2
Isra7eele Asay Ooththida Nagara
1 GODAA qaalay yiidi taas,
2 «Ba! Baada waassa;
Yerusalaame asaa
hayththan sissa;
GODAY, ‹Neni naateteththan
ay keena ammanettidaakko,
qasse neni buro mishiran dashe
tana ay keena siiqidaakko,
zereththi zerettontta
bazzo biittan
ne wostta kaallidaakko
ta akeekays.
3 He wode Isra7eeley
GODAAS geeshsha,
koyro shiishshiza
xeera kaththa mala;
izo mittidayti
mooranchcha gidida;
istta bolla bashshi yides› » gees.
4 Intteno Yaaqoobe keeththa asatoo!
Isra7eele zare ubbatoo!
GODAA qaala siyite!
5 GODAY, «Kase intte aawati
taappe haakkiday,
hada yo7o kaalliday,
ba hu7esikka
go7ay bayndayta gididay
taappe ay mooro demmidii?
6 Isttika, ‹Nuna Gibxeppe kessiday,
bazzon samida ogera,
kundukurcco biittara,
melanne dhuma biittara,
asi aadhdhonttasora
nuna kaaleththi ehida
GODAY awan dizee?›
gi oychchibeettenna.
7 Intte izi ayfenne
izi anjjo maana mala
tani inttena aradda biitta ehadis;
gido attiin intte yiidi
ta biitta tunisideta;
ta xinxxoyo
harasettana mala ooththideta.
8 Qeesetikka, ‹GODAY awan dizee?›
gi oychchibeettenna;
Ta wogay istta kushen diza
asatikka tana eribeettenna.
Dere kaaleththizaytikka
ta bolla makkallida.
Nabeti Ba7aale sunththan
tinbite yootida;
go7ontta miishshatakka
kaallida» gides.
9 Qasseka GODAY,
«Hessa gishshas tani
inttenara buro pirdettana;
intte nayta naytarakka mootettana.
10 Kiitime pinni xeellite;
Qeedaare kiittidi
lo7eththi xomosite;
Histtidi ane hayssa mala hanoy
kase hani erizaakko be7ite.
11 Istti tumu xoossata
gidontta aggikokka
ba eeqa xoossata
laammida kawoteththi dizee?
Ta derey gidikko
isttas bonchcho gididayssa
hada gidida eeqa xoossatan
laammides» gees.
12 Qasseka Ubbaafe
Wolqqama GODAY,
«Salotoo, ‹Hanno Poora!› giite;
keehi dagammidi kokkorite!
13 Ta derey nam7u
iita miishshata ooththides;
de7o haaththa pultto gidida
tana aggides;
haaththa oykkanaas dandayontta
lukettida ollata baas bookkida.
14 Isra7eeley kareppe yida ayllee?
woykko soon yelettida ayllee?
Histtiin ays
bonqqas aadhdhi imettidee?
15 Gaammoti iza bollan xaaggida;
istti bantta qaala dhoqqu histtidi
iza bolla garmamida;
istti iza biitta bula kessida;
iza katamatikka xuugettidanne kayzida.
16 Qasseka Memppisanne
Xaafinaase asati
ne hu7e bulusida.
17 Oge nena kaaleththizayssa
GODAA ne Xoossa aggada
hayssa ne bolla ehiday
nena gidikkii?
18 Shihoore shaafappe haath uyanaas,
ay ekkanaas
duge Gibxe wodhdhadii?
Woykko Efiraaxise shaafappe
haath uyanaas
duge Asoore beeth
ays koshshidee?
19 Ne iitateththi ne bolla
qixaate gaththana;
ne tana kaddoyssi ne bolla
hanqo ehana.
GODAA ne Xoossaa ne aggishin,
taas yashshateth
ne wudu gontta ixxishin
ay mala iitaynne
camo miishshi
ne bolla gakkanaakko qoppa;
ane akeeka» gees.
20 Ubbaa Haariza GODAY,
«Benippe doommada tani
ne qambara menththadis;
nena qachchida
miishshika duuththadis.
Histtiinkka,
‹Tani nees ooththike› gadasa.
Histtada dhoqqa zumbullata
achchan miththa garsan
laymatanaas ichchadasa.
21 Tani nena muuruta
zereththafe ekkada,
lo7o woyne tura mala tokkadis.
Histtiin neni waana
guye simmada
woran mokkidi moorettida
woyne tura mala gidadii?
22 Neni hadinccen meecettikokka,
woykko daro saamunan meecettikokka
ne mooro qitay ha7ikka
ta sinththan dees» gees
Ubbaa Haariza GODAY.
23 Neni waanada, «Tani tunabeekke;
tani Ba7aale eeqatas
goynnanaas woxxabeekke»
gaanaas dandayay?
Neni shoobban ooththidayssa
ane qoppa;
neni ooththidayssa ane akeeka;
neni yaanne haa woxerettiza
gaamella mala gidadasa.
24 Neni bazzo biittan baas dose
histtada ziita keza
singeththashe woxxiza
hardida mala gidadasa;
Iza birassas kezaychchiko
oonee izo teqqanaas dandayzay?
Iza biras keziin
izo koyzayti ubbati
waayontta demmeettes.
25 Ne tohoy argacana
gakkanaas woxxofa;
ne doonay saamon melana
gakkanaas toylattofa;
ne gidikko, «Coo daaburoppa;
tani eeqa xoossata dosadis;
tani istta kaallana» gadasa.
26 «Kaysoy oykettidi yeellatiza mala
Isra7eele asay yeellatides;
isttika, istta kawoti,
istta shuumeti,
istta qeesetinne istta nabeti
ubbay hessaththo yeellatana.
27 Istti mith,
‹Neni ta aawaa› geettes;
qasse shuch,
‹Neni tana yeladasa› geettes.
Istti taas ba sinth
zaaranayssa aggidi
zokko zaarida;
gido attiin istta
metoy gakkida wode,
‹Yaada nuna ashsha› geettes.
28 Histtiin ane intte inttes
medhdhida xoossati awan dizoo?
Yuhudaa, intte metotiza wode
istti inttena ashshanaas
dandaykko
ane inttena yiidi ashshetto!
Intteno Yuhuda asatoo!
Intte xoossati intte
katamata mala cora» gides.
29 GODAY, «Intte tanara
ays mootetteetii?
Intte ubbayka
ta bolla makkallideta.
30 Tani intte nayta
coo mela qaxxayadis;
istti gidikko baaybeettenna;
gafida gaammo mala
intte mashshay
intte nabeta mides» gees.
31 Intteno ha wode yeletatoo!
GODAA qaala yuushshi qopite;
«Tani inttes Isra7eele
asaas bazzo mala
woykko sakkanna dhumay diza
biitta mala gidadinaa?
Histtiin ays ta asay,
‹Nuni nu shene mala hanana;
simmidikka neekko yookko› gizee?
32 Geela7oy ba alleqo woykko
mishiraya ba mishirateththa
may7o bala erazee?
ta derey gidikko
tana daro wode
gakkanaas balides.
33 Ziitan as oykkanaas
ne ay mala eranchchaa?
Huskku huskkiza
iita maccassatikka
ne hanoteththaafe daro
iita miish tamaareettes.
34 Ne istta kaysoteththan oykkontta
xillo manqota suuththi
ne may7o bolla beettides.
Neni hayssa ubbaa
ooththa woththadakka,
35 ‹Tani xillo; tumappe iza hanqoy
tana gakkenna› gaasa.
Neni, ‹Tani nagara
ooththabeekke›
giza gishshas
tani ne bolla pirdana.
36 Histtiin ne oge laamma laamma
ays woxxay?
Kase nena Asoore biittay
kawushshida mala
Gibxe biittay nena kawushshana.
37 Neni ammanettizayta
GODAY kawushshida
gishshassinne
isttafekka maado
demmontta gishshas
hayssafekka ne hu7e kushen
baqqa oykkada kezana.