18
ሄꬑ እማꬃታ
1 አብራሃመይ ማምረ ግታ ምꬃታ ጋርሳን ባ ዱንካንያ ፐንገን ሴታ ጋላስ ኡትዳሽን ጎዳይ እያዉ ቆንጭስ።
2 አብራሃመይ ꬎቁ ግድ ፄልያ ዎደ እያ ማታን ኤቅዳ ሄꬑ አሳታ በእስ። እ ኤንታ በእድ ኤንታራ ጋሄታናዉ ባ ዱንካንያ ፐንገፈ ደንድድ ኤንታኮ ዎፅ ብድ ኤንታ ስንꬃን ዝግስ።
3 ያን ስሚድ፥ “አቤት ታ ጎዳዉ፥ ታ ነ ስንꬃን ሳባ ደምዳባ ግድኮ ታና ነ አይልያ አጋዳ አꬎፋ።
4 ጉꬃ ሃꬅ ዪኮ ህንተ ቶሆይ ሜጨትኮ ሀ ምꬃ ኩያን ሸምፕ ኤክተ።
5 ህንተ ታኮ ህንተ አይልያኮ ይዳ ግሾ ፃልድ ህንተ ብያ በሲ ባና መላ ታኒ ህንተዉ ምያባ ኤሀና” ያግስ።
ኤንትካ፥ “ዳሮ ሎኦ፥ ነ ግዳይሳዳ ኦꬃ” ያግዶሶና።
6 አብራሃመይ ኤለስድ ሳርኮ ዱንካንያ ግዶ ገልድ፥ “ኤለሳዳ ሄꬑ ጋባተ ሎኦ ꬊለ ኤካ ሙኑቃዳ ኡይꬁ ኡካ” ያግስ።
7 አብራሃመይ ቃስ ባ መሄታ ግዶ ዎፅ ብድ ሎኦ ቡልዱቡልዳ ማራ ዶርድ ባ እስ አይልያስ እምን እ ኤለስድ ሹክድ ጊግስስ።
8 ያትድ አብራሃመይ መቃ ማꬅነ ጊግስዳ ማራ አሹዋ እማꬃታ ስን አꬅስ፤ ኤንቲ ምሽን እ ምꬃ ጋርሳን ኤንታ ማታን ኤቅስ።
9 ኤንቲ አብራሃመኮ፥ “ነ ማችያ ሳራ አዉኔ?” ያግድ ኦይችዶሶና።
እካ፥ “ህን ዱንካንያ ግዶና” ያግስ።
10 ጎዳይ እያኮ፥ “ዎንቶ ላይꬅ ሀኖደ ቱማ ታ ኔኮ ስማና፤ ነ ማችያ ሳራ አደ ናአ የላና” ያግስ።
ሳራ ሄ ዎደ እያፐ ጉየ ባጋራ ደእያ ዱንካንያ ፐንገን ኤቃዳ ሄሳ ስአዉሱ።
11 አብራሃመይነ ሳር ባንታ ላይꬃን ዳሮ ጭምዶሶና። ሳራ ናአ የልያ ዎደፐ አꬋሱ።
12 ሄሳ ግሾ፥ ሳራ ባ ዎዛናን፥ “ታንነ ታ ጎዳይ ናምአይካ ጭምዳፐ ጉየ ዋንድ ሀ ኡፋይሳይ ሀናኔ?” ያጋዳ ሚጫሱ።
13 ጎዳይ አብራሃመኮ፥ “ ‘ታኒ ጭምዳፐ ጉየ ናአ የላነ’ ጋዳ ሳራ አይስ ሚጫይ?
14 ጎዳስ ዳንዳኤቶናባይ ቱማ ደእዬ? ታ ነዉ ግዳይሳዳ ዎንቶ ላይꬅ ሀኖደ ታ ስማዳ ያና፤ ሄ ዎደ ሳራ አደ ናአ የላና” ያግስ።
15 ሳራ ያሸትዳ ግሾ፥ “ታኒ ሚጫብከ” ጋዳ ላሀሱ።
ሽን እ፥ “ነ ቱማ ሚጫዳሳ” ያግስ።
አብራሃመይ ሶዶመስ ጋናትስ
16 አሳት ባናዉ ደንድሸ ሶዶመ ዱገ ፄልዶሶና። አብራሃመይ ኤንታና ሞይዛናዉ ኤንታራ ከይስ።
17 ፆሳይ እያኮ፥ “ታ ኦꬃናዉ ሀንያባ አብራሃመፐ ቆሳነዬ?
18 አብራሃመይ ቱማ ግታነ ዎልቃማ ካዎተꬅ ግዳና። ሀ ቢታ ካዎተꬃት ኡባይ እያን አንጀታና።
19 ፅሎተꬅነ ሱረ ፕርዳ ኦꬅድ ጎዳ ኦግያ ናጋና መላ ባ ናይታነ እያፐ ጉየራ ያ ባ ሶ አሳ ዞራና መላ ታኒ እያ ዶራስ። ሄስካ፥ ፆሳይ አብራሃመስ እማና ግዳ ኡፋይሳ ፖላናሳ” ያግስ።
20 ጎዳይ አብራሃመኮ፥ “ሶዶመ ቦላነ ጋሞራ ቦላ ዋስያ ዋሶይ ዳርስ፤ ኤንታ ናጋራይካ ዳሮ ዴፅስ።
21 ሄሳ ግሾ፥ ኤንታ ኦሶይ ኤንታ ዋሱዋ መለኮ በአናዉ ታኒ ዱገ ዎꬋና፤ ቃስ ሄሳ መላ ኢታ ግዶናኮ ሻካ ኤራና” ያግስ።
22 ሄሳፈ ጉየ፥ ናምኡ አሳት ሶዶመኮ ስሚድ ብዶሶና፥ ሽን አብራሃመይ ጎዳ ስንꬃን ኤቅዳሱዋን ደኤስ።
23 አብራሃመይ ጎዳኮ ሺቅድ፥ “ቱማ ኔኒ ፅሎታ ኢታታራ እስፈ ꬋይሳኔ?
24 ሄ ካታመን እሻታሙ ፅሎ አሳት ደእኮ ነ ꬋይሳኔ? ያን ደእያ እሻታሙ ፅሎ አሳታ ግሾ ሄ ካታማ አሽኪ?
25 ሄሳ መላ ኦሶይ ኔፐ ሃኮ፤ ፅሉዋ ኢታራ ዎል ጋꬃዳ ዎይስ፥ ፅሉዋነ ኢታ እስ አይፍያን ፄለይስ ኔፐ ሃኮ። ሀ ቢታ ኡባ ፕርድያ ኔኒ ፅሎ ፕርድኪ?” ያግስ።
26 ጎዳይ፥ “ታ ሶዶመን እሻታሙ ፅሎታ ደምያኮ ሄ በሳ ኡባ ኤንታ ግሾ ጋዳ አሻና” ያግስ።
27 አብራሃመይ ዛሪድ፥ “ታኒ ቢታነ ብዶ ግዳዳ ታ ጎዳራ ኦደታናዉ ምነታክቻስ፤
28 እሻታሙ ፅሎታፐ እቻሻት ፓጭኮቺ? ኔኒ ሄ እቻሻታ ግሾ ጋዳ ሄ ካታማ ኡባ ꬋይሳነዬ?” ያግስ።
ጎዳይ፥ “ታኒ ኦይታማነ እቻሹ ፅሎታ ደምኮ ሄ ካታማ ꬋይስከ” ያግስ።
29 አብራሃመይ ዛሪድ፥ “ያን ኦይታሙ ፃላል ደእኮቺ?” ያግስ።
እካ፥ “ኦይታማታ ግሾ ጋዳ ሄ ካታማ ꬋይስከ” ያግስ።
30 ቃስካ አብራሃመይ ዛሪድ፥ “ሀይ ታ ጎዳዉ፥ ታና ሀንቀቶፋ፥ ታኒ ጉጃዳካ ኦደታና። ሀስታሙ ፃላል ደእኮቺ?” ያግስ።
ጎዳይ ዛሪድ፥ “ታኒ ያን ሀስታሙ ደምኮ ꬋይስከ” ያግስ።
31 አብራሃመይ፥ “ታኒ ጎዳራ ኦደታናዉ ምነታክቻስ፤ ኦን ኤር ያን ላታሙ ፃላል ደእኮች” ያግስ።
ጎዳይካ፥ “ሄ ላታማታ ግሾ ጋዳ ꬋይስከ” ያግስ።
32 አብራሃመይ ቃስካ፥ “ሀይ ታ ጎዳዉ፥ ታና ሀንቀቶፋ ታ እስ ቶሆ ኦደታና፥ ያን ታሙ ፃላላ ደምኮቺ?” ያግስ።
እካ፥ “ታማታ ግሾ ጋዳ ታኒ ሄ ካታማ ꬋይስከ” ያግስ።
33 ጎዳይ አብራሃመራ ኦደትድ ኦንግዳፐ ጉየ ብስ፤ አብራሃመይካ ባ ሶ ስምስ።