39
Bapilunbuyŋuyu baḏuwaḏuyurrunana wäŋa Djurutjalamdja, bala yolŋu'‐yulŋunhanydja djaw'‐djawyurrunana
39:1–18 (The Babylonians destroyed Jerusalem and took the people to their own land)
1 Ga yuwalkthi ŋunhi maḻŋ'thurrunanydja bitjarrayi, bitjarra yana liŋgu ŋunhi ŋayi Djiramayayu ŋäthili walalaŋgala ḻakaraŋala, liŋgu buŋgawa ŋurukuy Bapilunbuynydja marrtjinana lili ŋulinyaramirriyunydja ŋunhi Djitakayana yukurrana buŋgawa nhinana ŋuruku Djudawuyŋunydja.
2-3 Yo, ŋunhi miriŋu walala marrtjinana lili, ŋurruthinana yana biyapulnha miṯtji dhaŋaŋnha, bala ḏaw'‐ḏawyurrunana marrtjina buku‐yupmaraŋalana ḻoḻunydja ŋunhi ḻiw'maraŋalana, ga buṉbunydja malanha Djurutjalambuy, bala walala djaw'‐djawyurrunana märra'‐marraŋalana marrtjina ŋunhiyi yolŋu'‐yulŋunhanydja bena‐wala walalaŋgalaynha wäŋalili.
4-6 Ŋayi ŋunhi buŋgawa Djitakaya ga nhanŋu guŋga'yunaramirri walala, walala guyaŋina yukurrana bitjarra, walala yurru winya'‐winyayun gayul munhaku, yurru walalanydja ŋunhi Bapilunbuyŋuyunydja miriŋuyu ŋupara warray walalanha, ga yana liŋgu ga mulka'‐mulkana. Bala walala ŋunhi märraŋalana ŋuriki buŋgawawunydja gäthu'mirriŋunha walalanha, bala gumurrŋurana nhanukala bumaranydja, dharpuŋalanydja walalanha murrkay'kuŋalana, ga bitjarrayi liŋgu walala bumarayi ŋurru'‐ŋurruŋunha Djudawuynha walalanha.
7 Ga dhäŋuru ŋuliŋuruyi walala bambaykuŋala Djitakayanhanydja, bala ḏapṯapmaraŋalana ŋanya raki'yuna.
8 Bala walala dhuŋgur'yurrunana marrtjina buŋgawamirriwunydja wäŋa, ga wiripu malanha wäŋa dhuŋgur'yurrunana.
9 Bala walala djaw'‐djawyurrunana ŋunhi buŋgawanha ga bukmaknha ŋunhi yolŋu'‐yulŋunha ḏapṯapmaranharana, bala djaw'‐djawyurrunana yana balayina walalaŋgalaynha walala wäŋalili.
10 Märr‐ḻurrkun'nha ŋunhi ŋurruwuykmirrina yolŋu walala yukurrana baḏaktja nhinana ŋunhili ŋayilpiŋuranydja.
11-12 Ŋayi ŋunhi Bapilunbuynydja buŋgawa yäku Nipukanitjanydja waŋana bitjarra nhanukalaŋuwala ŋurikala miriŋuwala, “Marrtjiya ga maḻŋ'maraŋa Djiramayanha, ga märraŋa ŋanya ga djäkanydja nhanŋu ŋamathaŋa wal'ŋu yana, yaka ŋanya ŋula buŋanydja ŋayaŋu‐yätjkuŋanydja.”
13-14 Bala walala marrtjinana, ga maḻŋ'‐gay ŋanya, bala dhawaṯmaraŋalana ŋuliŋuruyi ḻoḻuŋurunydja, ŋunhi ŋayi yukurrana nhinana gaṯ‐gaṯŋura nhanukalayŋuwuŋu yolŋu'‐yulŋuwuŋu. Walala dhawaṯmaraŋalanydja ŋanya yänana, bala ŋayi nhinanana yukurrana ŋunhala Djurutjalamnha.
15-16 Ga yuwalk ŋayi yana Garrayyu ḻakaraŋalanydja Djiramayawala ŋäthili yana gal'ŋu bitjarra, “Yuwalk dhuwalayi yana yurru wäŋanydja warrpam'thun baḏuwaḏuyun, ga nhenydja yurru nhämana, yurru yakana nhuna yurru ŋula yolthu ŋayaŋu‐yätjkumanydja.
17-18 Ŋarra nhunanydja yurru gunganhamirriyama, yakana yurru ŋuruŋu miriŋuyunydja nhuna buma. Ŋarrapi yana nhuna yurru guŋga'yundja walŋakumanydja, liŋgu nhe ŋarrakala märr‐nherraṉmina yuwalkkuŋala yana.” Ga bitjarra ŋayi yukurrana Garrayyu ḻakaraŋalanydja Djiramayawala, yurruna ŋunhiyi maḻŋ'thurruna.