27
ያይቆብ ይሳቃ አንጁዋ ኤክሽን
1 ይሳቅ ጭምን እያ አይፈይ ፄሎ እፅዳ ዎደ ባ ባይራ ናአ ኤሳዌ ፄግድ፥ “ታ ናአዉ” ያግስ።
እካ፥ “ዬ” ግድ ኮይስ።
2 ይሳቅ፥ “ሄኮ፥ ሀእ ታኒ ጭማስ፥ ታኒ አዉደ ሀይቃነኮ ኤርከ።
3 ያንያ ግሾ፥ ሀእ ነ ሻንካ ዶንግያ ኤካዳ ባዞ ባዳ ዶአ ሻንካታዳ አሾ ኤካዳ ያ።
4 ማልኦ ካꬅ ታ ዶሰይሳꬆ ኦꬃ ካꬃዳ ታዉ ኤሀ። ታኒ ሀይቃናፐ ስን ማ ስማዳ ነና አንጃና” ያግስ።
5 ይሳቅ ባ ናአ ኤሳዌስ ኦድያ ዎደ እርብቃ ስአዉሱ። ኤሳዌይ ዶአ ሻንካትድ ኤሀናዉ ባዞ ብዳፐ ጉየ፥
6 እርብቃ ባ ናአ ያይቆባ፥ “ነ አዋይ ነ እሻ ኤሳዌ፥
7 ‘ዶአ ሻንካታ ኤሀዳ ታዉ ማልኦ ካꬅ ታ ማናዉ ካꬃ። ታኒ ሀይቃናፐ ስን ማ ስማዳ ጎዳ ስንꬃን ነና አንጃና’ ያግሽን ታኒ ስአስ።
8 ታ ናአዉ፥ ሀእ ታኒ ነዉ ኦደይሳ ሎይꬃ ስአ።
9 ዉድያ ግዶ ባዳ ናምኡ ሞꬎ ዴሻ ማራታ ታዉ ኤካዳ ያ። ታኒ ነ አዋስ ማልኦ ካꬅ እ ዶሰይሳዳ ኦꬃዳ ካꬃና።
10 ነ አዋይ ሀይቃናፐ ስን ምድ ነና አንጃና መላ እያዉ አꬃ” ያጋሱ።
11 ሽን ያይቆብ ባ አይዉ፥ “ታ እሻ ኤሳዌ ቦላ እክሰይ ደኤስ ሽን ታ ቦላይ ሊቆ።
12 ታ አዋይ ታና ኦይክ በእድ ታኒ እያ ጭምዳባ ዳንኮ፥ ታኒ አንጁዋ ግሾ ባደꬅ ታ ቦላ ኤሀናይሳ ኤርኪ?” ያግስ።
13 እያ አይያ፥ “ታ ናአዉ፥ ሄ ባደꬃይ ታና ጋኮ። ታኒ ነዉ ኦደይሳ ኦꬃ፥ ባዳ ዴሻ ማራታ ታዉ ኤካዳ ያ” ያጋሱ።
14 ኤህድ ባ አየስ እምን እያ አይያ ማልኦ ካꬅ እያ አዋይ ዶሰይሳዳ ኦꬃዳ ካꬃሱ።
15 ሄሳፈ ጉየ፥ እርብቃ ባይራ ናአ ኤሳዌ ማኦ ሎኡዋ ኤሀዳ ያይቆባ ማይዛሱ።
16 ቃስ ሄ ዴሻታ እትያ እያ ኩሽያነ እያ ሊቆ ቆꬍያ ማይዛሱ።
17 ባ ካꬅዳ ማልኦ ካꬃነ ኡይꬃ ባ ናአ ያይቆባስ እማሱ።
18 ያትን፥ እ ባ አዋኮ ገልድ፥ “ታ አዋዉ” ያግስ።
እካ፥ “ዬ፥ ታ ናአዉ፥ ኔኒ ኦኔ?” ያግስ።
19 ያይቆብ ባ አዋ፥ “ታኒ ነ ባይራ ናአ ኤሳዌ። ኔኒ ታና ኪትዳይሳዳ ታኒ ኦꬃስ፤ ሀእ ደንዳ ኡታዳ፥ ታኒ ሻንካታ ኤህዳይሳፈ ማዳ፥ ታና አንጃ” ያግስ።
20 ይሳቅ ባ ናአ፥ “ታ ናአዉ፥ ዋታ ኤለሳዳ ደማዲ?” ያግድ ኦይችስ።
ያይቆብ፥ “ጎዳይ፥ ነ ፆሳይ ታዉ ጊግስስ” ያግስ።
21 ይሳቅ ያይቆባ፥ “ታ ናአዉ፥ ኔኒ ቱማ ታ ናአ ኤሳዌኮ ታ ነና ኦይካ በአና አነ ሀ ሺቃ” ያግስ።
22 ያይቆብ ባ አዋኮ ሺቅን ኦይክ በእድ፥ “ነ ቃላይ ያይቆባ ቃላ ሽን ኩሸይ ኤሳዌ ኩሽያ ዳኔስ” ያግስ።
23 እያ ኩሸይ እያ እሻ ኤሳዌ ኩሽያዳ እክሰራ ደእያ ግሾ፥ ሻክድ ኤርቦና እያ አንጅስ።
24 እያ፥ “ቱማ ኔኒ ታ ናአ ኤሳዌ?” ያግድ ዛር ኦይችስ።
እካ፥ “ኤ፥ ታና” ያግስ።
25 ያትን እ፥ “ታ ናአዉ፥ ታኒ ነ ሻንካታ ኤህዳባፐ ማዳ ነና አንጃና መላ አነ ሀ አꬃ” ያግስ። ያይቆብ አꬅን ምስ፥ ቃስ እያዉ ዎይነ ኤህን ኡይስ።
26 ሄሳፈ ጉየ፥ እያ አዋ ይሳቅ፥ “ታ ናአዉ፥ ሀ ሺቃዳ ታና ዬራ” ያግስ።
27 ያይቆብ ሺቅድ እያ ዬርስ። ይሳቅ እያ ማኡዋ ስንግ ስእድ፥
“ታ ናአ ፔኖይ
ጎዳይ አንጅዳ ጎሻዳ ሳዌስ።
28 ፆሳይ ሳሎ አካነ ሳአ ሽጫ፥
ካꬅነ ዎይነ ዳርስድ ነዉ እሞ።
29 ካዎተꬃት ነዉ ሃረቶ፥
አሳይ ነዉ ጉልባቶ።
ኔኒ ነ እሻታስ ጎዳ ግዳ፥
ነ አየ ሼሻት ነዉ ጉልባቶ።
ነና ባደይሳት ባደትዳባ ግዶ፥
ነና አንጀይሳት አንጀትዳባ ግዶ” ያግድ አንጅስ።
30 ይሳቅ ያይቆባ አንጅድ ኦንግዳፐ ጉየ፥ ያይቆብ ባ አዋ ስንꬃፈ ቡሮ ከይያ ዎደ ኤሳዌይ ሻንካፈ ፑቱ ግስ።
31 እካ ቃስ ማልኦ ካꬅ ካꬅድ ባ አዋስ አꬅድ፥ “ታ አዋዉ፥ ዳንዳ ኡታዳ ታ ሻንካትዳባፐ ማ፥ ያታዳ ታና አንጃ” ያግስ።
32 ይሳቅ፥ “ነ ኦኔ?” ያግድ ኦይችስ።
እካ፥ “ታኒ ነ ባይራ ናአ ኤሳዌ” ያግስ።
33 ይሳቅ ዳጋምድ ኮኮርሸ፥ “ያትን ዶአ ሻንካትዳይሳፈ ታዉ አꬅዳይ ኦኔ? ታኒ ሀእ ኔኒ ያና ስንꬃን ማዳ፥ እያ አንጃስ። እካ ቱማ አንጀትዳይሳ ግዳና” ያግስ።
34 ኤሳዌይ ባ አዋ ቃላ ስእዳ ዎደ ባ ቃላ ꬎቁ ኦꬅድ፥ ዳሮ ኢታ ዬሆ ዬክሸ፥ “ታ አዋዉ፥ ታናካ አንጃ” ያግስ።
35 ሽን እ፥ “ነ እሻይ ጭምድ ነ አንጁዋ ኤክ ድግስ” ያግስ።
36 ኤሳዌይ፥ “እ ኤርድ ያይቆባ (ጭመይሳ) ግድ ሱንትስ። እ ታና ጭምሽን ሀይስ ናምአንꬆ፥ ካሰ ታ ባይራተꬃ ኤክስ፥ ሀእ ቃስ ታ አንጁዋ ኤክስ” ያግስ። ያትን፥ “ኔኒ ታዉ አንጁዋፈ አይኮካ አሻብኪ?” ያግድ ኦይችስ።
37 ይሳቅ ኤሳዌ፥ “ታኒ እያ ነዉ ጎዳ ኦꬃስ። እያ እሻታ ኡባታካ እያዉ አይለ ኦꬃስ። ቃስ ታኒ ካꬃንነ ዎይነን እያ ምንꬃስ። ያትን፥ ታ ናአዉ፥ ነዉ ታ አይ ኦꬆ?” ያግስ።
38 ኤሳዌይ ባ አዋ፥ “ታ አዋዉ፥ ነዉ እስ አንጆ ፃላል ደኢ? ታ አዋዉ፥ ታናካ ቃስ አንጃ” ያግስ። ሄሳፈ ጉየ፥ ኤሳዌይ ባ ቃላ ꬎቁ ኦꬅድ ዬክስ።
39 እያ አዋ ይሳቅ ዛሪድ፥
“ነ ደእያ በሳይ ሀ ሳአ ዱረተꬃፈ ሃሆ፥
ሳሎ አክካ ነዉ ዎና።
40 ኔኒ ነ ማሻን አቃና፥
ነ እሻስ ሃረታና።
ሽን ኔኒ እያራ ኤቀትያ ዎደ
እያ ቃምባራ ነ ጋናፈ ሆላና” ያግስ።
ይሳቅ ያይቆባ ላባኮ የዱዋ
41 ያይቆባ እያ አዋይ አንጅዳ ግሾ፥ ኤሳዌይ ባ ኡሎን እያ ሞርክስ። እ ባ ዎዛናን፥ “ታ አዋይ ሀይቃናዉ ማትስ። እ ሀይቅዳ መላ ታ እሻ ያይቆባ ዎꬋና” ያግስ።
42 ሽን እርብቃ ሄ ባ ባይራ ናአ ኤሳዌ ቃላ ስእዳ ግሾ፥ ባ ካሎ ናአ ያይቆባ ፄግሳ ኤሀዳ፥ “ነ እሻ ኤሳዌይ ነና ዎꬍድ ሃሉዋ ከሳናዉ ሀልቼስ።
43 ሀያና ታ ናአዉ፥ ታኒ ነዉ ኦደይሳ ኦꬃ። ደንዳዳ ካራነን ደእያ ታ እሻ ላባኮ ባቃታ።
44 ነ እሻ ሀንቆይ እርፃና ጋካናዉ ጉꬃ ዎደ እያራ ደኣሻ።
45 ነ እሻ ይሎይ ዎꬍያ ዎደነ ኔኒ እያ ቦላ ኦꬅዳባ እ ዶግያ ዎደ ታኒ ኪታዳ ነና ኤሀና። ታኒ እስ ጋላስ ህንተ ናምኣፈካ መላ አታናዉ ኮይከ” ያጋሱ።
46 ሄሳፈ ጉየ፥ እርብቃ ይሳቃኮ፥ “ኤሳዌይ ኤክዳ ህተታ ማጫ ናይታ ጋሶን ታኒ ታ ደኡዋ ሻተታስ። ቃስ ያይቆብካ ሀይሳꬆ ህተታ ማጫ ናይታፐ ማቾ ኤክኮ፥ ታዉ ሀይቆይ ሎኦ” ያጋሱ።