3
Cuimbae ipo jovaicho tɨpa vae
(Mt 12.9-14; Lc 6.6-11)
Jesús uique ye judío reta itupao pe, jare joco pe oĩ penti cuimbae ipo jovaicho tɨpa vae. Jare joco pe ñugüɨnoi vae reta umae ngatu Jesús re, uecha vaerã umbɨgüerata ra quía mbutuu ara pe. Echa'ã jae reta uipota tẽi umbɨjeco Jesús. Jayave Jesús jei cuimbae ipo jovaicho tɨpa vae pe:
—Epũa eyu iyemboɨ cua reta jovai.
Jare Jesús upɨrandu joco pe ñugüɨnoi vae reta pe:
—¿Yayapota pa icavi vae ani icavi mbae vae mbutuu ara pe? ¿Icavi pa yapuruepɨ ani yapuruyuca vaerã mbutuu ara pe? ¿Mbae pa jei mboroyocui cua re? —jei chupe reta.
Ẽrei jae reta jei'ã mbae ave. Pochɨ reve Jesús umae iyɨpɨ rupi ñugüɨnoi vae reta re, jare tuicha ipɨatɨtɨ jae reta ipɨatanta ramo.
—Eupi ndepo —jei cuimbae pe.
Jayave cuimbae ipo uupi, jare ucuera voi. Jayave fariseo reta oẽ judío reta itupao güi, jare uyemboemboe voi herodiano reta ndive Jesús re, quirãita ra uyucaca vaerã.
Jeta uyembatɨ ɨ guasu jembeɨ pe
7-8 Jayave Jesús jare jemimboe reta yugüɨraa ɨ guasu pe, jare yugüɨraa vi jaɨcue jeta Galilea güi. Jare yugüeru vi jae oĩ vae pe jeta Judea pegua reta, Jerusalén pegua reta, ɨvɨ Idumea pegua reta, Jordán jovaicho pegua reta, jare tenta guasu Tiro jare Sidón iyɨpɨ rupigua reta, uyandu yave opaete Jesús uyapo vae regua. Jare Jesús oyocui jemimboe reta umɨcuatɨ̃ro chalana jae oĩ vaerã pɨpe, agüɨye vaerã oyopɨ yatɨ vae reta. 10 Echa'ã jae umbɨgüera ma jeta vae, jare opaete ĩru imbaerasɨ vae reta uñemɨañamɨaña yugüeru icotɨ. Echa'ã uipota oya jese, uyavɨquɨ vaerã. 11 Jare aña reta uecha Jesús yave, uyeatɨca jae jovai jare iñeeãta reve jei:
—Nde co jae Tumpa Taɨ.
12 Jare Jesús oyocui ete:
—Agüɨye pemɨmbeu quía co che.
Jesús uiparavo doce cuimbae reta
(Mt 10.1-4; Lc 6.12-16)
13 Jayave Jesús oo ɨvɨtu guasu re, jare ueni jae uiparavo vae retaño. Jare jae reta yugüeru jae oĩ vae pe. 14 Jare jocua reta güi uiparavo doce cuimbae reta umɨĩru vaerã. Jae omondota reta umɨmbeu vaerã Tumpa iñee. 15 Umeeta vi chupe reta mbaepuere umbɨgüera vaerã imbaerasɨ vae reta jare umbɨsɨrɨ vaerã aña reta oya jese vae reta güi. 16 Cua co jae uiparavo vae reta jee: Simón (Jesús umbɨjee Pedro), 17 jare Zebedeo taɨ reta Jacobo jare Juan jee vae (Jesús umbɨjee cua mocui reve Boanerges. Cua jee uipota jei: “Ara jɨapu vae rami”), 18 jare Andrés, Felipe, Bartolomé, Mateo, Tomás, Alfeo taɨ Jacobo jee vae, Tadeo, Simón (jae co Zelote pe ueni vae), 19 jare Judas Iscariote (cua cuimbae umee Jesús jovaicho reta pe). Jayave Jesús ou ye jenta pe jae reta ndive.
Jei reta icavi mbae vae Espíritu Santo cotɨ
(Mt 12.22-32; Lc 11.14-23; 12.10)
20 Jare uyembatɨ ye jeta vae. Jáeramo Jesús jare jemimboe reta iquĩi'ã ucaru vaerã. 21 Jesús jentarã reta cua uicuaa yave, yugüeru güɨraa vaerã tẽi.
—Iyaracuaa'ã ma oĩ —jei reta.
22 Jare mboroyocui re oporomboe vae yugüeru Jerusalén güi vae reta jei:
—Aña guasu Beelzebú jee vae oya ma jese, jare aña guasu imbaepuere pe umbɨsɨrɨ aña reta oya jese vae reta güi —jei reta.
23 Jayave Jesús ueni reta, jare jei chupe reta umɨjaanga reve:
—Ndarau Satanás jaei uyembɨsɨrɨ cuimbae güi. 24 Penti tenta guasu pegua reta oyovaicho uyupii yave, opata co jocua tenta guasu. 25 Jae ramiño vi penti tenta pegua reta oyovaicho uyupii yave, opata co jocua tenta. 26 Jare Satanás pochɨ iyupe yave, jare imbaepuere uyembɨyao yave, ndarau tẽi ma ico. Opata tẽi co —jei chupe reta—. 27 Ime yave quía uipota uique cuimbae ipɨrãta vae jenta pe upɨ̃ro vaerã imbaembae chugüi vae, uipocuata rani cuimbae ipɨrãta vae. Jayave ramo ipuereta upɨ̃ro imbaembae chugüi —jei—.
28 Añete che jae peve, opaete ɨvɨ pegua reta imbaeyoa reta jare opaete iñee icavi mbae Tumpa cotɨ jei reta vae Tumpa ipuere umbai. 29 Ẽrei Tumpa ndarau etei umbɨasa jei icavi mbae vae Espíritu Santo cotɨ vae pe. Uyembɨjecota jaeño mai pegua —jei chupe reta.
30 Echa'ã tenonde yave jae reta jei:
—Aña oya ma jese.
Jáeramo Jesús jei jucuarãi chupe reta.
Jesús ichɨ jare tɨvɨ reta
(Mt 12.46-50; Lc 8.19-21)
31 Jayave Jesús ichɨ jare tɨvɨ reta yugüeru uvãe Jesús oĩ vae pe, jare oca güi omondo uenica. 32 Jare uguapɨ ñugüɨnoi iyɨpɨ rupi vae reta jei chupe:
—¡Aipo! Ndesɨ jare nderɨvɨ reta oca pe ñugüɨnoi, jare ndereca.
33 —¿Quía nunga pa co jae chesɨ jare cherɨvɨ reta? —jei Jesús chupe reta.
34 Jayave umae iyɨpɨ rupi uguapɨ ñugüɨnoi vae reta re.
—Cua nunga reta co jae chesɨ jare cherɨvɨ reta —jei—. 35 Echa'ã Tumpa jei vae uyapo vae reta co jae cherɨvɨ jare cherindɨ jare chesɨ —jei.