26
ይሳቃነ አብመለከ
1 ሄ ቢታን ካሰ አብራሃመ ዎደ ከይዳ ኮሻፐ ሀራ ኮሽ ከይስ። ያንን፥ ይሳቅ ፍልስፄመ ካዋ አብመለከኮ ገራራ ብስ።
2 ጎዳይ ይሳቃስ ቆንጭድ “ግብፀ ቢታ ዱገ ቦፓ፥ ታኒ ነዉ ኦድዳ ቢታን ደአ።
3 ሀ ቢታን ጉꬃ ዎድያ ጋምኣሻ፥ ታኒ ኔራ ግዳና፥ ነና አንጃና። ሀ ቢታ ኡባ ታኒ ነዉነ ነ ሼሻስ እማና። ታኒ ነ አዋ አብራሃመስ ጫቅዳ ጫቁዋ ፖላና።
4 ነ ሼሻ ሳሎ ፆልንቶዳ ዳርሳና፥ ሀ ቢታ ኡባ ታኒ ኤንታዉ እማና። ሳአ ካዎተꬃት ኡባይ ነ ሼሻ ባጋራ አንጀታና።
5 ሄስካ፥ አብራሃመይ ታ ቃላ ስእድ፥ ታ አዋጆታ፥ ታ ኪታታነ ታ ህገታ ናግዳ ግሾሳ” ያግስ።
6 ሄሳ ግሾ፥ ይሳቅ ገራራን ደእስ።
7 ሄ ቢታ አሳይ እርብቃባ ደንꬅድ፥ “ሀና ነዉ አይቤ?” ግድ ይሳቃ ኦይችዶሶና።
እ፥ “ሀና ታዉ ምቾ” ያግስ። ሄሳ እ ግዳይ፥ እርብቃ ዳሮ ማላ ሎኦ ግድያ ግሾ፥ “እያ ታ ማቾ ጊኮ፥ ሀ አሳይ እ ጋሶን ታና ዎꬋና” ያግ ቆፕድ ባብስ።
8 ይሳቅ ያን ዳሮ ዎደ ደእዳፐ ጉየ፥ ፍልስፄመ ካዎይ አብመለከይ ማስኮተራ ዱገ ፄልያደ፥ ይሳቅ ባ ማቸ እርብቃራ ካእሽን በእስ።
9 ሄሳ ግሾ፥ አብመለከይ ይሳቃ ፄግስድ፥ “ሄኮ፥ እያ ነ ማቾ፤ ኔኒ አይስ እያ ታ ምቾ ጋዲ?” ግድ ኦይችስ።
ይሳቅ፥ “እያ ታ ማቾ ጊኮ፥ አሳይ ታና እ ጋሶን ዎꬋና ጋዳ ጋስ” ያግስ።
10 አብመለከይ፥ “ሀይስ ኔኒ ኑ ቦላ ኦꬅዳባይ አይቤ? ታ አሳፐ እስ አስ ነ ማቸራ አቅስ ሽን አትስ፥ ኔኒ ኑ ቦላ ጎመ ኤሀዳሳ ሽን” ያግስ።
11 ሄሳ ግሾ፥ አብመለከይ ባ አሳ፥ “ሀ ኡራ ዎይኮ እያ ማችዉ ቦችያ ኦንካ ቱማ ሀይቃና” ያግድ ኪትስ።
12 ይሳቅ ሄ ቢታን ካꬅ ዘርድ፥ ጎዳይ እያ አንጅዳ ግሾ ሄ ላይꬃን ፄቱ ኩሸ ኤክስ።
13 እ ዱረተꬃን ኤረታና ጋካናስ ዳሮ ዱረትሸ ብስ።
14 ይሳቃስ ዶርሳ ዉደይ፥ ሚዛ ዉደይነ አይለት አꬍድ ዳርዳ ግሾ፥ ፍልስፄመ አሳት እያ ቃናትዶሶና።
15 ሄሳ ግሾ፥ እያ አዋ አብራሃመ ዎደ እያ አዋ አይለት ቦክዳ ሃꬃ ኦላ ኡባ ፍልስፄመት ቢታ ኡሽድ ኩንꬅዶሶና።
16 ሄ ዎደ አብመለከይ ይሳቃኮ፥ “ኔኒ ኑፐ አꬋዳ ምንዳ ግሾ ኑ ማታፐ ባ” ያግስ።
17 ይሳቅ ሄሳፈ ደንድድ፥ ገራራ ዛንጋራ ብድ ዱንካነ ቶክድ ያን ደእስ።
18 ይሳቅ ባ አዋ አብራሃመ ዎደ ቦከትዳ ሃꬃ ኦላታ፥ አብራሃመይ ሀይቅዳፐ ጉየ፥ ፍልስፄመት ኩንꬅዳይሳታ ዛር ቦክ ከስድ፥ እያ አዋይ ሱንꬅዳ ሱንꬃን ፄግስ።
19 ይሳቃ አይለት ሄ ዛንጋራን ሃꬃ ኦላ ቦክድ ያን ሎኦ ፑልቶ ሃꬃ ደምዶሶና።
20 ሽን ገራራ ሄንꬃንቾት ይሳቃ ሄንꬃንቾታራ፥ “ሃꬃይ ኑባ” ያግድ ኦየትዶሶና። ኤንቲ ፓላመትዳ ግሾ፥ ይሳቅ ሄ ሃꬃ ኦላ “ኤሴቃ” ግድ ሱንꬅስ።
21 ሄሳፈ ጉየ፥ ኤንቲ ሀራ ሃꬃ ኦላ ቦክዶሶና። ሽን ኤንቲ ሄ ሃꬃ ኦላ ጌዶንካ ኦየትዶሶና። ሄሳ ግሾ፥ ይሳቅ ሄ ሃꬃ ኦላ “ሲፅና” ግድ ሱንꬅስ።
22 ሄሳፈ ጉꬅ ስን ሺቅድ ሀራ ሃꬃ ኦላ ቦክስስ። እያ ጋሶን ኦንካ ኦየትቦና ግሾ፥ “ፆሳይ ሀእ ኑስ ዳልግስስ ኑኒ ሀ ቢታን ዳራና” ግድ ሄ በሳ ረሆቦታ ግድ ሱንꬅስ።
23 ሄሳፈ ደንድድ ፑደ በርሳበ ከይስ።
24 ሄ ብዳ ጋላስ ቃማ ጎዳይ እያዉ ቆንጭድ፥ “ታኒ ነ አዋ አብራሃመ ፆሳ፥ ታኒ ኔራ ደእያ ግሾ፥ ባቦፋ። ታ አይልያ አብራሃመ ግሾ ታኒ ነና አንጃና፥ ነ ሼሻካ ዳርሳና” ያግስ።
25 ይሳቅ ያን ያርሾ በሲ ጊግስድ ጎዳ ሱንꬃ ፄግስ። ያን እ ባ ዱንካንያ ቶክስ፥ እያ አይለት ያን ሃꬃ ኦላ ቦክዶሶና።
26 ሄሳፈ ጉየ፥ አብመለከይ ባና ዞርያ አሁዛነ ቶራ ሞጮና ፍኮላ ኤክድ፥ ገራራፐ ይሳቃኮ ይስ።
27 ይሳቅ ኤንታኮ፥ “ህንተ ካሰ ታና እፅድ፥ ህንተ ቢታፈ ከስ የድቤከቲ? ሀእ ታኮ አይ ኤካናዉ ይደቲ?” ያግስ።
28 ኤንቲ፥ “ጎዳይ ኔራ ደኤይሳ ኑኒ ጌሽ ኤርዳ። ሄሳ ግሾ፥ ሳሮተꬃ ጫቆይ ኑ ግዶንነ ነ ግዶን ዳናዉ ኮሼስ።
29 ኑኒ ነና ቦችቦኮ፥ ነዉ ኬሀተꬃ ፃላላ ኦꬅድ፥ ነና ሳሮተꬃን ሞይዝድ የድዳ። ሄሳዳካ ኔኒ ኑ ቦላ ኢታባ ኦꬆና መላ፥ አነ ኔራ ጫቆስ። ቱማካ ሀእ ነና ጎዳይ አንጅስ” ያግዶሶና።
30 ሄ ዎደ ይሳቅ ኤንታዉ ግብራ ጊግስን ምዶሶና፥ ኡይዶሶና።
31 ዎንተꬃ ጋላስ ዎንታ ጉራ ደንድድ ኤንቲ እሶይ እሱዋራ ጫቅዶሶና። ይሳቅ ኤንታ ሞይዝን፥ ኤንቲ ሳሮ ሻከትድ ብዶሶና።
32 ሄ ጋላስ ይሳቃ አይለት ይድ፥ “ኑኒ ሃ ደምዳ” ያግድ ባንታ ቦክዳ ሃꬃ ኦላባ እያዉ ኦድዶሶና።
33 እ ሄ ሃꬃ ኦላ ሳበ (ጫቆ) ግድ ሱንꬅስ። ሄሳ ግሾ፥ ሄ ካታማ ሱንꬃይ ሀች ጋካናስ በርሳበ (ጫቆ ሃꬃ ኦላ) ጌተቴስ።
34 ኤሳዌስ ላይꬅ ኦይታማ ግድዳ ዎደ ህተ አድያ ብኤራ ናእዉ ዮድቶነ ህተ አድያ ኤሎና ናእዉ ባሰማቶ ማችስ።
35 ኤንቲ ይሳቃነ እርብቃ አዛንꬅሸ ደእዶሶና።