31
ያይቆብ ላባፐ ባቃቱዋ
1 ላባ አደ ናይት፥ “ያይቆብ ኑ አዋባ ኡባ ኤክድግስ። ሀ ሻሎ ኡባ ኑ አዋባፐ ደምስ” ያግሽን ያይቆብ ስእስ።
2 ያይቆብ ላባ ሶምኦይ እያዉ ካሰ መላ ግዶናይሳ በእስ።
3 ሄ ዎደ ጎዳይ ያይቆባ፥ “ኔኒ ነ አዋታ ቢታ፥ ነ ዳቦታኮ ጉየ ስማ። ታኒ ኔራ ግዳና” ያግስ።
4 ያይቆብ ራሄሎነ ልያ ባ ዉደይ ሄመትያ በሳ ያና መላ ኪትድ ፄግስስ።
5 እ ኤንታኮ፥ “ህንተ አዋ ሶምኦይ ታዉ ካሰ መላ ግዶናይሳ ታኒ በአይስ። ሽን ታ አዋ ፆሳይ ታራ ደኤስ።
6 ታኒ ታ ኩመꬃ ዎልቃን ህንተ አዋስ ኦꬅዳይሳ ህንተ ኤሬታ።
7 ሽን ህንተ አዋይ ታና ጭምድ፥ ታ ዳሞዝያ ታሙ ቶሆ ላምስ። ግድኮካ ፆሳይ ታና እ ቆሆናዳ ድግስ።
8 እ፥ ‘ፑንጫረት ነ ዳሞዘ ግዶ’ ግን ዉደ ኡባይ ፑንጫረ የልስ። ቃስ እ፥ ‘ካላደት ነ ዳሞዘ ግዶ’ ግን ዉደ ኡባይ ካላደ የልስ።
9 ፆሳይ ሄሳን ህንተ አዋ መህያ ዎꬅ ኤክድ ታዉ እሚስ።
10 “መሄት ብራይሳስ ከይያ አጌናን ታኒ እስ አሙሆ አሙሀስ። ሄ አሙሁዋን ታኒ ፄልያ ዎደ መህያ ብራይስያ ዴሻ ኡርገት ካላደ፥ ፑንጫረነ ጋዛ።
11 ፆሳ ኪታንቾይ አሙሆን ታና፥ ‘ያይቆባ’ ያግስ። ታኒ፥ ‘ዬ’ ጋዳ ኮያስ።
12 እካ፥ ‘ꬎቁ ጋዳ መህያ ብራይስያ ዴሻ ኡርገ ኡባ ካላደ፥ ፑንጫረነ ጋዛ በአ። ላቢ ነ ቦላ ኦꬅያባ ኡባ ታኒ በእዳ ግሾ ሄሳ ኦꬃስ።
13 ኔኒ ኤስዳ ሹቻ ዛይተ ትያዳ ታዉ ጫቅዳ ቤተለ ፆሳይ ታና። ሀእ ደንዳዳ ሀ ቢታፈ ከያ። ጉየ ነ የለትዳ ቢታ ስማ’ ግስ” ያግስ።
14 ሄሳፈ ጉየ፥ ራሄልራነ ልያራ “ኑ አዋባፐ ኑና ጋክያባይ አይቤ?
15 እ ኑና አላጋዳ ፄሌስ ግደኔ? እ ኑና ባይዝ ኤክስ። ባይዝ ኤክዳባ ኡባ ምድ ꬋይስስ።
16 ፆሳይ ኑ አዋፐ ዎꬅ ኤክዳ ሻሎ ኡባይ ቱማካ ኑባነ ኑ ናይታባ። ሄሳ ግሾ፥ ፆሳይ ነዉ ኦድዳባ ኡባ ኦꬃ” ያግ ዛርዶሶና።
17-18 ያይቆብ ካናነ ቢታን ደእያ ባ አዋ ይሳቃኮ ባናዉ ደንድስ። እ ባ ናይታነ ባ ማቸታ ግማለ ቶግስስ። ዉደ ኡባ ላግድ፥ ማሰጰፆመን ደእሸ ሺሽዳ ሻሎ ኡባ ኤክድ ብስ።
19 ላቢ ባ ዶርሳታ እክስያ ቃንፃናዉ ብዳሽን፥ ራሄላ ባ አዋ ሶ ኤቃ ምስለታ ካይሶታሱ።
20 ቃስ ያይቆብ አራመ አድያ ላባስ ባ ቡሳ ኦዶና እፅድ ጭምስ።
21 እ ባዉ ደእያባ ኡባ ኤክድ ኤለስድ ኤፍራፂሳ ሻፋ ፕንድ፥ ደረይ ዳርያ ጋላዳ ቢታ ብስ።
ላቢ ያይቆባ ካልድ ቡሳ
22 ሄꬑ ጋላሳፐ ጉየ፥ ያይቆቢ ባቃትድ ብዳይሳ ላቢ ስእስ።
23 ባ ዳቦታ ባራ ኤክድ፥ ላፑን ጋላሳ ኦገ ያይቆባ ጌዶ ካልድ ደረይ ዳርያ ጋላዳ ቢታን እያ ጋክስ።
24 ሄ ዎደ ፆሳይ ቃማ ሶረ ላባኮ አሙሆን ቆንጭድ፥ “ኔኒ ያይቆባ ቦላ ኢታባ ግድን ሎኦባ፥ አይብባካ ኦደትኮ ነና ኤራ” ያግስ።
25 ላቢ ጋክያ ዎደ ያይቆብ ደረይ ዳርያ ጋላዳ ቢታን ዱንካነ ቶክድ ኡትስ። ላብካ ዳቦታራ ያን ዱንካንዶሶና።
26 ሄሳፈ ጉየ፥ ላቢ ያይቆባ፥ “ኔኒ ሀይሳዳ ታና አይስ ጭማዲ? ታ ማጫ ናይታካ ኦላን ድኤትዳባዳ አይስ ላጋ ከሳዲ?
27 ኔኒ አይስ ቆሳን ታፐ ከሳ ኤካዳ ታና ጭማዲ? ታኒ ነና ኡፋይሳንነ የꬃን፥ ካራቦንነ ዲꬃን ሞይዛና መላ አይስ ታዉ ኦዳብኪ?
28 ኔኒ ሀር አቶሽን፥ ታ ናይታ ናይታነ ታ ማጫ ናይታ ታኒ ዬራ ኤኮና መላ ድጋዳሳ። ኔኒ ኢታ ኦꬃዳሳ።
29 ታኒ ነና ገናናዉ ታዉ ዎልቅ ደኤስ ሽን ነ አዋ ፆሳይ ዝነ ቃማ ታኮ፥ ‘ያይቆባ ቦላ ኢታባ ግድን ሎኦባ አይብባካ ኦደቶናዳ ነና ኤራ’ ያግድ ታዉ ኦድስ።
30 ሀእ ኔኒ ነ አዋ ሶ ባናዉ ዳሮ ላሞትዳ ግሾ ከያዳሳ። ሽን ታ ሶ ኤቃ ምስለታ አይስ ካይሶታዲ?” ያግስ።
31 ያይቆብ ላባ፥ “ኔኒ ነ ናይታ ታፐ ዎልቃን ዎስሳ ኤካነኮነ ጋዳ ቆፕዳ ግሾ ያያዳ ሀይሳዳ ኦꬃስ።
32 ሽን ነ ሶ ኤቃ ምስለታ ኤክዳ አስ ኦናካ ኔኒ ደምኮ፥ ሄ ኡራይ ሀይቆ። ኑ ዳቦታ ስንꬃን ነባ ግድዳባ ኡባ ኮያዳ ኤካ” ያግስ። ያይቆብ ራሄላ ባ አዋ ሶ ኤቃ ምስለታ ካይሶትዳይሳ ኤርቤና።
33 ሄሳ ግሾ፥ ላቢ ያይቆባ ዱንካንያ ግዶ፥ ልያ ዱንካንያ ግዶነ ናምኡ አይለታ ዱንካንያ ግዶ ገልድ ኮይስ። ሽን አይኮካ ደምቤና። ልያ ዱንካንያፐ ከይድ፥ ራሄል ዱንካንያ ገልስ።
34 ራሄላ ሶ ኤቃ ምስለታ ኤካዳ ግማለ ኮራ ጋርሳን ቆሳዳ እያ ቦላ ኡታሱ። ላቢ ዱንካንያን ደእያባ ኡባ ፕልግድ ኮይስ። ሽን አይኮካ ደምቤና።
35 ራሄላ ባ አዋ፥ “ታ ጎዳዉ፥ ታና ሀንቀቶፋ። ታኒ ነዉ ደንዳ ኤቃናዉ ዳንዳእከ፥ ታ ኩሸ መቶራ ደአይስ” ያጋሱ። እ ኮይድ ሶ ኤቃ ምስለታ ደምቤና።
36 ያይቆብ ይሎትድ ላባኮ፥ “ታኒ አይ ኢሳድና? ሀይሳ ኔኒ ታና ካላናዉ ታ አይ ቆሆ ኦꬃድና?
37 ሀእ ኔኒ ታ ሚሸ ኡባ ፕልጋዳ ኮያዳሳ። ነ ሶ ኤቃ ምስለታፐ አይ ደማዲ? ኤንቲ ኑ ናምአ ግዶን ፕርዳና መላ ነ ዳቦታ ስንꬃንነ ታ ዳቦታ ስንꬃን ሀይሳን ዎꬃ።
38 “ታኒ ኔራ ላታሙ ላይꬅ ኩመꬅ ደአስ። ነ ዶርሳትነ ዴሻት አዉጫይቦኮና ዎይኮ ነ ዉድያፐ እሱዋካ ቆታዳ ማብከ።
39 ዶእ ምዳ ጋዉፃካ ታ ነዉ ኤሀ ኤርከ፤ ታኒ ታፐ ጭጋይስ። ጋላስ ዎይኮ ቃማ ካይሶተትዳይሳታ ቃንፅሳሳ።
40 ጋላሳ ሱላን፥ ቃማ ሜጎን ታኒ ቆሄታስ። ማራ ꬍስኮ ꬍስካ ኤርከ።
41 ታኒ ሀይሳዳ ሀናዳ ነ ሶን ላታሙ ላይꬅ ደአስ። ታማነ ኦይዱ ላይꬅ ነ ናምኡ ማጫ ናይታ ግሾ፥ ኡሱፑን ላይꬅ ነ መህያ ግሾ ነዉ ኦꬃስ። ሽን ኔኒ ታ ዳሞዝያ ታሙ ቶሆ ላማዳሳ።
42 ታ አዋ ፆሳይ፥ አብራሃመ ፆሳይ፥ ይሳቃ ፆሳይ ታራ ግዶናባ ግድያኮ፥ ስይ ባይና ኔኒ ታና መላ ኩሸ ከሳ የዳዳሳ። ሽን ፆሳይ ታ መቱዋነ ታ ዳቡርሳ በእድ ዝነ ቃማ ነና ሀንቅስ” ያግስ።
ያይቆባነ ላባ ጫቁዋ
43 ላቢ ዛሪድ ያይቆባ፥ “ማጫሳት ታ ማጫ ናይታ፥ ኤንታ ናይት ታ ናይታ፥ ሀ መሄይካ ታ መህያ፥ ኔኒ በእያ ኡባይ ታባ። ሀች ሀ ማጫ ናይታ ቦላነ ኤንታ ናይታ ቦላ አይ ኦꬃናዉ ዳንዳአይና?
44 አነ ሃያ፥ ኔራነ ታራ ዎላ አነ ጫቆስ። ሄስ ነ ግዶንነ ታ ግዶን ማርካ ግዶ” ያግስ።
45 ሄሳ ግሾ፥ ያይቆብ እስ ሹቹ ኤክድ ቱሳꬆ ኤስስ።
46 ባ ዳቦታ፥ “ሹቹ ሺሽተ” ያግስ። ኤንቲ ሹቹ ሺሽድ ኬልዶሶና። ሄ ኬላ ማታን ካꬅ ምዶሶና።
47 ላቢ ሄ ኬላ፥ ይጋር-ሳሀዱታ ግድ ሱንꬅስ። ያይቆብ ቃስ እያ ጋላዳ ግድ ሱንꬅስ።
48 ላቢ፥ “ሀ ኬላይ ኔፐነ ታፐ ግዶን ሀች ማርካ” ያግስ። ሄሳ ግሾ፥ እያ ሱንꬃይ ጋላዳ ጌተትስ።
49 ላቢ፥ “ኑኒ እሶይ እሱዋፈ ሃክድ ደእያ በሳን ጎዳይ ነናነ ታና ናጎ” ግድ ሄ በሳ ምፅጳ ግድ ሱንꬅስ።
50 ላቢ፥ “ኔኒ ታ ማጫ ናይታ ናቅኮ፥ ዎይኮ ኔኒ ታ ማጫ ናይታ ቦላ ሀራ ማቾ ነ ኤክኮ፥ ታ ኤሮና እፅኮካ ነ ግዶንነ ታ ግዶን ፆሳይ ማርካ ግደይሳ አኬካ” ያግስ።
51 ላቢ ቃስካ፥ “ኬለትዳ ሹቻይነ ታኒ ነ ግዶንነ ታ ግዶን ኤስዳ ሹቻ ቱሳይ ሀይስሽ።
52 ታኒ ሀ ኬላፐ ነና ገናናዉ ኔኮ ካንꬆናዳ፥ ነካ ታና ገናናዉ ሀ ኬላፐነ ሀ ሹቻ ቱሳፈ ሀ አꬎናዳ ሀ ኬላይነ ሀ ሹቻ ቱሳይ ማርካ።
53 አብራሃመ ፆሳይ፥ ናኮራ ፆሳይ፥ ኤንታ አዋ ፆሳይ፥ ኑ ግዶን ፕርዶ” ያግስ። ያይቆብ ባ አዋ ይሳቃ ፆሳ ሱንꬃን ጫቅስ።
54 ያይቆብ ዙማ ቦላ ያርሾ ያርሽስ። ባ ዳቦታ ካꬅ ማናዉ ፄግስ። ኤንቲ ምድ ዙማ ቦላ አቅዶሶና።
55 ዎንተꬃ ጋላስ ጉራ ላቢ ደንድድ ባ ናይታ ናይታነ ባ ማጫ ናይታ አንጅድ፥ ዬርድ ባ ሶ ስምስ።