1 አብራመስ ላይꬅ ኡዱፉን ታማነ ኡዱፉና ግድያ ዎደ፥ ጎዳይ እያዉ ቆንጭድ፥ “ታኒ ኡባ ዳንዳእያ ፆሳ፥ ታዉ ኪተታ፥ ታ ስንꬃን ፖሎ ግዳ። 2 ታ ግዶንነ ነ ግዶን ደእያ ጫቁዋ ታ ምንꬃና፤ ታኒ ነ ዘረꬃ ታይባናዉ ዳንዳኤቶናዳ ኦꬃና” ያግስ። 3 አብራመይ ባ ሶምኡዋራ ሳአን ዱገ ጉፋንን ፆሳይ እያኮ፥ 4 “ሄኮ ታ ነዉ ጫቅያ ጫቆይ ሀይሳ፤ ነ ዳሮ ካዎተꬃታስ አዋ ግዳና። 5 ታ ነና ዳሮ ካዎተꬃታስ አዋ ኦꬃና ግሾ ህዛፐ ነ ሱንꬃይ አብራመ * ግድ ፄገተና፥ ሽን ነ ሱንꬃይ አብራሃመ † ግድ ፄገታና። 6 ታኒ ነ የለተꬃ ዳርሳና፥ ታ ነና ዳሮ ደረ ከሳና፥ ካዎት ኔፐ ከያና። 7 ታኒ ነዉነ ኔፐ ጉየን ነ ሼሻስ ፆሰ ግዳና መላ መርና ጫቁዋ ታ ግዶንነ ነ ግዶን፥ ኔፐ ጉየራ ያ ነ ሼሻ ግዱዋን፥ የለተꬃፈ የለተꬃ ጋካናስ ታ ጫቃስ። 8 ኔኒ ሀእ በተ ግዳዳ ደእያ ካናነ ቢታ ኡባ ነዉነ ኔፐ ጉየራ ያ ነ ሼሻስ መርና ላታ ግዳና መላ ነዉ እማና፤ ቃስ ታኒ ኤንታ ፆሳ ግዳና” ያግስ።

9 ቃስካ ፆሳይ አብራሃመ፥ “ነና ግድኮ ታ ጫቁዋ ናጋ፤ ነካ ኔፐ ጉየራ ያ ነ ሼሻት፥ የለተꬃፈ የለተꬃ ጋካናዉ ናግተ። 10 ታ ግዱዋንነ ነ ግዱዋን፥ ኔፐ ጉየራ ያ ነ ሼሻ ግዶን ህንተ ናጋና ጫቆይ ሀይሳ፤ ህንተ ግዱዋን ደእያ አደ ኡባይ ቃፃረቶ። 11 ህንተ አደተꬃ ኮሁዋ ዶካልተ፤ ሄስ ታ ግዶንነ ህንተ ግዶን ደእያ ጫቁዋስ ማላ ግዳና። 12 ህዛፐ ያና የለተꬃን አደ ናይት ኡባይ የለትዳ ሆስፑንꬆ ጋላሳን ቃፃረቶ። ነ ሶን የለትዳይሳታ ግድን፥ ዎይኮ አላጋፐ ሚሸን ሻመትዳ አይለታ ግድን፥ ነ ዘረꬃፈ ግዶናይሳታ ዶካላ። 13 ነ ሶን የለትዳይሳታ ግድን ዎይኮ ሚሸን ሻመትዳይሳት ቃፃረታናዉ በሴስ። ሀይሳን ህንተ አሹዋን ደእያ ታ ጫቆይ መርና ጫቆ ግዳና። 14 ኦንካ ቃፃረቶና ደእያ አደ አስ ኡባይ ታ ጫቁዋ መንꬅዳ ግሾ ባ አሳፐ ዱፆ” ያግስ።

15 ፆሳይ አብራሃመኮ፥ “ህዛፐ ነ ማቸ ሱንꬃይ ሶራ ግድ ፄገቶፎ፤ ሀችፈ ዶምድ እ ሱንꬃይ ሳራ ጌተቶ። 16 ታኒ እዮ አንጃና፤ ታኒ ኢፐ ነዉ አደ ናአ እማና። ታኒ እዮ አንጃና ግሾ እያ ካዎተꬃታስ አዮ ግዳና፤ ደርያ ካዎት ኢፐ ከያና” ያግስ።

17 አብራሃመይ ባ ሶምኡዋራ ሳአን ጉፋንድ፥ “ሀይ አሳዉ፥ ፄቱ ላይꬃ አስ ናአ የላኔ? ኡዱፉን ታሙ ላይꬅ ግድዳ ሳርካ ናአ የላኔ?” ያግድ ባ ዎዛናን ሚጭስ። 18 አብራሃመይ ፆሳኮ፥ “እስማኤል ታና ላታና መላ ነ እያ አንጃርክ” ያግስ።

19 ሽን ፆሳይ፥ “አካይ፥ ነ ማችያ ሳራ ነዉ አደ ናአ የላና፥ ኔኒ እያ ይሳቃ ‡ ጋዳ ሱንꬃና። ታኒ እያፐ ጉየራ ያ እያ ዘረꬃስ መርና ጫቆ ግዳና መላ እያራ ታ ጫቁዋ ጫቃና። 20 እስማኤላባ ነ ታና ኦይችዳ ኦይሻ ስአስ። ታኒ እያካ አንጃና። ታ እያ አይፍሳና፥ እያ የለተꬃ ሎይꬃ ዳርሳና። እ ታማነ ናምኡ ሃረይሳታስ አዋ ግዳና። ታኒ እያ ግታ ካዎተꬅ ከሳና። 21 ሽን ታ ጫቁዋ ዎንቶ ላይꬅ ሀኖደ ሳራ ነዉ የልያ ናአ ይሳቃራ ጫቃና” ያግስ። 22 ፆሳይ አብራሃመራ ኦደትድ ኦንግዳፐ ጉየ እያፐ ሻከትድ ፑደ ብስ።

23 ሄ ጋላስ አብራሃመይ ባ ናአ እስማኤላ፥ ባ ሶን የለትዳይሳታነ ባ ሚሸን ሻምዳይሳታ፥ ባ ሶን ደእያ አደ አሳ ኡባ ፆሳይ እያ ኪትዳይሳዳ ቃፃርስ 24 አብራሃመይ ቃፃረትያ ዎደ እያዉ ላይꬅ ኡዱፉን ታማነ ኡዱፉና። 25 እያ ናአይ እስማኤል ቃፃረትያ ዎደ ታማነ ሄꬑ ላይꬃ ናአ። 26 አብራሃመይነ እያ ናአ እስማኤል ናምአትካ ሄ ጋላስ ቃፃረትዶሶና። 27 አብራሃመ ሶን ደእያ አደ ኡባይ፥ እያ ሶን የለትዳይሳትነ ሚሸን ሻመትዳይሳት ኡባይ እያራ ቃፃረትዶሶና።