16
አጋሮነ እስማኤላ
1 አብራመ ማችያ ሶራ እያዉ ናአ የላቡኩ። ሽን እዉ ግብፀፈ ይዳ አጋሮ ጌተትያ ጋꬍንዶይ ደአዉሱ።
2 ሶራ አብራመኮ፥ “ታኒ ናአ የሎና መላ ጎዳይ ታና የሎ ድግስ። ኔኒ ባዳ ታ አይለራ አቃ፤ ታኒ እ ባጋራ ናአ ደማነኮነ ኦን ኤር” ያጋሱ። አብራመይ እ ቆፋ ኤክስ።
3 አብራመይ ካናነ ቢታን ታሙ ላይꬅ ደእዳፐ ጉየ፥ እያ ማችያ ሶራ ግብፀፈ ይዳ ባ አይልዉ አጋሮ ባ አዝናስ ማቾ ኦꬃዳ እማሱ።
4 አብራመይ አጋሮ ኤክስ፥ እያካ ቃንꬃታሱ። እያ ባዉ ቃንꬃትዳይሳ ኤርዳ ዎደ ባ ጎዳትዉ ካꬋሱ።
5 ሶራ አብራመኮ፥ “ሀ ቆሁዋስ ታና ጋꬅዳይ ነና፤ ታኒ ታ አይልዉ ነዉ እምን፥ እያ ቃንꬃትድይሳ በአዳ ታና ካꬋዉሱ። ነባነ ታባ ጎዳይ ፕርዶ” ያጋሱ።
6 አብራመይ ሶራኮ፥ “ሀኖ በአ ነ አይልዉ እያ ነ ኩሸና፤ ነና ሎእዳባ ኦꬃ” ያግስ። ሄሳፈ ጉየ፥ ሶራ አጋሮ ኡንኤꬅን ያፐ ከያዳ ባቃታሱ።
7 ጎዳ ኪታንቾይ አጋሮ መላ ቢታን፥ ፑልቶ ሃꬃ ማታን ደምስ፤ ሄ ፑልቶይ ሹራ ቢታ ኤፍያ ኦግያ ማታን ደኤስ።
8 ኪታንቾይ አጋሮ፥ “ሶራ አይለተ፥ አጋረ፥ አዉፐ ያዲ? አዉ ባይ?” ያግድ ኦይችስ።
አጋራ ዛራዳ፥ “ታኒ ታ ጎዳተ ሶራፐ ባቃታስ” ያጋሱ።
9 ጎዳ ኪታንቾይ ኢኮ፥ “ነ ጎዳተኮ ስማ ባዳ እዉ ሃረታ” ያግድ ኦድስ።
10 ጉጅድካ ጎዳ ኪታንቾይ ኢኮ፥ “ነ የለተꬃ ኦንካ ታይባናዉ ዳንዳኦናዳ ኦꬃዳ ዳርሳና” ያግስ።
11 ቃስካ ጎዳ ኪታንቾይ እዮ፥
“ሄኮ ኔኒ ቃንꬃታዳሳ፥
ኔኒ አደ ናአ የላና።
ፆሳይ ነ ዋሱዋ ስእዳ ግሾ
እያ ኔኒ እስማኤላ ጋዳ ሱንꬃና
12 እ ባዞ ሀረ መላ ግዳና፥
እ ባ ቀስያ አሳ ኡባ ቦላ ደንꬃና፥
ቃስ አሳ ኡባይካ ባንታ ቀስያ እያ ቦላ ደንꬃና።
እ ባ እሻታ ኡባራ እፆን ደአና”
ያግስ።
13 አጋራ ባራ ኦደትዳ ጎዳ፥ “ኔኒ ታና በእያ ፆሳ” ያጋዳ ፄጋሱ። “ታኒ ታና በኤይሳ በአስ” ያጋሱ።
14 ሄሳፈ ደንዶይሳን ሄ ፑልቶ ሃꬃይ፥ “ታና በእያ ደኦ ፆሳ ፑልቱዋ” ጌተትድ ፄገትስ። ሄ ሃꬃ ፑልቶይ ቃደሳፐነ ባሬዳፐ ግዶን ደኤስ።
15 አጋራ አብራመስ አደ ናአ የላሱ፤ አብራመይ የለትዳ ናአ እስማኤላ ግድ ሱንꬅስ።
16 አጋራ አብራመስ እስማኤላ የልያ ዎደ አብራመስ ላይꬅ ሆስፑን ታማነ ኡሱፑና።