18
Yaka djäma marrŋgitjkalanydja girri'yu
18:9–13 (Avoid occult practices and don’t use magic)
9 “Yo, ŋunhi nhe yurru gulŋiyirrinydja wäŋalilinydja ŋunhimalayi, yaka romgu malthurra walalaŋgalaŋuwunydja ŋunhi walala yukurra nhina ŋunhiliyi; ŋunhiyi walalaŋgu romdja mirithirrina yana yätjnha wal'ŋu.
10-11 Yaka wekaŋa nhumalaŋguway nhuma yumurrku'nhanydja bitjan mundhurr bathanarawu ŋuriki walalaŋgalaŋuwu waŋarrwu. Yakana ŋula waŋgany nhumalaŋgalanydja malaŋura yurru djäma ŋula nhä gaḏamandhinyaramirri rom, be galŋa‐mangaṯa'mirriyunydja yurru djäma, ga yaka nhuma yukurra yurru waŋa bitjan buku‐wuykthundja nyirawunuma, ga djäma ŋula nhä marrŋgitjkalanydja girri'yu. Yaka nherrala girri' ŋula nhänydja gunganharamirriyanhamiya ŋuliŋuru yätjkalanydja, yanapi ŋunhiyinydjayi ganydjarrmirri, ga yaka djäma ŋunhiyi be ḏaḏa'yunaramirrinydja rom. Yakana djäma djalaḏaḏany'tja, ga yaka bukukurru waŋiya yukirriya rakunygalanydja ŋurikalanydja birrimbirrwala mokuywalanydja.
12 Ŋurikiyinydjayi malaŋuwu Godtja yukurra wirrkina nyinyaŋdhun wal'ŋu, ga wirrkina yana ŋayi yurru ŋaramurrthirri yolŋu'‐yulŋuwunydja ŋunhi walala yukurra yurru djäma bitjandhiyi yätjtja. Ŋunhala miṯtjiyu Gaynanbuyŋuyu ŋuli yukurra djäma bitjandhinydja, ga ŋurikiyina märrwu ŋunhi ŋayi Godthunydja walalanha yurru dhawaṯmaramana yanana ŋuliŋuruyi wäŋaŋurunydja.
13 Yaka nhenydja balanyarayi djäma yätj. Nhumanydja yurru nhina yukurra ḏarrtjalk gal'ŋu yana, ganaŋ'thunara ŋuliŋuruyi yätjkalanydja, ŋunhiliyi liŋgu waŋganyŋura romŋura Garraywala yana.”
Godthunydja djuy'yun yurru dhäwu'‐gänharamirrinhana
18:14–22 (God will send a Prophet)
14 Ga biyapul ŋayi Mawtjitj waŋana bitjarranydja, “Yo, galkina nhuma yurru gulŋiyirrina ŋunhimalayi wäŋalili dhawu'‐nherraṉarawuylilinydja. Ŋunhilinydja wäŋaŋura yolŋu walala yukurra nhina goŋ‐maŋgimaŋgi'mirri dhika nhä malanha, ŋunhi walala ŋuli barrari‐wukuma yolŋunha walalanha, bitjan ḻakarama yukurra ŋunhi yurru ŋayi nhä maḻŋ'thun yalala yätj wal'ŋu, liŋgu walala ŋuli nhäma yukurra ŋunhiyi bukaway'kurru, wo ŋuliwitjandhi ŋunhi walala yurru nhäma yukurra ŋula nhä. Nhumanydja dhuwalanydja Garraywu nhanŋuway yolŋu walala, yakana nhuma yurru maḻŋ'marama yuwalkŋunydja dhukarr ŋuriŋiyinydjayi nhäyu malaŋuyu romdhu. Yaka nhumanydja yurru biyakayi malthurra dhärukku walalaŋgalaŋuwu.
15 Ŋayipinydja yurru Godthunydja nhumalaŋgunydja djuy'yun warray dhäwu'‐gänharamirrinha yolŋunha, ŋayinydja yurru ŋunhiyi yolŋu yana, bitjan ŋarrapi, bitjan ŋayi yurru dhawal‐wuyaŋirrinydja dhipuŋuru ŋilimurruŋgala yarraṯaŋuru, ŋurikiyina nhuma yurru yukurra dhärukkunydja malthun.
16 “Ŋäthilinydja ŋunhinydja ŋunhi nhuma ḻuŋ'maranhamina yukurrana ŋunhili bukuŋura Djäniya yäkuŋura, nhuma waŋana bitjarra, ‘Ŋanapurrunydja yaka ḏukṯuk ŋanapurru yurru ŋäma yukurra rirrakay Godnha, ga yaka ŋanapurru ḏukṯuk ŋanapurru yurru nhäma ŋanya ŋunhiwalayi gurthalili. Ŋanapurru ŋuli bäynha rakunydhi.’ Bitjarranydja nhuma waŋana, liŋgu nhuma borrk‐beyaṉiyinana wirrkina wal'ŋu.
17 Bala ŋayi Garraynydja waŋana ŋarrakala bitjarrana, ‘Yo manymak.
18 Ŋarranydja yurru yänguma ŋunhiyinayi dhäwu'‐gänharamirrinhana, ŋayinydja yurru ŋunhiyi yolŋu yana rumbalnydja bitjan nhuma, ga marrtjinydja ŋayi yurru dhawaṯthundja ŋunhiyi dhipuŋuru nhumalaŋgala miṯtjiŋurunydja. Ŋarra yurru nhanŋu dhäruktja wekama waŋanharawunydja, bala ŋayi yurru ḻakaramanydja nhanukalaŋuwu yolŋu'‐yulŋuwunydja warrpam' yana ŋunhi ŋarra yurru waŋa yukurra nhanukala.
19 Waŋanydja ŋayi yurru yukurra ŋarrakala yana yäkuyu, ga ŋunhi yurru ŋula yol yolŋu yakanydja dhäruk märrama ŋanya, ŋarranydja yurru ŋanya dhä‐ḏir'yunna ŋunhiyinydjayi dhäruk‐märranharamiriwnhanydja yolŋunha.’
20 “Ŋunhi ŋayi yurru wiripunydja yolŋu waŋa bitjan gam', ‘Dhuwala dhäruktja ŋarra yukurra gäma Garraywuŋu’ bitjan yurru, yurru dhäruktja ŋunhiyinydjayi yaka ŋarrakuŋu wekanhara, bala nhuma yurru yana bumana ŋanya rakunygumana ŋunhiyinydjayi yolŋunha, liŋgu ŋayinydja yukurra ŋunhiyinydja waŋa yolŋu yäkuyu be yolkalana wiripuŋuwalana waŋarrwala.
21 “Ga wiripunydja mak nhe yurru waŋa bitjan, ‘Nhaltjan dhika ŋarra yurru dharaŋandja ŋunhiyi yuwalkŋunhanydja dhäwu'mirrinha? . . . wanhaka ŋayi yurru yukurra waŋa yuwalk wal'ŋu ŋulaŋuru Garraywuŋu dhäruk mak ŋula yolkuŋu?’ Bitjandhiyi nhe yurru djarr'yundja ŋunhiyi dhäwu'mirrinhanydja yolŋunha.
22 Ŋuli nhe yurru ŋäma yolŋunha ŋunhi ŋayi yurru waŋa Garraywala yäkuyu, ŋunhi ŋayi yurru waŋanydja, ga yakanydja yurru ŋayi ŋunhiyi maḻŋ'thun, bala nhe yurru marŋgithirrina ŋunhi ŋurikalayinydja yolŋuwala yakana dhäruk wekanhara ŋulaŋuru Garraywuŋu. Ŋunhiyinydjayi yolŋu waŋa yukurra yana ŋuliŋuruna bäymana nhanukuŋuwaynha guyaŋinyarawuy. Yaka barrariyanydja ŋuriki yolŋuwu dhärukkunydja.”