29
ያይቆብ ላባ ሶ ጋከꬃ
1 ሄሳፈ ጉየ፥ ያይቆብ ደንድድ፥ ብድ ዶሎሀ ባጋ አሳ ቢታ ጋክስ።
2 ያንካ ደምባ በሳን ሃꬃ ኦላ ደምስ። ሄꬑ ዶርሳ ዉደት ሄ ሃꬃ ኦላ ማታን ደኦሶና። ዉደ ኡባይ ሃ ኡየይ ሄ ኦላፈ። ሄ ሃꬃ ኦላ ዶና ጎርድያ ሹቻይ ግታ።
3 ዶርሳ ዉደ ኡባይ ያ ሺቅኮ፥ ዉድያ ሄመይሳት ሃꬃ ኦላ ዶናፐ ሄ ሹቻ ጎንዶርስድ ዉድያ ሃ ኡሾሶና። ኡሽ ስሚድ ሄ ሹቻ ኦላ ዶናን ዛር ዎꬆሶና።
4 ያይቆብ ኤንታኮ፥ “ህንተ አዉፐ ይደቲ?” ያግድ ኦይችስ።
ኤንትካ፥ “ኑኒ ካራነፐ ይዳ” ያግዶሶና።
5 እ፥ “ናኮራ ናአ ናኣ ላባ ኤሬቲ?” ያግድ ኦይችስ።
“ኤ፥ እያ ኤሮስ” ያግዶሶና።
6 ያይቆብ ኤንታ፥ “እ ሎኦ ደኢ?” ያግድ ኦይችስ።
“ኤ፥ ሎኦ፥ እያ ናእዉ ራሄሎ ዶርሳታ ላጋዳ ያሮ ህን በአ” ያግዶሶና።
7 ያይቆብ ኤንታኮ፥ “ሄኮ፥ ሀእ አው ꬎቃን ደኤስ። ዉደ መሄይ ሶ ስምያ ዎደይ ቡሮ ጋክቤና፥ ዶርሳ ኡሽ ኤፍድ ሄምተ” ያግስ።
8 ሽን ኤንቲ፥ “ዉደ ኡባይ ሺቅን ሹቻ ሃꬃ ኦላ ዶናፐ ጎንዶርሳና ጋካናስ ኑ ኡሻናዉ ዳንዳኦኮ። ሄሳፈ ጉየ፥ ሹቻ ጎንዶርስድ ዶርሳታ ኡሻና” ያግዶሶና።
9 እ ቡሮ ኦድሽን፥ ላባ ናእያ ራሄላ ዶርሳታ ሄምያ ግሾ፥ ባ አዋ ዶርሳታ ላጋ ኤካዳ ጋካሱ።
10 ያይቆብ ባ አየ እሻ ላባ ናእዉ ራሄሎ ላባ ዶርሳታ ላጋዳ ያሮ በእዳ ዎደ ብድ ኦላ ዶናፐ ሹቻ ጎንዶርስድ ዶርሳታ ሃ ኡሽስ።
11 ያይቆብ ራሄሎ ዬርድ፥ ኡፋይሳን ባ ቃላ ꬎቁ ኦꬅድ ዬክስ።
12 ያይቆብ፥ “ታኒ ነ አዋ ምቸ እርብቃ ናአ” ያግድ እዉ ኦድስ። ሄሳ ግሾ፥ እያ ዎፃ ባዳ ባ አዋስ ኦዳሱ።
13 ላቢ ባ ምቸ ናአ ያይቆባ ዩሳ ስእዳ መላ ሞካናዉ ዎፅድ ብስ። እያ እድም ዬርድ ባ ሶ ኤፍስ። ያን ያይቆብ ሀንዳባ ኡባ ላባስ ኦድስ።
ያይቆብ ላባ ናይታ ማችስ
14 ላቢ እያ፥ “ኔኒ ቱማ ታ አሾነ ታ ሱꬅ” ያግስ። ያይቆብ እያራ እስ አጌና ኩመꬅ ኡትስ።
15 ሄሳፈ ጉየ፥ ላቢ ያይቆባ፥ “ኔኒ ታዉ ዳቦ ግድዳ ግሾ፥ ታዉ መላ ጮ ኦꬃነዬ? አነ ታ ነዉ አይ ቃንፃናዉ ኮሽያኮ ታዉ ኦዳ” ያግስ።
16 ላባስ ናምኡ ማጫ ናይት ደኦሶና። ባይረ ሱንꬃይ ልያ፥ ካልያ ቃስ ራሄሎ ጌተታዉሱ።
17 ልያ አይፈራ ጩጫ፥ ሽን ራሄላ የገልስነ ማላ ሎኦ።
18 ያይቆብ ራሄሎ ዶስድ፥ “ታኒ ነ ካሎ ናኤ ራሄል ግሾ ነዉ ላፑን ላይꬅ ኦꬃና” ያግስ።
19 ላቢ፥ “እዮ ሀራ አሳስ እማናፐ ነዉ እሞይ ሎኦ፥ ነ ታራ ሀይሳን ደአ” ያግስ።
20 ሄሳ ግሾ፥ ያይቆብ ራሄሎ ኤካናዉ ላፑን ላይꬅ ኦꬅስ። ሽን እ እዮ ዳሮ ዶስያ ግሾ፥ እያዉ ጉꬃ ጋላስ ዳንስ።
21 ሄሳፈ ጉየ፥ ያይቆብ፥ “ታ ማችዉ ታዉ እማ፥ ታ ላይꬃይ ዉርስ ታኒ እዮ ኤካናዉ ኮያይስ” ያግስ።
22 ሄሳ ግሾ፥ ላቢ አሳ ኡባ ፄግድ ያጋኖ ከስስ።
23 ሽን ሳእ ቃምን ላቢ ባ ናእዉ ልያ ኤፍድ ያይቆባስ እሚስ። ያይቆብ እዮ ኤክስ።
24 ቃስ ላቢ ባ አይልዉ ዛላፋ ባ ናኤ ልያስ አይለ ኦꬅድ እሚስ።
25 ሳእ ዎንትን እ ፄልያ ዎደ ሄኮ ልያ። ያይቆብ፥ “ሀይስ ኔኒ ታ ቦላ ኦꬅዳይስ አይቤ? ታኒ ነዉ ኦꬅዳይ ራሄል ግሾሳ ግደነዬ? ታና አይስ ጭማድ” ያግስ።
26 ላቢ እያኮ፥ “ኑ ቢታን ባይሪያ ደእሽን ካልዉ አዝናስ እመይስ ዎጋ ግደና።
27 ምሽራተꬃን ኢራ ሳምንታ ኦንግኮ፥ ቃስ ካልውካ ታኒ ነዉ እማና። ሄሳፈ ጉየ፥ ሀራ ላፑን ላይꬅ ታዉ ኦꬃሳ” ያግስ።
28 ያይቆብ ኦዳ ማእድ ሳምንታ ኢራ ኦንግስ። ሄሳፈ ጉየ፥ ላቢ ባ ናእዉ ራሄሎ እያዉ እሚስ።
29 ቃስ ላቢ ባ አይልዉ ባሎ ባ ናኤ ራሄልስ አይለ ኦꬅድ እሚስ።
30 ያይቆብ ራሄሎካ ኤክስ። ራሄሎ ልያፐ አꬅድ ዶስስ። ሀራ ላፑን ላይꬅ ላባስ ኦꬅስ።
ያይቆባነ እያ ናይታ
31 ጎዳይ ልያ ራሄልꬆ ዶሰታቦናሮ በእድ፥ እዉ የሎ ኡሉዋ ዶይስ። ሽን ራሄላ ናአ የሎና ጋምአሱ።
32 ልያ ቃንꬃታዳ አደ ናአ የላሱ። እያ፥ “ጎዳይ ታ መቱዋ በእስ፥ ሀእ ታና ታ አዝናይ ዶሳና” ጋዳ ሄ ናአ ሮቤላ ጋዳ ሱንꬃሱ።
33 እያ ናምአንꬆ ቃንꬃታዳ አደ ናአ የላሱ። እያ፥ “ጎዳይ ታኒ ዶሰታቦናይሳ በእዳ ግሾ፥ ታዉ ሀይሳካ ጉጅስ” ጋዳ ስሞና ጋዳ ሱንꬃሱ።
34 እያ ሄꬓንꬆ ቃንꬃታዳ አደ ናአ የላሱ። እያ፥ “ታኒ እያዉ ሄꬑ አደ ናይታ የልዳ ግሾ፥ ታ አዝናይ ሀእ ታራ ሲቆን ዋፀታና” ጋዳ እያ ሌወ ጋዳ ሱንꬃሱ።
35 እያ ሀራ ቃንꬃታዳ አደ ናአ የላሱ። እያ፥ “ሀእ ታኒ ጎዳ ጋላታና” ጋዳ እያ ሱንꬃ ይሁዳ ጋዳ ሱንꬃሱ። ሄሳፈ ጉየ፥ የሎ ኤቃሱ።