15
ፆሳይ አብራመራ ጫቅዳ ጫቁዋ
1 ሄሳፈ ጉየ፥ ጎዳይ አብራመስ አሙሆን ቆንጭድ፥
“አብራመ ባቦፋ፥ ታኒ ነዉ ጎንዳለ፥
ነ ዎይቶይ ግታ” ያግስ።
2 ሽን አብራመይ፥ “አቤት ኡባ ሃርያ ጎዳዉ፥ ኔኒ እምያ ዎይቶይ ታዉ አይሴ? ታዉ የሎይ ባዋ፤ ቡሮ ታና ላታናይ ዳማስቆ ኤልአዛራ ግደኔ?
3 አብራመይ፥ ኔኒ ታዉ የሎ እማቦና ግሾ ታ ኬꬃን ደእያ ታ አይለይ ታና ላታና” ያግስ።
4 ጎዳይ እያኮ፥ “ሀ አይለይ ነና ላተና፥ ሽን ነ ጉልባታፐ ከያና ነ ናአይ ነና ላታና” ያግስ።
5 ያግ ስሚድ እያ ካረ ከስድ፥ “ፑደ ሳሎ ፄላ፥ ኔኒ ፆልንቶታ ፓይዳናዉ ዳንዳእኮ ፓይዳ፥ ህዛ ነ ሼሻይካ ሄሳዳ ግዳና” ያግስ።
6 አብራመይ ጎዳ አማንስ፤ ጎዳይ እያዉ ሄሳ ፅሎተꬅ ኦꬅድ ኤክስ።
7 ቃስካ ጎዳይ እያኮ፥ “ኔኒ ሀ ቢታ ላታና መላ ካልዳወታ ቢታፈ ኡረ ካታማፐ ነና ከስዳ ጎዳይ ታና” ያግስ።
8 ሽን አብራመይ እያኮ፥ “አቤት ኡባ ሃርያ ጎዳዉ ሀ ቢታ ታ ላታናይሳ አይብን ኤሮ?” ያግስ።
9 ጎዳይ እያኮ፥ “ሄꬑ ላይꬅ ግድዳ እስ ኡስ፥ እስ ዴሽ፥ እስ ዶርሰነ ሄሳዳካ ሆለነ ጎርለ ታዉ ኤካዳ ያ” ያግስ።
10 አብራመይ ሄሳታ ኡባ ፆሳስ ኤህድ ካፎት አትሽን፥ ሀራታ ቃንፅድ ናምኡ ከስ ሻክድ እሱዋ እሱዋ ግናን ዎꬅስ።
11 አንኮት ሄ አሹዋ ማናዉ ቦላፈ ዎꬍዶሶና፤ ሽን አብራመይ ኤንታ ጎድስ።
12 አው ዉላና ሀንያ ዎደ አብራመ ዎልቃማ ꬍስኮይ ሾጭ የግስ። ዳጋንꬅያ ዎልቃማ ꬉም እያ ቦላ ዎꬍስ።
13 ጎዳይ አብራመኮ፥ “ነ ሼሻይ አላጋ ቢታን በተ አስ ግድድ ዳናይሳ ሎይꬃዳ ኤራ፤ ኤንቲ አይለተꬃን ኦይዱ ፄቱ ላይꬅ ናቀት ሃረታና።
14 ሽን ኤንታና አይለተꬃን ሃርያ ደርያ ታ ፕርዳና፤ ኤንቲ ሄ ቢታፈ ከይሸ ዳሮ ሻሎ ኤክድ ከያና።
15 ነና ግድኮ፥ ኔኒ ነ ማይዛታኮ ሳሮተꬃን ባና። ኔኒ ዳሮ ጭማዳ ሞገታና።
16 ነ ሼሻይ ቡሮ ኦይዳንꬆ የለተꬃን ሀ ቢታ ስማና። አይስ ጊኮ፥ አሞረታ ናጋራይ ፕርደታና ልክያ ቡሮ ጋክቤና” ያግስ።
17 አው ዉልን ሳእ ꬉማ ልንፅ ግን፥ ጮጨ ታማ ጩይነ ታማ ላጮይ በንትድ ሻከትዳ አሹዋ ግዶራ አꬍስ።
18 ሄ ጋላስ ጎዳይ አብራመስ፥ “ግብፀ ሻፋፐ ዶምድ ኤፍራፂሳ ሻፋ ጋካናዉ ደእያ ቢታ ኡባ ታኒ ነ ሼሻስ እማና።
19 ሄ ቢታይ ቄናታ ቢታ፥ ቀነዛታ ቢታ፥ ቃድሞነታ ቢታ፥
20 ህተታ ቢታ፥ ፓርዘታ ቢታ፥ ራፋይመታ ቢታ፥
21 አሞረታ ቢታ፥ ካናነታ ቢታ፥ ገርገሰታ ቢታነ ያቡሰታ ቢታ” ያግድ ጫቅስ።