6
Iyoobe Haasaya
1 Hayssafe guye Iyoobi hizgi zaarides;
2 «Ta muuzoteththi geeddaretti
uttidaakko aazee dizay!
ta metoy ubbay
geeddaran geeddaretti uttidaakko
aazee dizay!
3 Abba lanqen diza
aceppe aadhdhi
deexxanakkoshin;
hessa gishshas dandayay paccida
ta haasayay
nena malalisanaas bessenna.
4 Ubbaa dandayza Xoossay
tana ba yiishshatan caddides;
istta marzetikka
ta asateththa giddon laalettida;
daganththiza Xoossa boshay
ta yuushon yuuyi aadhdhides.
5 Tumappe hardiday cilila maata
demmidi caaggi erizee?
Booraykka basso maata demmiko
xaaggi erizee?
6 Maxiney gelontta mal7ontta
kaththi meetettizee?
Phuuphphulle haaththi mal7izee?
7 Hayssa mala kath
maanaas koykke;
muusi attiin kushenkka bochchike.
8 «Ta amottizayssa Xoossi
taas immidaakko aazee dizay!
Izi ta waaso siyidaakko
aazee dizay!
9 Hayssa ubbaafe izas shene gidiin
izi tana menththereththi
yeggizaakko!
Ba kusheza yeddidi
izi tana dhayssidaakko!
10 Shempo immontta ay hargey
tana sakkikokka
tani ufayssan guppana;
tani Geeshshaza qaala
ay wodenkka kaddabeekke;
11 «De7on de7ana mala dandayza
ay minoteththi taas dizee?
Hidotay baynda aggiko
ays de7azinaa?
12 Tani shuchcha mala minoo?
Ta asateththayka
xarqimalaththo minoo?
13 Tana maaddanaas
taas aykko wolqqay deenna;
taas diza wolqqay
ubbay eketichchides.
14 «Ubbaa Dandayza Xoossas
yash aggidaadessinne
daaburdaadeska iza laggey
izas kiyateth bessanaas koshshees.
15 Ta ishati gidikko haroy harotti
wodhidaappe guye meliza
ammanththontta
shaafata mala baleththizayta.
16 Shaafatan balgo balgo
shachchi kumees.
17 Bone aginatan gidikko
maayi dhayees;
shaafatikka haaththi baynda
melata gideettes.
18 Caana meheta laaggi ogera biza
asati haath koshshas
ogeppe ke7i bazzo biitta gelidi
toylu toylishe dhayeettes.
19 Teema biittafe biza mandara asati
haaththe koyeettes;
Saaba dere zal7anchchatikka
haaththe demmanaas
hidota ooththeettes.
20 Banti ammanetti uttida shaafati
melidayssa be7idi
hidota qanxxeettes;
haaththaako gakkiza wode
yiilloteettes.
21 Intteka taas hayta
ha shaafata mala;
ta bolla gakkida metoza be7idi
gede guye baqatideta.
22 Histtiin ta inttena hessa woykko
hayssa taas immite,
woykko intte haarozappe kessidi
tana ashshite gadinaa?
23 Qasse ta morkketa
kusheppe tana ashshite;
woykko tana waayisizayta
kusheppe tana
kessi ekkite gadinaa?
24 «Tana tamaarsite;
tanikka co7u gaana;
ta moorozakka tana bessite.
25 Tuma qaalay
camo gidikkoka ekettees;
intte walassay gidikko
aykkoska go7enna.
26 Intte ta haasaya
carko mala qoodeeta;
histtiko hidota qanxxida taas
zaaro immanaas ays koyeetii?
27 Yi7o nayta bolla saama yeggeeta;
intte intte siiqo laggeta
bayzanaas miishshan
marshetteetii?
28 «Ane tana haa xeellite;
intte sinththan ta wordotadinaa?
29 Inttes qoho gidontta mala simmite,
tani likke asakko!
30 Tumukka ta inxarsan
qohoy beettanee?
Ta doonaykka gene miish
shaakki eranaas dandayennee?