Ermaasa Tinbite
Giddo Qofa
Tinbite yootiza Ermaasi Kirstoosi yelettanaappe kase laappun xeetu layththa wurseththaninne usuppun xeetu layththi doomettiza wode de7ides. Ermaasi daro wode ooththida ba ooson istta eeqaa xoossa goynoninne istta nagara ooso gaason Xoossa asaa bolla gita bashshi gakkanayssa minththidi erisides; izi yootida tinbitetappe baggay polettiza wode paxa diidi ba ayfen be7ides. Baabiloone Kawo Nabukadanaxoorey Yerusalaame oykkidi katamayonne Xoossa Keeththaa laalloyssa, Yuhuda kawoynne asaappeka dariza baggay di7ettidi Baabiloone bidayssa be7ides. Gujjidikka Ermaasi asay di7oppe simmanayssanne Isra7eele kawoteththi simmi eqqanayssa kasetidi yootides.
Ermaasa maxaafaa oyddu kessidi be7anaas dandayettees. 1. Iyosiyaasa, Iyo7aaqeme, Iyo7aakinenne Sedeqiyaasa kawoteththa layththatan Yuhuda asaassinne istta kaaleththizaytas Xoossafe yida qaala. 2. Dumma dumma tinbiteta, Ermaasa de7on polettida ayfe yo7otanne Ermaasa xaafe Baarokey xaafi woththida yo7ota. 3. Dumma dumma allaga biitta asas Xoossafe yootettida tinbite qaala. 4. Yerusalaame oyketeththinne asay di7ettidi Baabiloone baanayssa yootiza gujo taariketa.
Ermaasi ba asaa keehi wozinappe siiqizaadenne istta bolla bashsha pirda tinbite aaththanaas keehippe daro ixxiza asa. Nabeteththan izi ooththana mala Xoossi iza xeygida gishshas bana gakkida meto gaason izi ceecida mino ceecey iza maxaafa giddon daro sohon xaafetti uttides. Xoossa qaalay iza wozina giddon tama mala xuuggiza gishshas kammidi digganaas dandayonttayssa qonccisides.
Ha maxaafan diza gita tinbite qaalatappe issoti issoti metoy kumida Ermaasa layththafe kanththidi Xoossi isttas immiza ooraththa caaqo qaalay polettana wodeza bessizayta; he ooraththa caaqo qaalay asa wozinan xaafettiza gishshas istta akeekissiza astamaare koshshontta istta naagana. (31:31-34).
Ha Maxaafay Oykkida Kumeththa Qofa
Xoossan Ermaasa dooreteth 1:1-19
Yuhuda bollanne Isra7eele bolla Xoossi ehana qixaate 2:1—25:38
Wordo nabetara Ermaasa eqeteth 26—29
Xoossi ba deraa di7ettidasoppe zaaranayssa 30—33
Dumma dumma Ermaasa oosota 34—38
Yerusalaame kundeththinne Yuhudan medhettida hanota 39—42
Gibxe biittan Ermaasa 43—44
Baarokes kiitettida kiita 45
Nabezi dumma dumma deretas yootida tinbite 46—51
Yerusalaame kundeththa gishshas yootettida yo7ota 52
1
1 Biniyaame biittan Anatoote kataman diza qeesetappe issaa Kilqiyaasa naa Ermaasi yootida qaalay hayssafe kaallizayssa.
2 Amoone naa Yuhuda kawo Iyosiyaasi kawotida tammanne heedzdzanththo layththan GODAA qaalay Ermaasakko yides.
3 Qasse Iyosiyaasa naa Yuhuda Kawo Iyo7aaqemey kawotida layththatan GODAA qaalay Ermaasakko yides. Hessafe guye Iyosiyaasa naa Sedeqiyaasi kawotiin tammanne issinththa layththan he wode ichchashanththa aginan Yerusalaame asay di7ettidi baana gakkanaas GODAA qaalay Ermaasa baggara izas yootettides.
Ermaasa Dooreteth
4 GODAA qaalay taakko hizgishe yides.
5 «Ermaasa! Tani nena
ne aayey ulon medhdhanaappe
kase erays.
Neni yelettanaappe sinththan
ta nena dummasa woththadis.
Qasseka kawoteththatas nabe
gidana mala shuumadis.»
6 Histtiin tani, «Ubbaa Haariza GODAWU! Tani buro naa gidida gishshas ay ga haasayanaakko ta erikke» gadis.
7 Gido attiin GODAY tana, « ‹Tani naa› gooppa. Tani nena kiittiza asa ubbaakko ba. Tani azaziyssa ubbaaka yoota.
8 Tani nena ashshanaas nenara diza gishshas ne isttas yayyofa; tani GODAY hayssa nees yootays» gides.
9 GODAY ba kushe yeddidi ta metershata bochchidi, «Hekko ne yootana ta qaala ne doonan woththadis.
10 Neni shoddanaassinne laallanaas, dhayssanaassinne shira yegganaas, keexxanaassinne tokkanaas dereta bollanne kawoteththata bolla tani hach nena shuumadis» gides.
11 GODAA qaalay taakko yiidi, «Ermaasaa! Ne ay be7ay?» gi oychchides. Tanikka, «Ochcholoone hagga be7ays» gadis.
12 GODAY tana, «Neni likke be7adasa. Tanikka ta qaalay polettanayssa tishshi histta be7ays» gides.
13 GODAA qaalay qasseka taakko yiidi, «Haray aazi nees beettizee?» gi oychchides. Tanikka zaarada, «Issi penttiza otoy pudeha baggafe haa geddi gi uttidayssi beettees» gadis.
14 GODAY taas, «Pudeha baggafe bashshi dhuuqqidi ha biittan diza asaa ubbaa bolla gukkana.
15 Tani pudeha baggan diza kawoteththata haa yaana mala xeygana; Yerusalaameninne izi yuushon diza Yuhuda katamata bolla meto gaththidi istta oykkana; hessafe guye Yerusalaame geliza pengeta bolla bantta araata miccana.
16 «Yuhuda asay tana aggidi,
hara eeqa xoossatas
exaane cuwasida gishshas,
ba kushen ooththi kessidayta
goynnida gishshas
ta deraa bolla pirdaa awajjadis.
17 «Neni gidikko giigetta! Denda eqqada tani nena azazizayssa ubbaa isttas yoota; isttas yayyofa. Neni isttas yayyiko tani nena istta sinththan gujja yashissana.
18 «Hach tani nena ha biitta ubbaa bolla, Yuhuda kawota bolla, halaqata bolla, qeeseta bollanne ha biitta asaa bolla ne eqetta dandayana mala gimbettida katama, birata tuussinne xarqimalappe oosettida birata dirsa mala ooththadis.
19 Istti nenara olettana; gido attiin tani ashshanaas nenara issife diza gishshas nena xoonettenna. Tani GODAY hayssa nees yootays» gides.