38
Walala nherrara Djiramayanha ŋarŋgalili dhoḻumirrililina
38:1–13 (They put Jeremiah into a deep hole)
1-2 Yo, bala ŋayi Djiramayayunydja yukurrana ḻakaraŋalana yolŋu'‐yulŋuwana bitjarrana gam', “Garraynydja waŋana bitjarra, ‘Ŋuli nhuma yurru nhina yukurra dhiyalayinydjayi wäŋaŋura, nhumanydja yurru murrmurryunna ŋuriŋina bunharayu djaṉŋarrthinyarayuna ŋula nhäyuna, ga ŋuli nhuma yurru wekanharamirri nhumalanhay nhuma ŋurukala Bapilunbuyŋuwala, nhumanydja yurru walŋana nhina.’ ”
3 Ga bitjarrayi ŋarra ḻakaraŋalanydja walalambala, “Ŋurukuy Bapilunbuynydja yurru marrtji, ga djaw'yunna, bumana yurru dhuwalanydja wäŋa,” bitjarra ŋayi Garray waŋananydja.
4 Ga walala ŋunhi ŋurru'‐ŋurruŋuyunydja ŋaḻapaḻmirriyunydja ŋäkula, bala walala marrtjina ŋurikala buŋgawawalana, ga waŋana ḻakaraŋala bitjarra, “Bumana ŋilimurru yurru ŋanya, murrkay'kumana ŋunhayinydja yolŋunha,” bitjarra. “Ŋuruŋuyinydjayi yolŋuyu yukurra yolŋu'‐yulŋunhana barrari‐wukuma yalŋgi'kumana. Yakana ŋayi yukurra guŋga'yundja ŋanapurrunha, yana ŋayi yukurra ŋanapurrunhanydja baḏuwaḏuyunna.”
5 Ga ŋayinydja waŋana ŋunhi buŋgawanydja bitjarra, “Yo manymak, nhumalaŋgalana ŋayi ŋunhi goŋŋuranydja. Nhumapina ŋanya yurru ŋula nhaltjandja nhäku nhuma ḏukṯuk.”
6 Bala walala yuwalkthi ŋanya märraŋalanydja, bala galkara ŋarŋgalilina ŋunhana wal'ŋu. Yo, bäyŋu ŋunhilimi ŋula ŋarŋgaŋura gapunydja, yana dhoḻuna waŋganynha ŋunhilimiyi, bala walala ŋanya dhuryunmaraŋalana marrtjina bala‐a‐a, yana liŋgu ga nherrara ŋanya ŋunhiwalayi dhoḻulili.
7-8 Bala ŋayi waŋganydhunydja yolŋuyu ŋäkula ŋanya, bala ŋayi marrtjinana yana buŋgawawalana wäŋalili, ga ḻakaraŋala nhanbala bitjarra,
9 “Way, ŋunha Djiramayanhanydja walala nherrara ŋunhana ŋarŋgalilina. Yätjnha ŋunhi mirithirrina yulŋunydja. Ŋayi ŋuli gonhana rakunydhi, liŋgu bäyŋuna ŋunhayi, ŋathamiriwnha wäŋanydja.”
10 Ga ŋayinydja ŋunhi buŋgawanydja waŋana bitjarra, “Gatjuy, marrtjiya, ga dhawaṯmaraŋana ŋanya ḏulŋurr'yurrana ŋuliŋuruyi, ŋayi ŋuli bäynha rakunydhi.”
11-13 Bala ŋayi ŋunhiyinydja marrtjinana ḏarramu, märraŋala raki' ga dhomala, bala dhuryunmaraŋalana ŋunhiyi rakiny'tja, bala warryurrunana ŋanya beŋuru ŋarŋgaŋurunydja. Ga dhäŋuru ŋuliŋuruyinydjayi ŋanya walala nherrara ŋunhana wal'ŋu buŋgawawalana wäŋalili, yurru märr‐warraŋulliliyi.