30
1 ራሄላ ያይቆባስ ናይታ የሎናይሳ በአዳ ባ ምችዉ ቃናታሱ። ሄሳ ግሾ፥ ያይቆባ፥ “ታዉ ናአ እማ፥ እፅኮ ታኒ ሀይቃና” ያጋሱ።
2 ያይቆብ ራሄሎ ሀንቀትድ፥ “ታና ነዉ የሎ እማናዉ ዎይኮ ድጋናዉ ፆሰ ጋድዬ?” ያግስ።
3 እያ፥ “ታ ጋꬍንድዉ ባሎ ህኖ በአ። እያ ታ ግሾ የላና መላ ኔኒ ኢራ አቃ፥ ያንኮ፥ ታኒ እ ባጋራ ናአ ደማና” ያጋሱ።
4 ባ ጋꬍንድዉ ባሎ ማቾ ኦꬅድ ኤካና መላ እያዉ እማሱ።
5 ባላ ቃንꬃታዳ አደ ናአ ያይቆባስ የላሱ።
6 ያትን ራሄላ፥ “ፆሳይ ታዉ ፕርድስ፥ ታ ዎሳካ ስእድ ታዉ አደ ናአ እሚስ” ያጋዳ ሄ ናአ ዳነ ጋዳ ሱንꬃሱ።
7 ራሄል ጋꬍንድያ ባላ ቃንꬃታዳ ያይቆባስ ናምአንꬆ አደ ናአ የላሱ።
8 ራሄላ፥ “ታኒ ታ ምቸራ ዎልቃማ ባፀ ባፀታዳ ፆናስ” ያጋዳ ሄ ናአ ንፍታለመ ጋዳ ሱንꬃሱ።
9 ልያ የሎ ኤቅዳይሳ በአዳ፥ ባ ጋꬍንድያ ዛላፋ ያይቆባስ ማቾ ኦꬃዳ እማሱ።
10 ልያ ጋꬍንድያ ዛላፋ አደ ናአ ያይቆባስ የላሱ።
11 ልያ፥ “ላ ሀይስ አይብ ሎኦ ቃደ!” ያጋዳ፥ ሄ ናአ ጋደ ጋዳ ሱንꬃሱ።
12 ልያ ጋꬍንድያ ዛላፋ ያይቆባስ ናምአንꬆ አደ ናአ የላሱ።
13 ልያ፥ “ታና ዳሮ ኡፋይሴስ፤ ማጫስ ኡባይ ታና ኡፋይትያሮ ጋና” ጋዳ ሄ ናአ አሴራ ጋዳ ሱንꬃሱ።
14 ግስተ ጫክያ አጌናን ሮቤል ጋደ ብድ እንኮያ ምꬃ አይፈ ደምድ ባ አየ ልያስ ኤክድ ይስ። ራሄላ ልያኮ፥ “ነ ናአይ ኤህዳ እንኮያ ምꬃ አይፍያፐ ታዉ እማ” ያጋሱ።
15 ሽን ልያ፥ “ታ አዝና ኔኒ ዎልቃን ኤክዳይስ ግዶና እፅን ሀእ ቃስ ታ ናአ እንኮያ ሚꬃ አይፍያ ኤካኔ?” ያጋሱ።
ራሄላ፥ “ነ ናአ እንኮያ ታዉ እምኮ፥ ያይቆብ ሀች ቃማ ኔራ አቆ” ያጋሱ።
16 ሄ ጋላስ ኦማርስ ያይቆብ ባዞፈ ያ ዎደ ልያ እያ ሞካናዉ ከያዳ፥ “ኔኒ ታራ አቃናዉ ኮሼስ፤ ታኒ ታ ናአ እንኮያ አይፈያን ነና ሻማስ” ያጋሱ። ሄሳ ግሾ፥ እ ሄ ቃማ ኢራ አቅስ።
17 ፆሳይ ልያ ዎሳ ስእስ። እያ ቃንꬃታዳ እቻሻንꬆ አደ ናአ ያይቆባስ የላሱ።
18 ልያ፥ “ታኒ ታ አይልዉ ታ አዝናስ እምዳ ግሾ፥ ፆሳይ ሄሳ ታዉ ቃንፅስ” ያጋዳ ሄ ናአ ይሳኮራ ጋዳ ሱንꬃሱ።
19 ልያ ሀራ ቃንꬃታዳ ኡሱፑንꬆ አደ ናአ ያይቆባስ የላሱ።
20 ልያ፥ “ፆሲ ታዉ አልኦ እሞታ እሚስ። ታኒ ታ አዝናስ ኡሱፑን አደ ናይታ የልዳ ግሾ፥ ሀእ እ ታና ቦንቻና” ያጋዳ ሄ ናአ ዛብሎና ጋዳ ሱንꬃሱ።
21 ሄሳፈ ጉየ፥ እስ ማጫ ናአ የላሱ፥ እዮ ዲና ጋዳ ሱንꬃሱ።
22 ፆሳይ ራሄሎ ቆፕስ። እ ዎሳ ስእድ እ የሎ ኡሉዋ ዶይስ።
23 እያ ቃንꬃታዳ አደ ናአ የላሱ፤ “ፆሳይ ታ ዬላ ቃርስ።
24 ጎዳይ ታዉ ሀራ አደ ናአካ ጉጆ” ያጋዳ ሄ ናአ ዮሰፋ ጋዳ ሱንꬃሱ።
ያይቆባነ ላባ
25 ራሄላ ዮሰፋ የልዳፐ ጉየ፥ ያይቆብ፥ “ታኒ ታ አዋ ቢታ ስማዳ ባና ታና ሞይዛ።
26 ታኒ ኤንታ ግሾ ነዉ ኦꬅዳ ታ ማቸታነ ታ ናይታ እማ። ታኒ ባና፥ ታኒ ነዉ አይ መላ ኦሶ ኦꬅዳኮ ኔኒ ኤራሳ” ያግስ።
27 ሽን ላቢ እያኮ፥ “ታኒ ነዉ እስባ ኦዳይስ፥ ጎዳይ ነ ጋሶን ታና አንጅዳይሳ ታኒ ታ ፆሳፈ ኤራስ።
28 ነ ዳሞዝያ ታዉ ኦዳ፥ ታኒ ነዉ ቃንፃና” ያግስ።
29 ያይቆብ፥ “ታኒ ነዉ ዋታ ኦꬅዳኮ፥ ነ መሄትካ ዋን የለትዳኮ ኔኒ ኤራሳ።
30 ታኒ ያናፐ ካሰ ነዉ ደእያ ጉꬃይ ሀእ ሎይꬅ ዳርስ። ጎዳይ ነና ታኒ አꬍዳ በሳ ኡባን አንጅስ። ሽን ሀእ፥ ታኒ ታ ሶ አሳስ ኦꬃና ዎደ” ያግስ።
31 ላቢ፥ “ያትን ታኒ ነዉ አይ እሞ?” ያግድ እያ ኦይችስ።
ያይቆብ፥ “ታዉ አይኮካ እሞፋ፥ ኔኒ ታዉ እስባ ኦꬃና ግድኮ፥ ታኒ ነ ዉድያ ሀእካ ሄማናነ ናጋና።
32 ታኒ ሀች ነ ዉደ ኡባ ግዶራ አꬋና። ሄሳን ነ ዶርሳታፐ ዋንጩዋ ዎይኮ ጋዛ፥ ካሬꬃ ማራዘታ ኡባ፥ ዴሻፐ ጋዛነ ዋንጮ ኡባ ታኒ ሻካና፥ ኤንቲ ታ ዳሞዘ ግዶ።
33 ሄሳ ግሾ፥ ታ ፅሎተꬃይ ነ ታዉ ቃንፅዳ ዳሞዝያ በአናዉ ያ ዎደ ታዉ ማርካታና። ታ ዴሻፐ ጋዛ ዎይኮ ፑንጫረ ግዶናባይ ዎይኮ ካሬꬅ ግዶና አይ ዶርሳት ታ ማታን በንትኮ፥ ካይሶተትዳዳ ታይባ” ያግስ።
34 ላቢ፥ “ኤሮ፥ ኔኒ ግዳይሳዳ ግዶ” ያግስ።
35 ሽን ሄ ጋላሳን ላቢ ካላደ ዎይኮ ጋዛ ግድዳ ኮሌ ኡባ፥ ዋንጮ ዎይኮ ጋዛ ግድዳ ማጫ ዴሻ ኡባ፥ ቦꬃ ዋንጮ ዴሻታነ ካሬꬃ ዋንጮ ዶርሳታ ኡባ ከስድ ባ አደ ናይታ ሄንꬅስ።
36 ያትድ ሄ ዉድያ ሄꬑ ጋላሳ ኦግያ ያይቆባፐ ሃስድ ኤፍስ። ሽን ያይቆብ አትዳ ላባ ዉድያ ሄምስ።
37 ያይቆብ ኦንጋፍረፐ፥ ባርኤፈኔ ላዉዘ ምꬃፈ ፃምአ ከስድ፥ ፖቁዋ ፖቅድ ግዶ ቦꬃ ባጋ ቃርድ ሽሎይስ።
38 ዉደይ ሃ ኡያናዉ ያ ዎደ ጎንገን ዉድያ ስንꬃን ፖቅዳ ፃምአ ዎꬅስ። ብራይስ ከይዳይሳት ሃ ኡያናዉ ይድ፥
39 ሄ ፃምአታ ስንꬃን ብራይሰቶሶና። ሄ ብራይስዳይሳት ካላደ፥ ዋንጮነ ጋዛ ማራታ የልዶሶና።
40 ያይቆብ ዴሻ ማራታነ ዶርሳ ዉድያፐ ሻክድ ዱማ ዎꬅስ። አትዳ ዉድያ ካላደነ ካሬꬅ ግድያ ላባ መህያኮ ዛሪድ ኤስስ። ያትድ ላባ ዉድያራ ጋꬆና ባ ዉድያ ዱማይድ ዳርስስ።
41 ዉድያፐ ጎባ ማጫት ብራይሳስ ከይያ ዎደ ሄ ፃምአታ ማታን ብራይሰታና መላ ያይቆብ ሄ ፃምአታ ሃꬃ ጎንገን መሄታ ስንꬃን ዎꬄስ።
42 ሽን መሄት ላፋ ግድኮ ኤንታ ስንꬃን ፃምአ ዎና። ሄሳ ግሾ፥ ላፋ መሄት ላባባ ግድን ጎባት ያይቆባባ ግድዶሶና።
43 ሄሳዳ ኦꬅድ ያይቆብ ዳሮ ዱረትድ፥ ዳሮ ዉድያ፥ ማጫ አይለታነ አደ አይለታ፥ ዳሮ ግማለታነ ሀረታ ሃርስ።