10
Mboroyocui michiño uicuaaca icavi vae Tumpa uyapota vae. Uicuaaca cavi'ã. Echa'ã maemɨmba uyeyucacue reta uñemee Tumpa pe opa año. Ẽrei jocua nunga ipuere'ã etei opa umbai jucuarãi oya Tumpa re vae reta imbaeyoa reta. Echa'ã ipuere yave mona opa umbai, uñemee yeta'ã tẽi co maemɨmba uyeyucacue reta. Echa'ã jucuarãi umbɨadora Tumpa vae reta ipɨa pe uyemɨngueta yeta'ã tẽi co jecuaeño mbaeyoa reta güɨnoi vae re. Ẽrei jocua maemɨmba uyeyucacue reta Tumpa pe uñemee vae umɨmandúa opa año Israel pegua reta imbaeyoa reta re. Echa'ã toro jugüɨ jare capura jugüɨ ipuere'ã etei umɨcañɨ ete mbaeyoa reta.
Jáeramo Cristo ou yave cua ɨvɨ pe, jei Tumpa pe cuarãi:
“Ndipota'ã jocua maemɨmba uyeyucacue uñemee ndeve vae reta.
Jáeramo nde nemee cheve cherete uñemee vaerã.
Maemɨmba uyeyucacue reta ocai uñemee vaerã ndeve.
Ẽrei jocua reta nembɨyerovia'ã.
Jae ramiño vi maemɨmba uyeyucacue reta mbaeyoa reta re uñemee vae nembɨyerovia'ã.
Jayave che jae ndeve:
‘Mase, che ayu ayapo vaerã nde ndere vae.
Nde co jae Tumpa.
Echa'ã jucuarãi uyecuatía oĩ cheré niñee pe.’ ”
Jucuarãi jei Cristo Tumpa pe. Cristo jei tenonde voi cuarãi:
“Ndipota'ã jocua maemɨmba uyeyucacue uñemee ndeve vae reta.
Maemɨmba uyeyucacue reta ocai uñemee vaerã ndeve.
Ẽrei jocua reta nembɨyerovia'ã.
Jae ramiño vi maemɨmba uyeyucacue reta mbaeyoa reta re uñemee vae nembɨyerovia'ã.”
Jucuarãi jei, yepe tẽi jocua nunga uñemee Tumpa pe mboroyocui rupi. Jayave jocua jaɨcue rupi jei ye cuarãi:
“Mase, che ayu ayapo vaerã nde ndere vae.
Nde co jae Tumpa.”
Jucuarãi jei. Cua uipota jei jocua maemɨmba uyeyucacue uñemee vae reta mbaetɨ ma co mbaerã icavi, jare jocua ipepɨca pe Cristo jete uñemee Tumpa pe. 10 Echa'ã Jesucristo umee jete Tumpa pe penti veseño jaeño mai pegua. Jare cua jeco pegua Tumpa ñaneñono tee iyupeguarã jei vae rupi.
11 Jocua ɨvɨ pegua sacerdote reta uyemboɨ Tumpa jo pe opa ara rupi uyeyocui vaerã Tumpa pe. Jeta vese jae reta umee Tumpa pe maemɨmba uyeyucacue reta. Opa ara jocua jocuaño uyapo reta. Ẽrei jocua nunga ipuere'ã etei umbai mbaeyoa reta. 12 Ẽrei cua cuimbae Cristo jee vae umano umee vaerã jete Tumpa pe. Penti veseño jucuarãi uyapo, ipuere vaerã umbai mbaeyoa reta jaeño mai pegua. Jare jocua jaɨcue rupi uguapɨ Tumpa iyɨpɨ pe iyacata cotɨ. 13 Jare uguapɨ joco pe güive, jecuaeño uãro oĩ Tumpa opa umɨamɨri vaerã jovaicho reta regua. 14 Echa'ã penti veseño umee jete Tumpa pe, jare jucuarãi umbɨasa ete jaeño mai pegua Tumpa oñono tee iyupeguarã vae reta.
15 Jare Espíritu Santo vi umɨmbeu cua yandeve. Echa'ã uyecuatía oĩ Tumpa iñee pe quirãi yandeYa tenonde voi jei cuarãi:
16 “Jocua ara reta rendave pe ameeta cua trato ipɨau vae chupe reta.
Ipɨa pe ambɨyemɨnguetata reta cheporoyocui reta re,
jare ayapocata chupe reta cheporoyocui reta.”
Jucuarãi jei. 17 Jayave taɨcue rupi jei cuarãi:
“Jare ndarau ye chemandúa imbaeyoa reta re.”
Jucuarãi jei. 18 Jare Tumpa umbɨasa yandeve yanembaeyoa reta ramo, mbaetɨ ma mbae ñamee vaerã yanembaeyoa reta re.
Yaique Tumpa oĩ vae pe
19 Jáeramo, cherɨvɨ reta, yandepuere yaique yaquɨye mbae reve Tumpa oĩ vae pe Jesús jugüɨ jeco pegua. 20 Echa'ã Jesús umano yanderé yandepuere vaerã yaique Tumpa oĩ vae pe, maemɨmba uyeyuca yave sacerdote tenondegua uique Lugar Santísimo pe rami. Jucuarãi Jesús uyapo yandeve penti tape ipɨau vae Tumpa oĩ vae pe, ñanoi vaerã tecove opa mbae vae. 21 Yande co jae Tumpa imbae reta, jare Jesús co jae sacerdote tenondegua uyerure Tumpa pe yanderé vae. 22 Jáeramo yaya Tumpa re ñanequɨrẽɨ ngatu reve. Yarovia Tumpa uipota co yaya vaerã jese. Sacerdote ɨvɨ pegua oyase Tumpa re yave, uyeɨpi tugüɨ pe jare oyoe jete ɨ icavi vae pe. Jae ramiño vi yande yaya Tumpa re yave, tuyeyoe Tumpa cotɨ mbaeyoa güi yandepɨa jare yanderete. 23 Jecuaeño ñaneratangãtu yamɨmbeu vaerã ĩru vae reta pe ñaãro ñaĩ yayerovia reve vae. Echa'ã yandepuere yarovia catu Tumpa jei umeeta yandeve vae. 24 Jare yayandareco yandiyee. Ñañemɨatangãtu yayerau vaerã jare icavi vae yayapo vaerã. 25 Amocue vae uyembatɨ'ã ma ĩru upurugüɨrovia vae reta ndive. Agüɨye yayapo jae reta rami. Yayembatɨ jare ñañemɨatangãtu. Ñañemɨatangãtu ete, yaicuaa jocua ara outa ma oĩ ramo.
26 Ẽrei yandeyoa yave ñanequɨrẽɨ ngatu reve añete vae yaicuaa yave, mbaetɨ ye ma quía uñemee vaerã mbaeyoa reta re. 27 Jaeño ñaãrota yaquɨye reve Tumpa ñanerãa vaerã. Echa'ã Tumpa pochɨ ete jovaicho reta pe. Jae co penti tata mbaembae opa uapɨ vae rami. 28 Penti Israel pegua Moisés iporoyocui uyapo'ã vae umano, ĩru mocui ani mbapɨ Israel pegua reta umɨmbeu yave imbaeyoa re. Ĩru vae reta uiparareco'ã etei. 29 Ẽrei Tumpa upuruãa yave, güɨrɨ̃ro Tumpa Taɨ vae uiporara eteta Israel pegua reta güi. Echa'ã güɨrɨ̃ro Tumpa Taɨ vae ipɨa pe uyemɨngueta Tumpa Taɨ jugüɨ mbae'ã co, yepe tẽi jocua jugüɨ uicuaaca chupe trato Tumpa umee chupe vae, jare jocua jugüɨ rupi Tumpa oñono teeta tẽi iyupeguarã. Jucuarãi güɨrɨ̃ro Tumpa Taɨ vae güɨrɨ̃ro vi Espíritu Santo ipɨacavi. 30 Yaicuaa co Tumpa jare quirãi jae jei Israel pegua reta pe cuarãi:
“Che co jae peYa.
Che puãata co.
Che aiporaracata co peve.”
Jucuarãi jei. Jare yaicuaa quirãi jei vi chupe reta cuarãi:
“Che co jae peYa.
Pe reta co jae chembae reta.
Che puãata co.”
Jucuarãi jei vi. 31 Penti quɨye tuicha vae co Tumpa imeño mai ico vae uiporaraca yave quía nunga vae pe.
32 Ẽrei pemandúa ara reta uasa vae re. Jocua ara reta pe, Cristo re piyemboe yave, ĩru vae reta uiporaraca ete peve, ẽrei jecuaeño pepɨrãta pepurugüɨrovia re. 33 Ĩru vae reta pererɨ̃ro. Echa'ã jei reta icavi mbae vae peve jare uyapo reta icavi mbae vae peve. Jae ramiño vi piñemɨĩru ma jucuarãi uiporara vae reta ndive. 34 Echa'ã piparareco peresorɨru pe ñugüɨnoi vae reta. Jare ĩru vae reta pembaembae upɨ̃ro pegüi yave, piyerovia catu. Echa'ã picuaa penoi co ara pe mbaembae icavi ete jocua güi vae. Echa'ã mbaembae ara pegua jaeño mai pegua co. Ẽrei mbaembae ɨvɨ pegua jaeño mai pegua'ã co. 35 Jáeramo jecuaeño perovia catu Tumpa pequɨye mbae reve, Tumpa umee vaerã peve icavi ete vae. 36 Echa'ã Tumpa uipota pepɨaguasu vaerã. Jucuarãi yave, Tumpa umeeta peve jei umeeta vae, opa ma piyapo yave Tumpa jei vae. 37 Tumpa iñee pe uyecuatía oĩ cuarãi:
“Ɨmambae jae outa vae outa co.
Ou seri ma co oĩ.
38 Tumpa umbujupi vae güɨnoita tecove opa mbae vae, upurugüɨrovia ramo.
Ẽrei ime yave quía opia Tumpa güi vae, ndarau ayerovia jese.”
Jucuarãi uyecuatía oĩ. 39 Ẽrei yande jae'ã co Tumpa güi opia vae reta. Echa'ã jae reta yugüɨraata cañɨtei pe. Yande yapurugüɨrovia yanderecove uyembɨasaca vaerã.