104
1 Ta shemppoyee!
GODAA ta Xoossa galata!
Abeet GODAA ta Xoossawu!
Neni ay keena gitaa!
Neni bonchchonne
teema may7adasa.
2 Neni afala mala poo7o quma7adasa;
salotakka dunkaane mala
toladasa.
3 Ne keeththaa
salo gufanththo bollan keexxadasa;
shaara nees para-gaare kessadasa;
carko qefe toggada baasa.
4 Neni carkota ne kiitanchcha,
tama lacokka ne aylle kessaasa.
5 Neni sa7a yochcha bolla essadasa;
izi meri mernaaskka qaaxxenna.
6 Wogga gita abba biitta bollan
afala mala miccadasa;
haaththika gita zumata
kammides.
7 Gido attiin ne seeriin
haaththati kichchida;
ne azazo siyidi eeson baqatida.
8 Istti gita zumatappe
duge shoobbata wodhdhida;
neni isttas giigsidaso goggida.
9 Haaththati simmidi
biitta kammontta mala,
istti aadhdhontta mala
zawa essadasa.
10 Neni pulttota shoobban pulttisaasa;
haath zumata giddora
duge gogissaasa.
11 Bazzo do7ati ubbay izappe uyeettes;
harididatikka saamos
izappe uyi aleettes.
12 Salo kafoti haaththaa matan
bantta keeththa keexxeettes;
miththa haggata giddonkka
yexxeettes.
13 Neni gita zumata bollan
saloppe ira bukisaasa;
biittaaka ne kushe ooso
ayfen kunththadasa.
14 Neni mehes maata,
asas kath mokisaasa;
hessan asay biitta ooththidi
kath shiishshees.
15 Asa wozina ufayssiza woyne,
sinth shicissiza zaytenne
wolqqa immiza kath demmees.
16 GODAA miththati,
izi tokkida Libaanoose zigati
daro ira uyi kalleettes.
17 Isttan kafoti
bantta keeth keexxeettes;
zigiletikka ziga bolla
keexxidi de7eettes.
18 Dhoqqa zumata bollan
Wushati de7eettes;
qasse guppaleti
shuchcha gongolon qotetteettes.
19 Wodaa qooda erisanaas
neni agina medhdhadasa;
arshey ba wulliza wode erees.
20 Neni dhuma ehiza wode
sa7ay qammees;
wora do7atikka kezidi
woxeretteettes.
21 Wodalla gaammoti
maana miishshas waasseettes;
istti banttas miza miish
Xoossafe koyeettes.
22 Arshey mokkiza wode
guye simmidi
bantta aqoson ichcheettes.
23 He wode asi ba oosos kezees;
sa7ay qammana gakkanaas
ooththees.
24 Abeet GODAWU!
Ne oosoy ay keena daroo!
Ne aadho erateththan
neni istta ubbaa medhdhadasa;
ne medhdhida medhetati
biitta kumida.
25 Hanna abbaya gitanne aaho;
qooday baynda qaaxxiza
medheteththati,
guuththatinne gitati izin kumida.
26 Izi bollan markabeti simeretteettes;
qasse neni medhdhida
Lewataane geetettiza miiminttey
izin kaa7ees.
27 Koshshiza wode ne isttas
mizaaz immana mala
istti ubbay neekko xeelleettes.
28 Neni isttas immida wode
istti shiishsheettes;
neni ne kusheppe yeggiin
istti lo7o miish kalleettes.
29 Neni ne sinththa
genththiza wode dagammeettes;
ne istta shemppo
ekkiza wode hayqqeettes;
duge biittankka simmi geleettes.
30 Gido attiin neni isttas
ne ayana kiittida wode
harati medhetteettes;
biittaaka ooraxissaasa.
31 GODAA bonchchoy mernaas de7o;
GODAY ba ooson ufayetto.
32 Izi biitta xeelliin biittay qaaxxees;
qasse izi zumata bochchiin
zumati cuwatteettes.
33 Tani de7iza layth ubbaan
GODAAS yexxana;
tani shemppora paxa
de7ida wode ubbaan
ta Xoossas yexxana.
34 Tani GODAAN ufayettiza gishshas
ta wozina qofay iza ufaysso.
35 Nagaranchchati biittafe dhayetto;
hayssafe sinththas
iitati dooppetto.
Ta shemppoyee!
GODAA galata!
GODAA galata!