103
Dawite Mazamure
1 Ta shemppoyee!
GODAA galata!
Ta kumeththa asateththay
iza geeshsha sunththa galato.
2 Ta shemppoyee! GODAA galata!
Izi nees ooththida
kiyateththa ubbaa dogoppa.
3 Izi ne nagara
ubbaa atto gees;
izi ne harge ubbaafe
nena paththees.
4 Izi nena
duufon gelontta mala ashshees;
mernaa siiqoninne maarotan
nena anjjees.
5 Golle kafoththo neni ooraxana mala
izi ne amo ubbaa
lo7o miishshan kunththana.
6 GODAY naaqettidaytas
xillo ooththeessinne
suure pirda pirdees.
7 Izi ba oge Muse bessides;
ba oosokka
Isra7eele asaa erisides.
8 GODAY qadhettizaadenne
maarizaade;
izi hanqettanaas eesotonttaade;
iza siiqoy keehippe daro.
9 Izi ubba wode
nu mooros mootenna;
mernaaskka hanqettenna.
10 Izi nu nagara mala
nuus ooththibeenna;
nu iitateththaa mala
nuus zaaribeenna.
11 Saloy sa7appe dhoqqiza mala
GODAAS yayyizaytas
iza siiqoy gita.
12 Arshey mokkizasoppe
wullizasoy haakkiza mala
GODAY nu mooroza
nuuppe haassides.
13 Aaway ba naytas
qadhettiza mala
GODAY baas yayyizaytas qadhettees.
14 Nuni aazappe medhettidaakko
izi erees;
nuni biitta gididayssaka
izi akeekees.
15 Asa de7oy gidikko maata mala;
izi bazzo ciishsha mala ciiyees.
16 Carkoy carkiza wode
qoqofetti dhayees;
izi kase dizasoy
mulekka erettenna.
17 Gido attiin GODAAS yayyizaytas
iza siiqoy mernaappe
mernaa gakkanaassa;
iza xilloteththayka
yeletappe yeleta gakkanaassa.
18 Hessi hananay
iza caaqo qaala
naagizaytassinne
iza azazo polanaas
minettizaytassa.
19 GODAY ba araataa salon essides;
iza kawoteththay ubbaa haarees.
20 Intteno iza kiitanchchatoo!
Iza azazo poliza wolqqamatoo!
Izi gizayssa ezgizaytoo!
GODAA galatite.
21 Intteno salon de7iza minotoo!
Iza shene ooththiza aylletoo!
GODAA galatite.
22 Intteno izi haariza soho
ubbaan de7iza medhetatoo!
ubbayka GODAA galatite.
Ta shemppoyee! GODAA galata.