20 Kosha layththan izi nena
shemppora paxa woththana;
ola layththankka izi nena
hayqoppe ashshana.
21 Xoossi nena iita
inxarsafe naagana;
boshay ne bolla
yiikkoka yayyaka.
22 Wolqqamata qohoynne
koshay nena daganththenna;
biitta do7ataska ne yayyaka.
23 Ne goyiza gaden nena
shuchchi waayisenna;
do7atarakka ne saron daana.
24 Ne keeththan saroy kumanayssa
ne shaakka erana;
ne mehe xeellishin
aqoppe paccenna.
25 Ne zereththay daranayssa ne erana;
ne zereththayka demban diza
maata mala darana.
26 Kaththi kaxxidi maxettizayssa mala
nekka lo7eththa cimmada
duufon baana.
27 Nuni hayssa ubbaa pilggidi
tumu gididayssa eridos;
nenikka akeekada
hayssa ooson peysha.»